الاثنين، 7 سبتمبر 2009

دا كان أيام زمان !!















صباح القرقيعان في نص رمضان





مساء حلو بطعم بيــض الصعـــو:d










ايي والله كانت أيام ...
يا زين القرقيعان من يصير رمضان نعد الأيام عشان نقرقع ونخطط ويين نروح ووين نيي واي بيت يعطي أكثر !!
كنا نروح كل عيال العايله الكريمه ونقرقع طبعا الصبيان جياس جمعيه والبنات درارييع وجياس من خيش نفس الدراعه
نقرقع واحنا مستانسين والي ما عنده قرقيعان يا ويله :d ماله إلا " وييص وييص كل بيتكم جعاميص :x"





وانا كنت ما اصدق على الله متى ارد البيت أفرشلي صماط وأفرغ خيشتي كلها و أقسم المكسرات بروح والحلاو بروح وبيض الصعو بروح والككاو بروح والحب بروح والنقل واليوز.....

وكنت أنطر القرقيعان عشان شيين !!عشقي "حلاو بو بقره " و "بيض الصعو " إلي ما اشوفه إلا من قرقيعان لي قرقيعان...,,,وغير حلاو صمي(صلبوخ) العريق من الصيداوي:d<< ما كنت أحبه




كانت أيام كنا نستانس ليما نقرقع ... ,,




والله ما انسى في بيت كنا نقرقع عنده بالعديليه كان يحط مع القرقيعان خرده وكنا نستانس ونحرص كل سنه نروح له :d يعني بكل بساطه كان القرقيعان بالنسبه لنا شي غير
















أما الحيين ...




هذا انا ما اسميه قرقيعان على قووووولتهم "قرقيعان مودرن" modern "




شهالخرابييط !!




إييك الياهل مو حافظ الأغنيه اصلا يخمط ويروح




لاااااه وفي بيوت حاطيلك القرقيعان بجياس صغيره ومسكرينها بشرايط !! عشان الخدامه ما تعب روحها !!




ينطق الجرس تسأل جم واحد انتوا وطلعلهم الجياس على العدد




والي يبط الجبد إن اليهال يقولولك شنو هذا نبي ككاو معروف !! وطبعا كل ما زادت المكسرات صار هالقرقيعان cheap








والي يشيب الشعر ليما يصفون اليهال وتطلع لهم الخدامه ويقولون على منو نغني تقولهم على ..اسيماني @@ يعني "سليمان"!!




شنقول وشنخلي ...,,




والله حرام اصلا الحيين نادر ما تشوف ولد يقرقع بدشداشه وصديري !! او بنت بدراعه كلهم لابسين هالجيينز ورايحين !!




شي يكدر الخاطر !!












وغير الهبــــه اليديده الي هابين فيها حريم الكويت !!"بعضهم مو كلهم "!!




بتسوي حق ولدها ما ادري بنتها قرقيعان وبتوزعه حق الييران ورفيجاتها والاهل !!




والمشكله يتسوى حق الكبار مو الصغار وليش كل هذا "عشان يقولون شفتوا قرقيعان ولد فلانه خيالي مسويته أب ؟؟؟؟ دينار !!




انا خابره القرقيعان فرحه للصغار قبل الكبار بس الحيين العكس ..,,,




والله ذاك اليوم وحده من أهاليتنا بتسوي حق ولدها قرقيعان .. المهم تقول عاد تصدقون رحت حق دزاينر""designer بسوي عندها الصندوق @@ ,, بس ماكو!!




أرخص صندوق 25 دنانير وانا ابي كمية..,, على الأقل 200 حبه عشان رفيجاتي والأهل والجيران !!




ريلها طبعا بقق عيونه@@ وطقته البوهه ..,, شنو 25 دنانير وانتي تبين على الأقل 200 يعني هاذي فيها 5000 دينار وعلى فكره الصندوق خالي يعني القرقيعان علييج @@ يعني معاش هالشهر والشهر الياي طاير !!




مسكين زين ما طق ومات من الخرعه




وقالها ها عسى هونتي جنه الولد صغير وما يفتهم نطري سنه سنتين لين يكبر




لااااه والأدهى من ذلك !!




تقول تصدقون يوم رحت هناك ولا وحده جدامي و"تحلف المره " شخطت كرتها ولا احسابها 6000 دينار حق قرقيعان ولدها @@




شنو هذا من صجهم هذول طبعا يو تيرن شرعت الحلج كل عاده ..."لا يا ام فلان " عاد 6000 مره وحده قولي غير هالحجي




خلاص باجر عندي" بروفا" مسويتلي صندوق وبروح اشوفه تعالي وحكمي




خلاص على راييج




ورحنا .. ويا ليتني ما رحت قاصه على خلق الله عنبو انها دزاينر""designer يالله لا تبلينا شنو هذوووووول انصدمت والله ...,,,



بس ماكووووو فايده انت ويين عايش ....,, بالكويت عيل شي طبيعي الي تشوفه !!




على قولت يدتي "يالله لا تعاجبنا "!! ما صار فينا هالغبره والرطوبه والناس كلها مسدحه بهالمستشفيات وإنفلونزا خنازير وطيور و أزمة فيمتو وأزمة أقتصاديه إلا من هالحريم !! المهم ..,,



على طاري القرقيعان السنه الي طافت صار شي غريب !!




كان اول يوم قرقيعان !! ويوتيرن متربعه عند الباب مع سوسو ننطر أحد ايي يقرقع علينا طبعا هلكنا واحنا طالعيين داشيين مشاء لله الجرس ما سكت !!




المهم ..,,




عقب ال 10 ونص صار ربع ساعه ومحد يانا ..,,




فقامت يوتيرن وتشرقدت جدام التلفزيون :d




شوي ولا ينطق الجرس يو تيرن : منو قرقيعان ؟




الي عند الجرس وبصوت يخرع :إيي قرقيعان !!,, عسى عندكم




يوتيرن بكل برائه لان حاطه ابالي انهم يهال : إيي حبايبي نطروا شوي !




وأروح أركض أسحب سوسو يالله قرقيعان تعال @@




ونفتح الباب>> الطامه الكبرى

شباب دوانية بو جاسم كلهم عندنا يايين يقرقعون ..."ليما أقول شباب أقصد تتراوح اعمارهم ما بين 22 لي 25 والله اعلم !!"
طبعا طقتني البوهه !!
يو تيرن ومبققه عيونها : هلا اخوي
شباب دوانية بو جاسم : عندكم قرقيعان !!
يو تيرن : هاا ما اسمع @@
الشباب : نبي قرقيعان!!
يو تيرن : إيي ان شاء الله اخوي دقيقه !!
واروح أركض عند امي يمه لحقي لحقي وامي تيي مع ثوبها الصلاة للحين ما فصخته من صلاة العشى :d

شوي ولا امي : حياكم الله يالله تبون قرقيعان غنوا حق سليمان أول ولا ما في قرقيعان !!
يو تيرن طايحه بالأرض من الضحك شفيها الوالده @@
الشباب : أفا علييج خالتي
ويبدون يطقطقون على "قوطي حليب البودر مال التموين" :d وأثنين ماسكين طيران !!
سلم سليمان يالله ..خله لمه يالله .. وسلم ولدهم يالله .. وخله لمه يالله !!
أمي : يا حليلكم والله ...انت منو امك @@ ...




يضحك الريال :d انا جاركم لزيجكم !!
امي : ايي والنعم سلم على امك ... يالله افتح الجيس :d امي الله يهداها عايشه الدور وجنه شي عادي :]
المهم خلصوا ...,, وخلصوا قرقيعانا معاهم :d
وكملوا جولتهم واهم يقولون عساكم تعودونه كل سنه وتصومونه !!



بيني وبينكم تمنيت لو عندي ربع جرأتهم وأروح أقرقع مع اليهال :d
بس فشـــــــــله :$

...
اليوم على الساعه 9 بليل يولنا اصبيان معاهم دنابك :d
يا حليلهم :] يونسون
قالولي منو نقرقع عليه ..,, جان أقولهم "ريــم"!!
بدوا مع صوتهم الشجي :d
سلم ريم يالله ... خلها لامها يالله ..
شوي ولا رئيس الفرقه ما عجبته القافيه الظاهر البيت وايد مكسور :d
وبكيفه غير البيت جان يقول :
سلم منيره يالله @@ ... خلها لمها يالله !!
جان اقوله صل على النبي @@ منو منيره ..,, حبيبي ريم ريم مو منيره

جان يقول ريم ما تركب صعبه @@ يا حلوهم لووووووول ضحكت عليهم من قلب :]


ودي أسمع منكم ذكريات التقرقع ...,, إلي وده يشاركنا بشي من ذكرياته ..,, ما نقول لا :]


صـــــــــــج فرق بين قرقيعان ال modern ."ككاو باتشي " ..,,, وبيـــن القرقيعان ال "cheap " على قولتهم !! ..,,حلاو بو بقرة !!

ولا إنتــــــــــــوا شرايكـــــــــــــــــــــم !!

أدري بوستي شوي بايت بس شسوي ... ما تفرغت حق مدونتي إلا اليوم :d




هناك 16 تعليقًا:

joe يقول...

بييه خلاص القرقيعان راح ووله وانقضت ازمانه

اصلا اهمه خل يعرفون شنو يعني القرقيعان و شمناسبته

قرقيعان هالايام موضه مثل ماقلتي وبدت تندفن

و قليل تشوفين يهال ايون يقرقعون مو مثل قبل

والله شحلات القرقيعان قبل لي لبسنا الدشداشه ورحنا بروحنه لاخدامه ولاهم يحزنون

mtfa2el يقول...

" ما صار فينا هالغبره والرطوبه والناس كلها مسدحه بهالمستشفيات وإنفلونزا خنازير وطيور و أزمة فيمتو وأزمة أقتصاديه إلا من هالحريم !! "

اهااا أديك أولتيها :p

الحريم أهم سبب المشاكل و الغلاء و كل بلاوي الدنيا ..بعظمة لسانج مو انا اللي قلت

بعدين شنو قرقيعان ب 5000 دينار !! لا و ريلها يكاسرها السنة الياية مو الحين
و الله جان 5000 فنقر

انا و الله اشوفهم اييبون قرقيعان أشكال و الوان و انا ما غير ابلع أثاري كل قرقيعان مبلغ و قدره !!
و بعدين يقولون الحكومة و ما عندنا فلوس و ليش ما ليش و كيف زلك يا إلهي!!

C'est La Vie يقول...

امبيه حتى انتي من ربع حلاو بو بقرة؟
قبل ليما نخلص من التقرقع كنت اتبادل مع بنات خالاتي
اعطيهم كاكاو بو نجوم عشان آآخذ حلاو بو بقرة يمي يمي
بس الحين طلعو حلاو بو بقرة الصيداوي التعبان حده تعيس
المهم بالنسبة حق القرقيعان هالايام
اصلا ماكو قرقيعان
انا اعتبر القرقيعان officially dead
واحسن الله عزاكم بعاداتنا الحلوة اللي راح ينحرمون منها عيالنا

بانوراما يقول...

أووف حلاو بو بقره مو صج !!

القرقيعان هالأياام صار جنه الأوادم رايحين المرينا كل واحد نافش شعره ولابس جينز ويقرقع ..

Fishah يقول...

هههههههههههههه حبيت سوالف شباب ديوانية بوجاسم .. قرقيعانهم يونس :))
وحبيت ردة فعل الوالده انه شي عادي ولا جنه اللي جدامها شي غريب :)))

صاجه الحين اللي يقرقعون بايخين مو نفس اول .. اصلا هالسنه ما بطلت لهم الباب :PpPp

يا حلو حلاو بوبقرة ذكرتيني فيه :)

كل عام وانتي بخير :))

شاي الضحى يقول...

راااااااااااااااااحت ايام القرقيعان


الناس تغيروا ما تبين القرقيعان يتغير؟


قبل الجرس ما يسكت من كثر اليهال الحين زين اذا طقوه مره ولا مرتين


يا حلو البساطه مالت ايام قبل واشوه لحقت عليها هههههه الحين بكل شي قاموا يعطونه اكبر من حجمه شدعوه قرقيعان بالآلاف

وترا هم الاهل ما ينلامون الديره صارت تخرع ماكو امان محد يأمن عياله يطلعون يقرقعون من بيت لي بيت مع الخدامه والجرايم زايده هالايام


هالايام من تصير حزت القرقيعان البيت انترس قواطي من التوزيعات لوووول


مشكوووره :)

غير معرف يقول...

قرقيعان سنة عن سنة قاعد ينقرض وهالشي قلته في احد البوستات الي ببلوقي.. انتوا زين على الاقل اليهال ايوون بيتكم احنا يمكن بس 4 او 5 مرات طقوا بابنا.. الله يستر وما تنقرض هالظاهرة..

اوفف شنو هذا من صجهم هذيل قرقيعان 6000 دينار؟ شالفسق!! عاد مادري عيالهم باجر راح يبرونهم ولا لأ على كل هالفلوس باجر يتزوج وياخذ مرته ولا يدري عن أمه وابوه..


صج صج الكويتيين مايدرون وين يقطون فلوسهم..

ثانكس ع التوبك..


طماشة

aL-NooR . يقول...

وين الحين ووين قبل ..تدرين ماكو بساطة كلش ..مساكين هاليهال ..حتى السكة نادرا ما يشوفونها .. و يقرقعون بالسيارة ..و السايق ينزل .. حتى الدراريع اقل شي 80 شدعوة ..@@

على قولتج دا كان زمان

D:
*********************

غير معرف يقول...
أزال أحد مشرفي المدونة هذا التعليق.
U-Turn يقول...
أزال المؤلف هذا التعليق.
enter-q8 يقول...

هذا و لا شي لو تشوفون القرقيعان اللي ياي بالشحن الجوي
يوم سالت صاحبة قلت له ليش ما اشتريت من الكويت
قال وين غالي
قلت له اللحين شحن جوي بتقولي رخيص
قال موفر على الحبة 4 دنانير
يا رب سترك
المهم القرقيعان اللي جايبنه الاخوان مال تفطر فيه نص بنغلاديش

fatto يقول...

عيدكم مبارك وكل عام ونتو بخير وصحه وسلامه :)

-mate يقول...

عيدج إمبارك خيتي وكل عام وأنتم بخير
:)

نبي عيادي, مانبي قرقيعان
:q

Fishah يقول...

عيدكم مبارك

تقبل الله طاعتكم

وعساكم من عواده

(شويه متأخره)

:)

بـنـت بـطنـهـا يقول...

اولا انا زيارتي اللي متأخرة
شلونج عسوله ان شاء الله بخير

ثانيا انا اللي هسترت عليه هالمقطع

شوي ولا رئيس الفرقه ما عجبته القافيه الظاهر البيت وايد مكسور :d
وبكيفه غير البيت جان يقول :
سلم منيره يالله @@ ... خلها لمها يالله !!
جان اقوله صل على النبي @@ منو منيره ..,, حبيبي ريم ريم مو منيره

جان يقول ريم ما تركب صعبه


فصلت من الضحك صراحة واحس ريلي يقول بقلبه الحمدلله والشكر

بالنسبة لموضوع البوست والله انا كنت يايه اكتب مثله لان اللي شفناه بالقرقيعان غريب .. انا اول مرة اصلا اشوف صبيان يغنون قرقيعان وقرقيعان
سلم ولدهم مااندارت في بيتنا ابد

وبالاخير ننتظر بوست يديد منج :)

ntfa يقول...

لوووووووووووووووووووووووووووووول

الموضووع طااف بس غصب ارد عليه

امبيييه وناااسه .. القرقيعاان احلى احلى لحظااات!!

حدي مت ضحك على بيت ايرانكم

حسيت قاعده اضحك ويااج

يعني لو انا والله جذي انخش ورا امي واضحك

وامج على ثووب الصلااه حدي حسيتها امي


جذي اللي عادي مايهمها اتضحك


الله يحفظ امهاتنا .. والذكراات الحلواات XD