الخميس، 31 ديسمبر 2009

خير الكلام ما قل ودل

شعور غريب ,,
ماني عارفه اكتب مقدمه ابدا فيها !!
احس ان مدونتي قاعده تتشره علي !!
نسيت وين مكان كل حرف بالكيبورد !!
قبل عشان اكتب كلمه آخذ 5 ثواني
الحين عشان اكتب كلمه يبيلي دقيقه !!
مو هذا موضوعنا
اول شي كل سنه وانتوا بخير
وعساها تكون سنة خير علينا كلنا واحنا بصحه وعافيه
تكثر فيها افراحنا ..
بـــدايـــة يديده بالسنه اليديده !
من الوله احس الوضع غريب ماني عارفه شنو بكتبت!!
ولا شنو كتبت :S

الاثنين، 7 سبتمبر 2009

دا كان أيام زمان !!















صباح القرقيعان في نص رمضان





مساء حلو بطعم بيــض الصعـــو:d










ايي والله كانت أيام ...
يا زين القرقيعان من يصير رمضان نعد الأيام عشان نقرقع ونخطط ويين نروح ووين نيي واي بيت يعطي أكثر !!
كنا نروح كل عيال العايله الكريمه ونقرقع طبعا الصبيان جياس جمعيه والبنات درارييع وجياس من خيش نفس الدراعه
نقرقع واحنا مستانسين والي ما عنده قرقيعان يا ويله :d ماله إلا " وييص وييص كل بيتكم جعاميص :x"





وانا كنت ما اصدق على الله متى ارد البيت أفرشلي صماط وأفرغ خيشتي كلها و أقسم المكسرات بروح والحلاو بروح وبيض الصعو بروح والككاو بروح والحب بروح والنقل واليوز.....

وكنت أنطر القرقيعان عشان شيين !!عشقي "حلاو بو بقره " و "بيض الصعو " إلي ما اشوفه إلا من قرقيعان لي قرقيعان...,,,وغير حلاو صمي(صلبوخ) العريق من الصيداوي:d<< ما كنت أحبه




كانت أيام كنا نستانس ليما نقرقع ... ,,




والله ما انسى في بيت كنا نقرقع عنده بالعديليه كان يحط مع القرقيعان خرده وكنا نستانس ونحرص كل سنه نروح له :d يعني بكل بساطه كان القرقيعان بالنسبه لنا شي غير
















أما الحيين ...




هذا انا ما اسميه قرقيعان على قووووولتهم "قرقيعان مودرن" modern "




شهالخرابييط !!




إييك الياهل مو حافظ الأغنيه اصلا يخمط ويروح




لاااااه وفي بيوت حاطيلك القرقيعان بجياس صغيره ومسكرينها بشرايط !! عشان الخدامه ما تعب روحها !!




ينطق الجرس تسأل جم واحد انتوا وطلعلهم الجياس على العدد




والي يبط الجبد إن اليهال يقولولك شنو هذا نبي ككاو معروف !! وطبعا كل ما زادت المكسرات صار هالقرقيعان cheap








والي يشيب الشعر ليما يصفون اليهال وتطلع لهم الخدامه ويقولون على منو نغني تقولهم على ..اسيماني @@ يعني "سليمان"!!




شنقول وشنخلي ...,,




والله حرام اصلا الحيين نادر ما تشوف ولد يقرقع بدشداشه وصديري !! او بنت بدراعه كلهم لابسين هالجيينز ورايحين !!




شي يكدر الخاطر !!












وغير الهبــــه اليديده الي هابين فيها حريم الكويت !!"بعضهم مو كلهم "!!




بتسوي حق ولدها ما ادري بنتها قرقيعان وبتوزعه حق الييران ورفيجاتها والاهل !!




والمشكله يتسوى حق الكبار مو الصغار وليش كل هذا "عشان يقولون شفتوا قرقيعان ولد فلانه خيالي مسويته أب ؟؟؟؟ دينار !!




انا خابره القرقيعان فرحه للصغار قبل الكبار بس الحيين العكس ..,,,




والله ذاك اليوم وحده من أهاليتنا بتسوي حق ولدها قرقيعان .. المهم تقول عاد تصدقون رحت حق دزاينر""designer بسوي عندها الصندوق @@ ,, بس ماكو!!




أرخص صندوق 25 دنانير وانا ابي كمية..,, على الأقل 200 حبه عشان رفيجاتي والأهل والجيران !!




ريلها طبعا بقق عيونه@@ وطقته البوهه ..,, شنو 25 دنانير وانتي تبين على الأقل 200 يعني هاذي فيها 5000 دينار وعلى فكره الصندوق خالي يعني القرقيعان علييج @@ يعني معاش هالشهر والشهر الياي طاير !!




مسكين زين ما طق ومات من الخرعه




وقالها ها عسى هونتي جنه الولد صغير وما يفتهم نطري سنه سنتين لين يكبر




لااااه والأدهى من ذلك !!




تقول تصدقون يوم رحت هناك ولا وحده جدامي و"تحلف المره " شخطت كرتها ولا احسابها 6000 دينار حق قرقيعان ولدها @@




شنو هذا من صجهم هذول طبعا يو تيرن شرعت الحلج كل عاده ..."لا يا ام فلان " عاد 6000 مره وحده قولي غير هالحجي




خلاص باجر عندي" بروفا" مسويتلي صندوق وبروح اشوفه تعالي وحكمي




خلاص على راييج




ورحنا .. ويا ليتني ما رحت قاصه على خلق الله عنبو انها دزاينر""designer يالله لا تبلينا شنو هذوووووول انصدمت والله ...,,,



بس ماكووووو فايده انت ويين عايش ....,, بالكويت عيل شي طبيعي الي تشوفه !!




على قولت يدتي "يالله لا تعاجبنا "!! ما صار فينا هالغبره والرطوبه والناس كلها مسدحه بهالمستشفيات وإنفلونزا خنازير وطيور و أزمة فيمتو وأزمة أقتصاديه إلا من هالحريم !! المهم ..,,



على طاري القرقيعان السنه الي طافت صار شي غريب !!




كان اول يوم قرقيعان !! ويوتيرن متربعه عند الباب مع سوسو ننطر أحد ايي يقرقع علينا طبعا هلكنا واحنا طالعيين داشيين مشاء لله الجرس ما سكت !!




المهم ..,,




عقب ال 10 ونص صار ربع ساعه ومحد يانا ..,,




فقامت يوتيرن وتشرقدت جدام التلفزيون :d




شوي ولا ينطق الجرس يو تيرن : منو قرقيعان ؟




الي عند الجرس وبصوت يخرع :إيي قرقيعان !!,, عسى عندكم




يوتيرن بكل برائه لان حاطه ابالي انهم يهال : إيي حبايبي نطروا شوي !




وأروح أركض أسحب سوسو يالله قرقيعان تعال @@




ونفتح الباب>> الطامه الكبرى

شباب دوانية بو جاسم كلهم عندنا يايين يقرقعون ..."ليما أقول شباب أقصد تتراوح اعمارهم ما بين 22 لي 25 والله اعلم !!"
طبعا طقتني البوهه !!
يو تيرن ومبققه عيونها : هلا اخوي
شباب دوانية بو جاسم : عندكم قرقيعان !!
يو تيرن : هاا ما اسمع @@
الشباب : نبي قرقيعان!!
يو تيرن : إيي ان شاء الله اخوي دقيقه !!
واروح أركض عند امي يمه لحقي لحقي وامي تيي مع ثوبها الصلاة للحين ما فصخته من صلاة العشى :d

شوي ولا امي : حياكم الله يالله تبون قرقيعان غنوا حق سليمان أول ولا ما في قرقيعان !!
يو تيرن طايحه بالأرض من الضحك شفيها الوالده @@
الشباب : أفا علييج خالتي
ويبدون يطقطقون على "قوطي حليب البودر مال التموين" :d وأثنين ماسكين طيران !!
سلم سليمان يالله ..خله لمه يالله .. وسلم ولدهم يالله .. وخله لمه يالله !!
أمي : يا حليلكم والله ...انت منو امك @@ ...




يضحك الريال :d انا جاركم لزيجكم !!
امي : ايي والنعم سلم على امك ... يالله افتح الجيس :d امي الله يهداها عايشه الدور وجنه شي عادي :]
المهم خلصوا ...,, وخلصوا قرقيعانا معاهم :d
وكملوا جولتهم واهم يقولون عساكم تعودونه كل سنه وتصومونه !!



بيني وبينكم تمنيت لو عندي ربع جرأتهم وأروح أقرقع مع اليهال :d
بس فشـــــــــله :$

...
اليوم على الساعه 9 بليل يولنا اصبيان معاهم دنابك :d
يا حليلهم :] يونسون
قالولي منو نقرقع عليه ..,, جان أقولهم "ريــم"!!
بدوا مع صوتهم الشجي :d
سلم ريم يالله ... خلها لامها يالله ..
شوي ولا رئيس الفرقه ما عجبته القافيه الظاهر البيت وايد مكسور :d
وبكيفه غير البيت جان يقول :
سلم منيره يالله @@ ... خلها لمها يالله !!
جان اقوله صل على النبي @@ منو منيره ..,, حبيبي ريم ريم مو منيره

جان يقول ريم ما تركب صعبه @@ يا حلوهم لووووووول ضحكت عليهم من قلب :]


ودي أسمع منكم ذكريات التقرقع ...,, إلي وده يشاركنا بشي من ذكرياته ..,, ما نقول لا :]


صـــــــــــج فرق بين قرقيعان ال modern ."ككاو باتشي " ..,,, وبيـــن القرقيعان ال "cheap " على قولتهم !! ..,,حلاو بو بقرة !!

ولا إنتــــــــــــوا شرايكـــــــــــــــــــــم !!

أدري بوستي شوي بايت بس شسوي ... ما تفرغت حق مدونتي إلا اليوم :d




الأحد، 16 أغسطس 2009

للحــــديث بقــــيه !!

هو عسكري ...,, منذ الأزل كان يعشق أن يكون في خدمة الوطن !
هو رجل شرقي من الدرجة الأولى .. متحفظ بآرائه.. لا يحبذ أن يتدخل في شئون الغير ... قليل الكلام وكثير السمع ..
وفي هذا يقول محاولا نصح أحد أبنائه : أقعد في الاجتماع لمدة ساعتين ما افتح حلجي الكل يعطي رايه ويتكلم بلي يعرفه ولي ما يعرفه ومن يقول الوزير شي ردوا عليه راينا من رايك حتى لو كان غلطان .. ومع هذا ينتهي الإجتماع ويلتفت علي الوزير ... ها بو فلان ما عطيتنا رايك !! أرد عليه وأقول رايي وانا ابتسم .. يرد لي الإبتسامه مع هالكلمتين الي تعودت اسمعهم بكل اجتماع ... شورك وهداية الله !!


ربما لهذا السبب كان له عداوات ... دبلوماسي بالتعامل سواء بالعمل أو في حياته الخاصة !..ولا كن إلي يدوس له على طرف
يا ويله ويا سواد ليله !..,, عائلته أولا ثم بقيت الأشياء !!


يعود من العمل في تمام الساعة ال 3 عصرا وكطبيعة كل عسكري " عاقد النونه وماله خلق أحد !" ..,, ينادي أم فلان " حطيلنا الغدا "


أم فلان : هي إنسانه طبيعتها أقرب إلى الطبيعة الملائكية ! متقاعدة منذ مده طويلة ..,, تفعل أي شي من أجل أبنائها وأحفادها ورجلها
لها قلب يتسع للعالم أجمع ..,, لا تكره أبدا ..
" كافه خيرها وشرها "



يجلس على المائدة الساعة 3 و 15 دقيقه بالضبط يوميا وحوله بعض من أبنائه..,, البقية متغيبين بسبب طبيعة عملهم الذي ينتهي الساعة 4 عصرا
يبدأ بال "التحلطم " كالعادة ...,,
ليش الغدا شويه !! (علما انه ينتهي من غدائه وثلاث ترباع القنجه " وعاء يوضع به العيش " ما نجاست ) ليش الغدا مالح تدرين فيني يا ام فلان ما أحب الملح الله يهداج !! ..,, وين الخلال اليديد الي شريته .. ليش حاطينه بهالماعون الصغير !!... " ( لا اعلم هل لانه كبر ام للتخلص من ضغوط العمل )
تقابله ام فلان بابتسامه عريضة :
تآمر أمر من باجر ان شاء الله اسويلك الي تبيه :)


يعم الهدوء المكان .. ينتهون من الأكل ويتجهون لغرفة المعيشة حيث صينية الجاي المبجلة
يبدؤون في التناقش بأمور الديره وكلام الجرايد !!

والغريب بالأمر انه لا يحبذ بالتكلم في شئون عمله حتى مع ام عياله ...
يذهب لأخذ قيلولة الظهيره !!

يقترب أحد الأبناء من أم فلان فيقول .: هونيها وتهون يا الحبيبه ترى ما يقصد ولا تلومينه كله من هالدوام الزفت ما ادري متى بيتقاعد !( بو زياد يقول هذه الجملة يوميا لامه ) ولا ترد عليه إلا بابتسامه ! و في قلبها تقول ( يا حلوه واهو يتحلطم )

نسيت أن أذكر أن بو فلان كان تربطه علاقة حب مع ام فلان منذ الأزل عندما كانوا في عمر الزهور .. وعندما أقول زهور لا اعني بها ال 20 ... ولكن أعنى بها ال 16 سنه :) ...,, كانت تربطهم علاقة قرابة غريبة !
حيث أن أخت بو فلان من أبيه هي زوجة عم أم فلان !! فبالكاد كانوا يلتقون وفي أحد هذه اللقاءات أفصح بو فلان عن حبه لها ..! بأول رسالة حب بينهما ..,, كان قد أعطاها لابنة أخته لتكون هي رسول الغرام !
علما أن أول رد من أم فلان على رسالة بو فلان كادت تحمل المقدمة هذه >>:" إلى أخي العزيز ...."<< لولا إن ابنة عمها" نزرتها" وقالت : الحين يحبج وتقوليله أخي العزيز !!>>> يالا برائتهم في ذلك الزمن !! عجيب امرنا نحن البشر ! كيف نتبدل ونتغير في يوم وليله !


بو فلان على الرغم من جفاء تعامله قليلا إلا إنه يمتلك قلب حنون فإذا أحب.. أحب فعلا !!
كان يصعب عليه الإفصاح والتعبير عن مشاعره قليلا !! ربما لأنه عسكري !؟ لا اعلم


ام فلان تحبه والدليل على ذلك احتفاظها بكل شي أعطاه لها حتى وإن كانت عبارة عن زجاجة عطر فارغة عريقة !! يغطيها الغبار !! فهي من عيد زواجهم الأول !اي منذ 39 سنه تقريبا


على الرغم من قسوة شخصية هذا العسكري إلا إنه حنون لأبعد درجه !
كان يحتفظ بكل رسائل ام فلان منذ عرفها في درج مكتبه ..,, حتى إذا ضاقت به الأوقات وشعر بضغط العمل أو ضيق في النفس كان يهرب إلى مكتبه ويغلق الباب خلفه ..,, ويبدأ بقراءة رسائلها مرارا وتكرارا !! حتى أصبح يحفظها عن ظهر قلب !! كيف لا وهو يقرأها منذ 39 سنه !! فكانت هذه الرسائل هي سر قوته ! وسر وقوفه على قدميه بعد كل فشل يمر به ..,, أو أي مشكله يسقط بها ..,,


بعد كل نهاية يوم ..,, يذهب لها ويقول : يا أم فلان سامحيني ما كنت اقصد أكدرج اليوم ... ترى الغدا لذيذ تسلم إيدج..... " ويقبل يدها !"
لترد عليه مع ابتسامتها ألملائكيه :
أصلا إذا ما تحلطمت يضيق خلقي لان ادري أن في شي مضايقك :]
يرد هو :
الله لا يحرمنا منج ويخلييج لنا





يستيقظ للذهاب للعمل ..,, وهكذا ...





غريب هو ..,, على الرغم من قوة شخصيته و حدته بالتعامل إلا انه في نفس الوقت حنون ذا قلب كبير !لا يخجل أن "يتأسف منها ويراضيها "!!
غريبة هي ..,, على الرغم من قسوته في التعامل في بعض الأحيان إلا إنها على يقين إنه سوف يعود "عشان يآخذ بخاطرها " ..!! على الرغم من تحلطمه وحنته !! ولكنها تعشق هذه الصفه فيه !! فإذا لم يتحلطم قالت :
شفييك حبيبي في شي مضايقك اليوم ؟ متضايق من الدوام ؟


هو أجمل سوء تقدير بين رجل وامرأة ،،
يشبه فاكهة الرمان , فبمرارته عذوبة وفي عذوبته مرارة!




يقال ان الإنسان قبل الحب شيء وعند الحب شيء وبعد الحب لا شي ! ..,, هل هذا صحيح ؟

لا أعلم حتى الآن !!













السبت، 4 يوليو 2009

BiG break

hi hi hi ;p
سامحوني ما قدرت أرد على تعليقات آخر بوست
لان كل العادة لووووووووووووووووووووويه
خلصنا فاينل ولوووووويه لووووووويه
وشلنا قشنا وسافرنا :d
الحين أكلمكم من ربوع أمريكا الخضراء :d
نشوفكم بعد شهر على خير ان شاء الله
قلنا نعطيكم خبر عشان محد يقول هاذي وين غطت :d
وسوالف قاطعه ما قاطعه وخصم معاش وحاله
b'bye

الخميس، 11 يونيو 2009

ال MOOD zFt @@ + بـــــووووم .... قـــــــويه


صباحكم عسل مع القيمر والخبز الإيراني
ومساكم رقيــه بارده تسرسح على الجبد






لا تضحكون على الألوان ما أعرف أدرس إلى إذا سويت الكتاب لوحه فنيه وطبعا هذا يآخذ مني نص وقت الدراسه !!



بلشنــا فاينلز !! وبلش الMOOD يعتفس



أمس كان عندي فاينل قانون تجاري ... الماده وايد سهله والدكتور للأمانه عجيـــب يقولك أخذ A بدون لا تعور قلبك
فيني طبع مو شي !! ما أعرف أدرس حق الإمتحان قبله بمده .. لازم يكون إمتحاني باجر وانحط جدام الأمر الواقع
وأصك على روحي الدار " الغرفه" و أكرف .. وأواصل وأدرس وأدرس وهذا ما فهمته طاااااااف هذا ما حفظته مو لازم

هذا ما أدري شسالفته !! عادي مو أول وحده ولا آخر وحده @@ يعني بالضبط ما ادري ليش أعور قلبي وأفتح الكتاب



على فكره انا أول وحده بالعالم أؤمن بهالمقوله " الوقت كالسيف إن لم تقطعه قطعك " ... وآخر وحده بالعالم أطبق هالكلام
لا تسئلوني ليش !! لان صج ما أدري



بس on the other hand
علي ضمير يقتلني كله يأنبني وتشوفوني بحاله يرثى لها قبل الإمتحان بساعه جنه علي حكم بالإعدام ..!! شوي وأبلع الكتاب :d



المهم مو هذا موضوعنا

الموضوع إني قبل لا آخذ قيلولة العصر طلبت من الوالده العزيزه انها تقعدني !! قلت أصلي العصر وانام لي ساعه
ونقوم نجابل.. أنام نومة الغزلان بالبريه :d
أفتح عيون المها :d ولا @@ الساعه 7 المغرب @@

ها 7 !!

ويييييييييين امي ؟
ليش ما قعدتيني !!وراااااااااي فاينل !! ما درست شي !!
أمي العزيزه: رعيتي قلبي وانا اقعدج @@ وانا كبرت مالي خلق أقعد أحن على أحد .. إداد لي @@
أبوس راسها :* يالله ما عليه بس إدعيلي ما أسقط سهوا :d




أقعد أصك على روحي الدار وأقراوأقرا وأقرا @@ وأوراق ماليه وتجاريه والشركات لها 7 انواع ..رئيس مجلس الإداره
رئيس مجلس الإداره @@ لحظه لحظه !!
ما فهمت " قفل المخ" يعني هذا الي يسمونه chairman ؟؟



يمه .. ما ترد... أعلي نبرتي وانا متربعه على الفراش وماسكه الكتاب يـــــــــــــــــمه
ترد علي بكل حنيه : وااااي يالعيز @@ تعالي هني ما اسمعج !!
يمه يمه .. الحين رئيس مجلس الإداره اهو الي يسمونه chairman
شدراني يا بنيتي !! دقي على ابوج او واحد من أخوانج ؟



أحوووس وأحوووس بالبيت !! ... فجأه أشوف marbel العزيزه تتخطرف بأرجاء المنزل
أنا hi !! how are you ?
تعالي ماربل يو نو وت ذا مين اوف chairman ازت a boss اور وت ؟
ترد ومن الوناسه ودها تلمني @@: نو اتز employee
أنا : لا والله حلفي !! اشوه انج قلتيلي .. ثانكيو يبا ثانكيو الشرهه على الي يضيع وقته الثمين
خل أروح أجابل بس لا اسقط سهوا بسبتج !!
أرد وانا أجر خلفي أذيال الهزيمه
أرد داري العزيزه أطالع الكتاب .. وأكتشف إني مقفله ليش ؟!!

أنا أقولكم ليش ؟

أتصفح الكتاب وأعد جم صفحه باقيلي !! فجأه تطلع بمخي a spot light
الحين انا شكو إذا هذا chiaRMAN ولا EMPLOYEE
لا لااااااااااااا أقفل اصلا مو مكتوب بالكتاب !! ومو مطلوب منا ؟ !!
أرد أنغمس بالدراسه ! وأواااااااااااااااااصل وما أناااااااااااااااااااام آآآآآآآآآآآآآآخ يا قلبي



ويصير الصبح وأطلع من البيت فجأه !! الساعه 9 الصبح ولا الأخ ولد أخوي !! حاطيله حمام سباحه وقاعد يغاوص على قولته !!



أنا: إنت شتسوي بهالشموس @@ ؟ ويين أمك تدري !!
اهو :لا انا قلت حق جووس>>> اسمها لووس :d
وهالهبله شكو مطلعتك لا كبوس ولا سن بلوك ولا شي .. من زوووووووود البياض !؟
وبعدين عفيه خلق من صباح الله خير @@ الناس وراها امتحان ومو شبعانين نوم وانت تغاوص !!

يرد علي بكل براءه: فوفو في وحش بهالديره @@؟

أنصدم أنا وإطقني البووهه @@ ها وحش انت منو قاص علييك !!

لا ماكو وحش بهالديره !! انا اقول غاوص غاوص حبيبي
يرد علي ويين رايحه الكولج @@

أنصرع انا انت شعرفك @@ جان يرد علي خالتي علمتني

ويرد يحن : كله قولي حق الناس انج مو حلوه @@
انا اطقني البوهه مره ثانيه :ليش بعد ؟
يرد علي : تعالي اساسرج : شفتي هالوحش يآكل الحلوين بس !!@@
أرد عليه وأنا أضحك : طل بعينه ما يقدر !!
يرد واهو عافس الويه : ألوووحه @@ لا تقولين طل بعينه !! قولي "الله يهــــــداه".... حده قص ويهي مالي ويه أشوووفه
على فكره عمره 4 سنين :]


جان أنحاش .. رحت الكليه.. رديت قعدت مع ابوي تحلطمت وصكيت راسهم ورحت كبرت المخده

وقمـــــــــت وأنا حدي متعــــــــــــــــسره !!

وكل شي متكســـــــر فيني !!

عرفتوا ليش مزاجي ZFT @@





^^^^^^^^^^^^^^^^^^^^^^^^^^^^^^^^^^^^^^^
حـــــــــــــــاذف الآدمي في " البووووووم"




والله فشله !!
محد مدهور هالبلد غير هالأشكال !! الهيلق والميلق
لعنبوا دارك رايح حق الريال بريولك وحاذفه بالبوم الي بمكتبه ... على الأقل أحذفه بعقالك إنعالك"وإنتوا بكرامه" أي شي
بس مو إب بوووووووووم الريال !!



شي يفشل ويكدر الخاطر
وتسعــــــــون حق الإصلاح ... خيـــــــــــــــــــــــر إن شاء الله !!

انا ليش أحر روحي !! يا مـــــــــالنا من الخير

اللهم طولك يا رووووووووووووووووووووووووووووووووووووح




^^^^^^^^^^^^^^^^^^^^^^^^^^^^^^

"بالضبط هـــذا أنا :d"

الفاينلز اليايين حدهم جايدين !!

@@ الله يستر ويعين ان شاء الله
فلا تتوقعون بوست يديد على هالإسبوعيين اليايين :d


تنويه: ما مداني أراجع البوست كتبته ودزيته سيده " لضيق الوقت"... أي أخطاء مطبعيه .. أو حرف ضايع هني ولا هني .. جمله مو مفهومه !! .. كلمه مالها داعي !! ... طوفها وروحوا حق الي وراها :d .. وإذا ما تتطوف مسحوها بويهي :d

"سامحينا نجمه إضطريت أستخدم الأزرق عشان محد يقول ما قريت :d"



اللهـــم بلغـــت ... اللهــــم فشهــــد :d


الأحد، 7 يونيو 2009

NEW LOOK تـــم بحمد الله

مساء الخير والنوير
وصباح النور والبنور :d
طبعا بخصوص اللوك اليديد .. زادت الشكاوي على البلوق
وفي أوادم عيونهم راحت !! وأوادم لبسوا نظارات
والسبه مدونتي الحنونه !!
ووصلنا تهديد إن في بعض العواذل بيشتكون علينا عند حماية المستهلك @@
فسوينا اجتماع انا وام مويضي لان بصراحه ألزم ما علي رايها !! بعد شريكتي بالمدونه شسوي
وقررنا الآتي :
1.إعفاء جميع المعلقيين من رسوم التعليق .
2. تحويل من اللون الأسود الداكن والظلام الدامس إلى اللون الرمادي وتعليق ثريه تتكون من لمبتين وحده للتنوير والثانيه سبير .
3.عدم إستخدام اللون الأزرق وذلك عشان خاطر نجمه.
4. عدم الإنقطاع عن التدوين بدون سابق إنذار .
5. سلامتكم !
وتعقيبا على هالبوست
^
^
تعبت وانا اتحلطم آخر جم بوست كلهم تحلطم !!
فقلنا نغير شي ... هالبوست شوي غير
يعني تقدرون تقولون جم كلمه يعني قلنا نصفها لكم تقرونها !! تقدرون تقولون ام مويضي مرت فيهم بهال19 سنه
وغششتني لان ما كنت ادري شنو انزل بهالبوست
أختصر الموضوع !!
ترى ما عندي سالفه :D بس ولهنا عليكم وزادت الشكاوي !!
والإيميل إنترس والأوادم طلعوا علي إشاعات
والعواذل وايد استانسوا
والربع والأشقاء قاموا يحاتوون
بختصاااااااااااااار صار لويه
فقلنا نثبت حق الأوادم إن إحنا للحين بهالدنيا عايشين :d
^^^^^^^^^^^^^^^^^^^^^^^^^
كنـــا يهال !!
*************
في يوم من الأيام كنا صغار !!
كان ما يهمنا إلا الألعاب وقربنا من الأهل والأحباب
كبـــرنا ..عرفنا المشاعر والأحلام
ومن هموم الدنيا صـــرنا ما ننــــــام
كبرنــا إيي كبــرنا ..
ونتمنى يرد الزمن وونصير صغار !!
___________________________
جــــروحي!! يا روحي ؟
******************

هلا بالجرح دامه من ريحت أحبابي ..
هلا في طعن السيف دامه من الغالي..
هلا في أقسى قلب عرفته بحياتي ..
هلا في أصغر عقل نوجد يا غلاتي!!
هلا في شخص ما يستحق كل تضحياتي!!
هلا فييك وتعال إسكن بأتعس ذكرياتي !!
____________________________
خطى ودروب
************
خطوات ودروب مشيناها !!...
قابلنا ناس في القلب ذكرها... و برمشة عين فقــدناها ..
راحت وبالقلب غلاها..
ونظل نتسائل ونقول :
يا ترى بنسترجعها ..مثل ما سترجعنا
ذكراها؟!
_____________________________
وداع ورحيـــل
************
يحمل أصعب ما يمـــر فيه الإنسان
يرحلون .. ..وما يبقى إلا الشجون!!
ولا شي غير "إن لله وإن إليه لراجعون"..
وداع..إحنا نختاره..إحنا نبدييه..
بدينا نبنيه ..وتنزل عليه دموعنا..
نبجي على كل شي ضاع ونقول هذا الوداع..!!
والغريب..؟
إن إحنا إلي أخترنــا!!
________________________
نفـــاق لا يـــدوم !!
************

ليما تجامل وتعتقد ان هذا الوفاء
ليما ترسم بويهك إبتسامتك الصفراء
ليما تطعن بـــييدك ظهر أعز الأصدقاء
مبــــــــروك علييك !!
إنت إكتســـــبت شخص يديد
بــــس خســــرت نفســك!!
____________________________
اعتــذار!!
*********
لكل من كــان له أحلام وتحقق منها القليل
لكل من له أماني ولم يجــد لها سبيل
تـــوقف وتذكر
إننا بشــر تحكمنا قيم وعادات
جعلتنا نرحل ونترك أحلى الذكريات
راضيين بما قدمنا حتى لو كان القلب مليئا بالآهات!!
___________________________
الأمـــل!!
********
لكل من واجه هموم الحياة
لكل من دمعت عيناه وجرح قلبه
لكل من قاسى وكافح لغيره
أجعل الأمل هو شعارك
تنام ليلك وتنعم بنهارك :]
___________________________
عندمــا تعاني
**********
عندما تعاني وتزيد الآلام..
لا تبكي ..أنظر لمن كان له ألم أكثر منك .!!
لا تنتظر من ينتشلك من الهزيمه !!
أنهض وأكمل بقوة
أعلم أن الإستسلام للضعفاء
كن منهم ..كن مؤمنا قويا لايخشى غيره !!
لا يخشى سوى خالقه
وأعلم إن لكل شيء
نهـــايه .
^^^^^^^^^^^^^^^^^^^^^^^^^^^^
آآآآآآآآآه يالســامري !!
عجيب يا جماعه حتى لو صوت المغني لك عليه !! تحس الإغنيه حلوه !!
ما أدري شفيني هاليومين على هالأغنيه
معلقه بالساني :d
بس تبون الصـــج حلوه ^_^
سمعوها !!




السبت، 2 مايو 2009

لأني كويتيه لازم .....!!



بوست اليوم عباره عن تحلطم بما تحمله هالكلمه من معنى :d
فسامحوني ماكو مقدمه :d

Note :
ما مداني أصور فاضطريت اني استعين ب GooGle
وبعض الأخوان والأصدقاء :d
فسامحني اخوي mate تسلفت منك صورة عصير الضاحيه
ومنتدى q8yat.net بعد ما قصروا وياي عسى ما كتبت شي بقوقل اطلعولي :d
*******************************
لاني كويتيه لازم !!
___________
لأني كويتيه
لازم ألبس تاج بو ريش او ورده على كبر دماغي
س:ليش؟
ج: لان هبه .
Note:
قبل أول ما ادخل المحاضره أحاتي وحده حجابها بو تفخه تقعد جدامي وتسكر الشاشه
الحين قمت احاتي وحده تدخل لابسه هالتاج تقول حمامه راكه عليها وتحجب عني الرؤيه @@

^^^^^^^^^^^^^^^^^^^^^^^^^^
لأني كويتيه
لازم يكون عندي black berry or I phone
Why ?
ج:لان هبه
Something to say :
بكفتيريا الجامعه
تتمخطر جمان حامله معها طابوقه
تتوجه نحوه طاولتنا @@ ألجح الطابوقه وانزل رأسي للأرض ظنا بي انها سوف تفلعني بها من المسج الي دزيته @@

جمان بكل وداعه ودها اتعلق الطابوقه بروش على هدومها : باركولي شريت بلاك بري
يوتيرن : على البركه عسى لذيذ مو حامض @@ الله ذكرتيني بأيام امريكا كنت آكل بلاك بري خيالي
جمان : وااااااي يوتيرن امبييه من أي عصر طالعه
يو تيرن : شنو شنو @@
جمان : بلاك بري يا حظي موبايل يديد كل الكويت هابه فيه
يو تيرن : وليش شاريته شنو فيه زود عن السوني
جمان : ما ادري للحين ما تعلمت عليه
يو تيرن : @@ عيل شكووو شاريته دام ما تدرين شسالفته !!
جمان : غيري احسن مني كل الكويت عندهم منه !!
يو تيرن : الحمد الله يا ربي انج ما تصوتين جان رحنا وطي !!


شركة زين بعطيكم فكره ما ادري مسوينها من قبل او لا !
شرايكم تحطون دعاية حق البلاك بري >>>> ((هب مع الهبـــه ))وواحد منسدح على بطنه شابك على النت ويكتب بوست :D
صدقوني بتزيد مبيعاتكم 100%
^^^^^^^^^^^^^^^^^^^^^^
لاني كويتيه
لازم كل يوم امر على عصير الضاحيه او كيفان !
لماذا؟
لان هبه !

How you doing !!?
في بريك الساعه 12 في أزقة الجامعه
مناير : يوتيرن تيين معانا
يوتيرن : ويين ؟ ودي اروح الصيدليه عندي جم شغله ابيها
مناير : لا لا بنروح نشرب عصير
يوتيرن : حلو ودي بعصير تين شوكي مال الخالديه
مناير : لا شفييج بنروح الضاحيه
يوتيرن : @@ لا لا ما ابي تدرون فيني ما احب هالمكان ولا اواطنه !!
مناير : خلاص عيل نروح كيفان وعقب نمر فيج الخالديه تشترين الي بخاطرج !
يوتيرن: وليش الخساير @@ بعد كلهم عصير نروح الخالديه مره وحده
مناير : وااااااي انتي شفيج شخباري منو يشرب عصير من الخالديه !!
يوتيرن : الله يعينكم على روحكم .. أدري لا تكملين بتقوليلي هابين بالضاحيه وكيفان !
^^^^^^^^^^^^^^^^^^
لاني كويتيه
لازم أعلق على سيارتي نجمة شوارفسكي !
pourquoi ?
لان هبه !
Good for you !!
يوتيرن : بالمبارك مناير على السياره يعطيج خيرها ويكافييج شرها
تزينينها ولا تزينج
مناير : تسلمين بعد قلبي انتي اول وحده بتركبها
يوتيرن : مشكووووره , عاد ما قلتيلي شنو تبين هدية سيارتج اليديده
مناير : أبي نجمة شوارفسكي !!
يوتيرن : @@ حرام علييج لاعت جبدي منها
مناير : شكووو انا ابيها عاد كيفج
يوتيرن : أدري لانها هبه !!
^^^^^^^^^^^^^^^^^^^^^
لاني كويتيه
لازم أحب ماكي غصبن علي !
¿por qué
لان هبه !

Weeeeeeeee3@@
مريوم : يوتيرن ترى باجر بنطلع نتغدا بره
يوتيرن : ليش ما قلتلولي من قبل تدرون لازم اقول حق امي قبلها بشهر عشان ترضى
مريوم : عادي انا اكلمها
يوتيرن : ليش الفظايح :d خلاص انا اتفاهم معاها بس وين بتروحون ؟
مريوم : ماكي
يوتيرن : ويييييييييع ما ابي أول وآخر مره ليما وديتوني ما كليت يوم كامل .. إييب المرض ماكو اكل مثل الأوادم الله يزيد النعمه
مريوم: الكل يبيه إلا انتي
يوتيرن : لان هبه !! ولا ما ادري شلاقيين فيه !!(فلافل أشرف )أحلى منه بمليون مره @@

^^^^^^^^^^^^^^^^^^^^^
لاني كويتيه
لازم أسوق رينج / كايين !!

perchè?

لان هبه !

Fact :
بروحي بالسياره
أتحلطم
يوتيرن : جدامي رينج ... وراي رينج.... يميني رينج ... يساري رينج every where range range !!
بعد 30 دقيقه
يوتيرن : يبه تصدق اليوم بالإشاره جدامي ووراي ويميني ويساري كله رينجات !!
ابوي الله يطول بعمره : لا ايي وبعدين يا بنيتي
يوتيرن : لا يبه وايد كل الكويت يسوقون رينج
أبوي : وليش حاطه دوبج دوبهم كيفهم
يوتيرن : @@ ما ادري بس اكييد هبه
ينقز بو زياد : وتدرين ان نص هالأوادم مآخذين قروض عشان هالرينج الي ما عاجبج
يوتيرن : @@ الله يعافيهم ولا يبلانا فســــــــــــــــــــق @@

^^^^^^^^^^^^^^

لاني كويتيه

لازم أتكلم بالسياسه !!

为什么?

لان هبه !


Why Not ?
الدكتور يسأل : منو بالدائره الثالثه ؟ ومنو بالأولى ومنو بالثانيه ومنو بالرابعه !!الدكتور مره ثانيه : شرايكم بأسيل العوضي ؟ و رولا دشتي ؟
وحده الله يذكرها بالخير : رولا[ لا لا لا ]
الدكتور : ليش ؟ حاضرتلها ندوات او شي ؟ تعرفين برنامجها
البنت : لا بس مو حلوه وحده طول عمرها عايشه بره الكويت تدخل مجلس الامه وبعدين اهي اصلا كلام مو عارفه تتكلم كله تتكلم مكسر
الدكتور : وشرايج بأسيل ؟
البنت : خوش وحده تستاهل الواحد يصوت لها
الدكتور : ليش شنو عاجبج بطرحها عطيني سبب
البنت : كلامها ذرب وهاديه وراقيه ولبسها حلو
الدكتور : وطرحها ؟
البنت: شلون يعني ما فهمت !!
يوتيرن "تتحلطم بينها وبين نفسها " : يا ليتج لو ما تتفلسفين !! انتي ويين والسياسه وين !! وبتصوتيين بعد ؟! لا بالله كدينا خير !

^^^^^^^^^^^^^^^^^

I think for now its enough

ماله داعي اكمل مع العلم ما خفي اعظم


My comment :
يا بنات ديرتي
يااااااااااااااااااااا بناااااااااات بعضكم مو كلكم
لا تصيرون امعات !!

من هو الأمعه ؟!
الذي لا يدرك من الأمر شيئا ولكنه مع من غلب

يقول الرسول صلى الله عليه وسلم: " لا يكن أحدكم إمعة يقول: إن أحسن الناس أحسنتُ، وإن أساءوا أسأتُ، ولكن وطنوا أنفسكم إن أحسن الناس أن تحسنوا، وإن أساءوا أن تجتنبوا إساءتهم "....


وفي مثل هؤلاء يقول الشاعر :

مَشَى الطاووسُ يوماً باعْوجاجٍ ... فقلدَ شكلَ مَشيتهِ بنوهُ

فقالَ علامَ تختالونَ ؟ فقالوا : ... بدأْتَ به ونحنُ مقلِدوهُ

فخالِفْ سيركَ المعوجَّ واعدلْ ... فإنا إن عدلْتَ معدلوه

أمَا تدري أبانا كلُّ فرعٍ ... يجاري بالخُطى من أدبـوه

وينشَأُ ناشئُ الفتيانِ منا ... على ما كان عوَّدَه أبــوه

ما قلت لا تلبسين !! ما قلت لا تشترين بلاك بري ! ما قلت لا تشربين عصير َ!! ما قلت لا تتكلمين بالسياسه ! ما قلنا لا تآكلين ...إلخ


بس خل يكون عندج رايي
فكري .. قبل لا تسويين شي
فرضي شخصيتج
مو ويين رايحين معاهم
مع الخيل يا شقرا !!>>> ما ادري هل اهو غباء او تقليد او ضعف
شخصيه


لا تخلين غيرج يقودج !!
ليما تسويين شي او تقولينه عطي سبب
قولي هالشي عاجبني انا عشان جذي بسوييه
مو تقولين غيري سوا عشان جذي بسوي

ترى صج الأمعه عاله على المجتمع !!
وصلنا حق حاله !! حتى بالتصويت هبـــــــــه
والله أصوت حق فلان الفلاني
لان الكل يقول عنه خوش واحد !! ويطالب بالإصلاح
الكل يقوووووول !! وانتي ؟ انتي شتقولين ؟!

أدري كتبت ووجهت كلامي حق بني جنسي يمكن لاني عايشه بينهم و اتكلم من تجربه !! وواقع اعيشه واشوفه كل يوم
فلا تلوموني !! من حرتي والله

صح ولا انا غلطانه ؟!


الخميس، 23 أبريل 2009

ايه ده هوه فيه كده

إزيكووم عامليين إيه بآلي اسبوع وعامين مش شيفاكوا :d
ايي والله ولهنا بس مو وايد:d
إيي صج ترى لا تحسبوني ناسيتكم انا متابعه بس وراء الكواليس :D

"أول شي أخوي mo3ath خطاك السو
وما تشوف شر !! عين ما صلت على النبي
بس لا يضيق خلقك وانا اختك السياره بدالها ألف
بس الروح ما تعوض بعدين ويين نلقى مثلك :]
قال تعالى : ( قُلْ لَنْ يُصِيبَنَا إِلَّا مَا كَتَبَ اللَّهُ لَنَا هُوَ مَوْلانَا وَعَلَى اللَّهِ فَلْيَتَوَكَّلِ الْمُؤْمِنُونَ ) (التوبة:51)"



"Najma عشان خاطر عيونج هاليوست ماكو أزرق "

موضوع البوست كله في part 1 اما part 2 حق الي له خلق يقراه يعطييه العافيه لان تعبت وانا انسق :] يعني الزبده حجي فاضي بس بطول البوست ما احب اكتب بوست بو حرفين بآخذلي دوره في بوست بو حرفين منو يعطيني ؟عشان ارتاح نفسيا ويصير لي خلق أكتب :d

^^^^^^^^^^^^^^^^^
Part # 1

اليوم الأحد:22 /3/2009
الساعه تشير إلى : 1:04 ظهرا
المكان : جامعة الكويت – كلية العلوم الإداريه
Class # : 214

أول مره أدخل قبل هالدكتور :p .. المهم قلت دام اني اول مره أدخل قبل الدكتور لازم أكمل إحساني .. وأصير خوش بنيه وشطوره وأبطل من سوالفي .. قلت بقعد بالسطره الثانيه بدال الأخيره ... وبنتبه وأكتب مع الدكتور بدال لا أدز مسجات حق أم مويضي :p ..,,!!
المهم رحت حق السطره الثانيه !!.. وحطيت ريل على ريل أنطر الدكتور ..!!




على طاري الدكتور "بدون ذكر اسماء " وبيني وبينكم اهو نوعه ( الله بالخير) !! يعني فيه مرض استخفاف الدم المليق !
الي "يقلب الجبد" وانتوا بكرامه !




ما طول عليكم السالفه .. دخل الدكتور .. وبما ان الكلاس (كلاس بنات ) فالعموم يمارس هوايته المفضله وهي التناقش بالأمور السياسيه والإقتصاديه والإجتماعيه وكل ما يمس المجتمع الكويتي من صله قريبه كانت أم بعيده :d
وهم مو هاذي سالفتنا

المهم إزعاج وأوادم تسولف من كل عاير ...!!
ما وعينا @@ إلا الدكتور كاتب على اللوووووحه
بداية الإسبوع بطلوا كلام !! أنا ها @@
وبكل اللغات المفهومه والغير مفهومه @@
عاد يوتيرن ما صدقت خبر @@ وقلت بقلبي " خوش سالفه ألزقها بالبوست بس لازم أوثقها.. امممم شسوي شسوي إيي خلاص بصور اللوحه !!"
وبما أن موبايلي إيكفي ويوفي
قلت بجكلي جكتين فيه ....

بيني وبينكم أول مره بحياتي أكره سوني أركسون وخاصه موبايلي @@ الفضيحه

ليش؟
أنا أقولكم ليش ؟!
جكيت اول صوره كل شي تمام



قص علي الشيطان ووسوس وقالي " هاذي مو واظحه ظلمه @@ صوري غيرها @@ عشان البوست !!"
انا قلت يالله شنو بضرني أصور غيرها
وصوووووورت ولا @@

يطلع فلاااااااااااش أقوى من فلاش كامرة شارع الملك فهد @@


عاد تعرف الشعور الي ليما تسوي شي غلط ومن التدوده يوقف كل شي فيك وما تتحرك !! جنه أحد كات علييك ماي بارد !!

جان يشوفني الدكتور وانا مجمده بمكاني
" في أيه يا بت @@ هو انا بلبل الخليج ولا أيه " أو جايز من جمالي عام بتصوريني " @@"

طبعا ويهي بدا يقط ألواااااااااااان @@
" آسفه دكتور @@ بالغلط كنت بدز مسج "
" هي هي هي ما عليش يا بنتي أنا عارف ! هوا من جمالي الي مأطع بعضوا عشان تخزيلي صوره @@"
" انا ها ها ها آ.... س...ف...هــــــ "
" بس ترى عزرك أقبح من دنبك "
أنا :" نو كومنت @@.."!!

والي يمي تقولي شنو بتآخذين الكورس الياي بآخذ كل موادي وياج تونسين @@ >> تحسبني هبله الظاهر :d
وحرمت أجتهد مره ثانيه وأدش مبجر و أشد حيلي زياده وأقعد جدام !!
يا زيني وانا وره كافه خيري وشري وأسوي الي أبيه ولا من شاف ولا من دري !!
بس بعد الطفاقه وما تسوي

ما علينا


The end :P
^^^^^^^^^^^^^^^^^^^^^^^
Part #2
اليوم الخميس : 30/11/2006
الساعه تشيير إلى :2:00 صباحا
المكان : مــن إرشيفي الخاص .

"رســـاله إلى من يهمها الأمر ..!"

حان الوقت لكي أعتذر لكِ...
نعم لكِ أنتِ .... أعلم اني لا أعرفكِ ولكن ! ..
اقترفت خطأ في حقكِ !!

أحببت من تحبين
لم أكن أقصد ولكنه أسرني بحبه من غير لا أشعرلا أعلم هل هو يحبني أم لا ؟؟
ولكن كل ما أعلمه إني أحببته ...أحببته بقلبي لا بعقلي ...أحببته دون ان اشعر ؟!؟
كان دائم الحديث عنكِ لم ينساكِ يوماً ....
كنت أحب وفاءه وإخلاصه لكِ!
كانت تسحرني كلماته .. طريقته بالحديث .. تفكيره ... وشخصيته !!

أعلم إنني أخطأت ولكن من دون قصد ...
أعلم إن الذنب ذنبي ....وأعلم إني إرتكبت جريمه بحقكِ ...
كان يقول لي انه متيم بحبكِ .. كان يقول إنكِ ملاكه... ولن يحب غيركِ ..
كانت كلماته تمزق قلبي !!
كان يجرحني ولكن لم يكن يعلم بذلك ..
وأكثر ما كان يجرحني ويؤلمني عندما يقول لي :إنني أذكره بكِ....؟!
كان يجرح كبريائي من غير قصد ...
كانت كلماته ...كالسهام ...تخترق قلبي ...

أحببته ... نعم أحببته ....
أحببته ولكن ... بعد فوات الاوان ؟!
أعلم إنكِ تحبينه ...ولا أعلم هل ستسامحيني على فعلتي أم لا ؟
.كل ما أعرفه إنكِ محظوظه ... محظوظه لأنكِ ملكتي قلبه ...

حان الوقت ... لكي أعتذر ..!
حان الوقت لكي أرجوكِ أن تسامحيني على خطأ أقترفه قلبي ....!!
حان الوقت ... لكي أريح ضميري ....
حان الوقت ... لكي تنهمر دموعي على رجل أحببته ولكنه ملك لغيري ..
حان الوقت لأضع لقلبي قوانين جديده..
يا من أحببت .....
أرجوك تقبل إعتذاري بالنيابه عن قلبي الذي أخطأ ..
يا من لا أعرفها ....
أرجوكِ سامحيني ... وسامحي قلبي الذي أخطأ ...
حان الوقت ...
أرجوكِ سامحيني....
The End =)

"Note : ترى هالكلمات انا كاتبتها صح بس الي عايشتها أم مويضي مو تبلشوني بالردود ومنو هذا وشسالفته :d " يعني أنا مليش دعوه


^^^^^^^^^^^^^^^^^^^^
جنه البوست صار طويل ولا يتروالي :d
يالله ما أطول عليكم :] .. كافي جذي اليوم
نشوفكم بالبوست الياي على خير ان شاء الله
إيي نسيت في سؤال صارله جم يوم يحوس بقلبي
صج الي يدخل مدونتي عنده إحساس إنه داش فلم رعب ؟



ولا إشاعات :d

يالله فمان الله

السبت، 7 مارس 2009

خرابيـــــط فنــــانه !!

في سؤال من كنت صغيره من يسئلوني إياه أتبلعم @@
ألا وهو " شنو هوايتج؟ "

أعتفس وأتوهق والويه يقط ألوان
ما أقدر أقول ما عندي هوايه !!
شلون كل الناس عندهم هوايه وانا لا !! ما يصير

فكنت إذا سألني أحد أتذكر إلي كنت أقراه بمجلة "ماجد"
فأرد بكل فخر " هوايتي المراسله والمطالعه وجمع الطوابع " @@

كبرت شوي وكبر مخي معاي
وقمت أرد وأنا أضحك وأقول بقلبي " شخباري منو يسأل هالسؤال "
وأجاوب بكل أستهزاء : هوايتي النت and watching T.V

وهم كبرنا !!
وللحين الناس تسئل نفس السؤال !!
ما قمت أعرف أجذب !!
إن سألوني رديت وانا عافسه الويه " الصراحه ما عندي هوايه.. الي يعجبني اسويه " !!
يا ربي شسوي مو فالحه بشي لا بالرسم .. لا بالطبخ ولا حتى بالخياطه !!
ماكو هوايه !! ايي ايي ماكو هوايه

ليما بيوم من الأيام و إحنا قاعدين بالبيت !!
وفجأه وبدون سابق إنذار حذفوا علي الكامره @@
وقالولي صورينا ...,, أنا بهذاك الوقت كان إحساسي جنها قنبلة موقوته بحضني
ورديت بكل برود " وانا شعرفني !!@@ هاذي شلون تصور !! أي دقمه أرعص !!... إنزين إنزين فهمت يالله أوقفوا "

وجك ... صو َرت الكامره
" والله يطلع منج U-Turn @@ خوش صوره "
أنا: "ها !! أي صوره @@ أشوف أشوف ..لا إيي زينه !!"

ومن ذاك اليوم حبيت التصوير ... مو لاني أحس روحي فنانه ... لا لا لان تصويري لكم عليه شوي :d
بس لان الحين إن سئلوني شنو هوايتج بجاوب وانا شاقه الحلج " هوااااااايتي التصوووووووووير "

ما بغيت ألقى شي أفلح فيه غير التحلطم !!

وهاذي خرابيطي !!
لأول مره أعرضها لكم :]
أدري إنها " مو أد المأآم " بس تمشي الحال :d
(1)

حسبت اشواقنا غابت .... وأثاري الشوق تو مافاق
وأثاري بقلبي الساهي ... حنين لك بعد باقي


******************************************************
(2)

i dream of..!


being a fireman ..

*************************************************

(3)

لو سألني الورد عنك علميني ايش اقول .. وان وصفت اول جمالك كيف ابوصل آخره


************************************************
(4)

kuwait panorama

*************************************************
(5)

يا "ورد "من علمك تجـــرح ,,الجـــرح ماهو من أطباعك

**************************************************

(6)

يا نار شبي من ضلوعي حطبكي .. صابر على نار الموده و مذلول

***********************************************
(7)

لحظة غروب الشمس والفكر محتاس.. في بحر دنيا كلها للفنايا

***********************************************

(8)

studying = headache

**********************************************

(9)

تدري انا وياك قصتنا مثل شمس وقمر..من اول الوقت حتى اخره مايلتقون

**************************************************

أتمنى تعطوني رايكم !! .. إذا في نقد بناء أحب اسمعه بصراحه :d بس لا تزيدون الجيله

يعني المبتدىء يبيله تشجيع :d

ان شاء الله عجبكم البوست ؟!!

البوست الياي ان شاء الله بكون شوي داثر :d

إلى اللقاء إلى ذلك الحين :]