الثلاثاء، 27 مايو 2008

كنــــت ..."منــــهم"!!


مسَاكم الله بالخير
والنويَــــر !


بيني وبينكم ...كنت منهم !!
كنت كله أحكم على الناس من أول مره أشوفهم .. من أول كلمه يقولونها !!
أحكم من مظاهرهم
!!

أذكر اول ما دخلت الجامعه .. وأول كلاس دخلته ..قعدت يم وحده كانت ماده البوز شبريين @@
جان أقول بقلبي ويي الله يعيني أنا ويين قعدت !! شكــلها قــــشَـــره وما تتحاجه وشكلي ببتلشت فيها
بس بعد جم يوم بدت تآخذ وتعطي وياي .. وطلعت خوش بنت وطلعت ظالمتها..يمكن بذاك اليوم كان عندها شي او متضايقه من شي عشان جذي كانت مبوزه :] ... وقلت بقلي انا ليش كله مطيوره وأحكم على الناس بسرعه
!!

ومن ذاك اليوم غيرت هالشي فيني وبدييت ما أحكم على الناس من أفعالهم او مظاهرهم ...بديت أشوف وأدرس هالناس والزين أقربه مني والشين أوخر عنه :)

والحين قمت أستغرب من الناس الي يحكمون على المظاهر أو حتى من اول كلمه تنقال !!
الواحد لازم يفكر مره ومرتيين وثلاث قبل لا يحكم على خلق الله
يمكن في ناس يشوفون وحده سفور ويقولوون ويي هاذي ما تستحي !! أو حتى يشوفون وحدة لابسه عباة ومحجبه ويقولون هاذي خوش بنت !!
وفي ناس بعد يحكمون من المواقف ... يعني مثلا هاذي سلمت على واحد على طول قالوا هاذي ما تستحي @@
يمكن أخوها ..ولد عمها يصيرلها !!
ليش تتسرعون بالحكم وتستاثمون فيها
؟


المهم
...
الي خلاني اليوم أتكلم عن التسرع بالحكم على الأوادم قصة هالبنت
يقولكم في يوم من الأيام ...هذيك البنت كانت قاعده مع رفيجاتها بمكان عام .. عاد ويين؟ الله أعلم! ...
المهم..
الطاوله إلي مجابلتهم كان فيها شباب قاعدين !!
خالد وبدر ومحمد
والبنت كانت مجابله بدر وخالد ومحمد معطيها ظهره
:p

المهم...
خالد : بدر تشوف هاذي البنت الي ماتت وإهي تخزك !!
بدر : إيي بس أنا قلت يمكن قاعد أتوَهم :S
أخاف البنت قاعده إطالع شي وراي !!
محمــد: وين وين ؟؟ أي بنت ؟؟
خالد : هاذي الي قاعده بالطاوله إلي جبالنا!!
محمــد: إيي والله @@... شعلييك بو ناصر عاد ترى مملوحه !!
بدر: إذبحتني ما أحب أحد يخزني وأنا آكل !! المشكله أكاسرها بعيني ولا تشيل عينها @@
شنو ما تستحي هاذي ماكو حيى .. ماكو غيري بهالمكان يعني !!
محمد: بدر سو روحك ثقيل وما تعطي ويه ... وجنه مو هامك
خالد : إيي إيي إحقرها ..!!
بدر : عاد والله ما همتني خلها تخز لين تنعمي عينها @@
محمد: عاد ما خزتك إلا إنت @@ الله يعينها شفكها من لسانك :D
خالد:هاهاهاها...إيي والله صاج الله يعينها !!الحين بيَسطر فيها قصيده :p
بدر: إيي والله... أنا أعلمها ..بكتب فيها جم بيت عشان تتعلم
!

وقال في هالبنــت:

كل شبر بهالوسعيـه ملـك ربـي تعلميـن
وأعلم إن اللي خلقني هو خلق لـك هالعيـون

لكن انتي من جلستي وانتـي فينـي تحدقيـن
كن ما به ناس غيري بهالكراسـي يجلسـون

لو سمحتي عاد سمعي وحتى لو ما تسمحيـن
المهـم اللـي بقولـه تسمعينـه و يسمعـون

ع الأقل لين نظرتك سـوي روحـك تستحيـن
غضي طرفك مثل غيرك خوف ربعي يلمحون

الركادة عاد زينة والحياء فـي البنـت زيـن
وفيـك جآزم لا ركـادة ولا حيـاءٍ يـذكـرون

تعرفينـي ؟! أعرفـك ؟! ماأذكـر إنــا ملتقـيـن
لا أعرفك من تكوني و لا تعرفي مـن أكـون

وإطمأني إن كان قصدك بس فينـي تشبهيـن
ما هـو أنـا إلي تعرفيـه والبشـر يتشابهـون

مـا دريتـي من التشابـه يخلـق الله أربعيـن
وأعرف أربع يشبهنك بـس والله يستحـون

وإن كان قصدك شي ثاني عاد قولي وش تبين
خايف إنا نصير فرجة وإللي ماشترون يتفرجـون

وإذا ببالك عاجبتنـي لا يحوشـك تحلميـن
صح ربعي من جمالك فيـك صـار يمدحـون

بس وش لي في حلاتك دام فيهـا ترخصيـن
حشمة البنـت وحياهـا والكرامـة يلفتـون

ولو توفر فيك هـذا مـع حلاتـك تبشريـن
ما هو أنا ألف غيري بـاب بيتـك يطرقـون

وش علامك رغم كل اللي أقولـه وتسكتيـن
مو طبيعي هالسكوت وهالبـرود وهالسكـون

إنتـي خرسـا أسألـك ولا منتي تسمعيـن؟؟
قالوا ربعي ذي كفيفـة قلـت لا لا تمزحـون

لين شفتك يوم رحتـي يمسكونـك باليديـن
ما دريت إلا عيونـي أربـع أربـع يذرفـون

آه ياني منه مشهـد يـوم شفتـك ترحليـن
جيت اشوف عيون ربعي لقيت الكـل يدمعـون

قلت سنّـة هالحيـاة وحـنا ترانـا مؤمنيـن
الله اللـي مسيّرنّـا بيـن كافـ وبيـن نــون

وكل أبونا نختلف مع إننا مـن أصـل طيـن
سبحان يلي مصورنا ولله في خلقـه شـؤون

يعني حنا كل أبونـا عـاد إسمنـا بنادميـن
وليا قضى ربك أمر وقـال لـه كـن فيكـون

فينـا يلـي رازقه خيـر رب العالمـيـن
وفينا يلي هو لعطفه بحاجة القلـب الحنـون

وفينا يلي مـا شكـى مـن علـةٍ كالآخريـن
"صـمٌ و بكـمٌ وعمـيٌ فـهـم لا يفقـهـون"

بس قليل عـاد فينـا للنعـم هـم شاكريـن
والله يرزق هالخلايق من حيث هم لا يعلمون

وتدري عاد يالكفيفة حنا تراى متشابهيـن
وإن ماانعمت أبصارنا قلوبنا هـم إللي يعتمـون

يالكفيفة يالعفيفـة إن قلـت آسـف تقبليـن؟؟
يغفر الله ذنوب عبده ليا خطا وهـل تغفـرون؟؟؟؟

إيي طلعت البنت عميه @@..الله يكافينا ويكافييكم الشر
والولد حكم عليها على طول @@ إنها تخز وما تستحي
!
المغـــزى من الموضوع
"لا تستعجـــل يا بني آدم بالحكـــم"!!


للأمانه الكتابيه... القصيده مو قصيدتي طبعا :D
بس القصه من وحي خيالي :)

وحياكم الله :]

الثلاثاء، 20 مايو 2008

"..نهـــايــة.." هــذه "..الحيــاة.."!!

مســـاء الخيـــر ...,, وصبــحكم الله بالخيــر !!
مــزاجي اليــوم " مُش ولا بــُد " ... أحاتي وايــد لأن يوم الخميس عندي فاينل ويوم الأحد ويوم ويوم .... إلخ :S
يالله ما نقــول إلا الله كــريم
كل شــي يخــلص بهالدنيــا :)
**************************************************
عنـــدمـــــــــا تكـــــون ..,,،،كلمـــاتي ،،,,..
مجـــــــــــــرد
..,,؛؛نــــــــــــــــزف؛؛,,..!!
^
^
^
^
إنهـــا النهايـــة ؛؛…
حَيـــاة كـَــانت تـَجمعـُــنا….,,،،

أنـــا أعــرف .. وأنتَ تعـــلم إننـا لا يمـــكنْ أن نتفــاهم بعــد الآن..‘‘!؟
فماذا لديـــكَ لتَقـــولهُ لـــي..،،؟!
مـــاذا لديـــكَ لتفسـْـــرهُ لــــي..،،؟!

لـــن أسمـــعكَ بعـــد الآن ..؛؛!!
إنـْــها نهـــاية هـــذه ِ حـَيـــاة …،،
هـــذا الحـُـــبْ…،،
هـــذا العُــمر الذي قـَــضينــــاهُ معــــا ً …،،

تـُخطأ وأغـْــفرُ لــــكَ…،،
وتـُعيــد خـَطئــكَ وأســـامحــكَ…،،
ولكـْــن إلــى مَــتى …؟؟

هـــل جـَميـــع الأسبــاب غيـــر مـُقنــعـَه بالنســـبةِ لـــكَ..؟!
هـــل جَمـــيع أعــذاركَ غـــير مـُقنـــعـَه بالنســـبةِ لـــي..؟!
لا أعــــــلم…؛!!
ولكـْـــن الذي أعـــلمـَـهُ إنـْـهُ لا حـَيــاة لنــا معـــا ً..،،!

مـــن ألــمْ قـَلبـــي الذي قـَتــلتــهُ بــين يديـــك..!!
أتمنـــى أنْ أصــرخ ..،، أنْ أدعــي عليـــك..!!
ولكـْـن لي قـَلـــب رغــمَ جـــريمتــكَ ما زال يـُحْــبُـك..؛؛!

أحبـَبْـتـُــكَ..؟
نعـــم..،،أحبـَبـْتـُـكَ بكـُل ما بـي من مَـشاعـر..!!

سكـَنـْـتَ قـَلبـــي..؟
نعــم..،،ولـــم تـَتـرك فـَراغـــا ً لغـَيـــرك..!!

شـَغـْـلت عَــقلــي ..؟
نــعم..،،فـلم أعـُد أفكــر إلا بــــك..!!

ملئــــتَ عـَينـــي ..؟
نعـــم..،،فلـم أعـُد أرى ســــواك..!!

هـــل كـُنـــتَ إنســـانـــا ً..؟
لا…،، بنــظري كـُنـــتَ مــــلاك..!!

الآن …؛؛ لـــم تـَعـُد تهـمـُنــي ..!
إنـــتهــت الحـَيـــاة التــي كــَانتْ تجمعــُنــا ..،، ومـــا أصعــبْ اللحظـــات مــنْ غـَيـــرهــا..؟!
ومـــا أصــعبْ اللحظـــات بـِـــها
..؟!

أنــا مُقــتنعه وسعيــدة بالألـــمْ بعــدكَ..،،
اتـــركنـــي .. فـَلم يــعُد هُـنــاك شــيء لكــي أخســرهُ بعــدكْ..!

اذهـــبْ واتــركنـــي..؛؛
فـــلم أعـُد أريـــدُ قـَــلبــي..،،!

نعـــم..‘‘ إنــها دَمــعتْ عـَيــني ..،،
ولكـْــنها إنــهَـمرتْ بالخطـــأ..،،!!
فعـَـيني لـــمْ تدمـَــع على من لا يستـَحق دَمعــتها قـْط..،،!؟

فحـــان الوَقــــتْ…؛؛؛
وانتـــهـــى الإنتـِـــظاآآآر…،،!

إنـــها النهـــــاية..،،,,
نهـــاية الحــَيـــاة التي كـُنــتَ بهـــا روحـــي ..،،!!

وبـــداية العَيــــش بجـَــسد بـــلا روح..؛؛!؟

الأربعاء، 14 مايو 2008

إلــــى رحمــة الله ..,, الأميـــر الوالـــد !!


الى رحمة الله تعالى
عظم الله اجر شعب الكويت
بالمرحوم المغفور له
الشيخ سعد العبدالله الصباح
اللهم اسكنه فسيح جناتك
اللهم اغفر لأبائنا وامهاتنا الذين شهدوا لك بالوحدانية ولنبيك بالرسالة وماتوا على ذلك...
اللهم اغفر لهم وارحمهم.. وعافهم واعف عنهم.. واكرم نزلهم .. ووسع مدخلهم..
واغسلهم بالماء والثلج والبرد.. ونقهم من الذنوب والخطايا كما ينقى الثوب الأبيض..
اللهم جازهم بالحسنات إحسانا.. وبالسيئات عفواً وغفرانا..
اللهم أنزل على قبرهم الضياء والنور.. والفسحة والفرح والسرور..
اللهم أنزل عليهم بردا وسلاما.. اللهم انقلهم برحمتك من عتمة القبور..
إلى نور وسعة الدور والقصور ومن ضيق اللحود الى جناتك جنات الخلود ..
في سدر مخضود.. وطلح منضود.. وظل ممدود.. وماء مسكوب..
وفاكهة كثيرة.. لا مقطوعة ولا ممنوعة.. وفرش مرفوعة ..
اللهم لا تحرمنا اجرهم ولا تفتنا بعدهم واغفرلنا ولهم .... اللهم اجعل قبرهم روضة من رياض الجنة
.. اللهم بيض وجههم.. ويمّن كتابهم.. ويسر حسابهم.. وليّن ترابهم.. وطيب ثراهم..
وثبتهم على الصراط.. اللهم اجعلهم يمرون على الصراط كالبرق الخاطف..
اللهم اظلهم تحت ظل عرشك.. يوم لاظل إلاّ ظلك ولا باقٍ إلاّ وجهك..
ولا تحرمهم النظر إلى وجهك الكريم.. والشوق إلى لقائك..
اللهم احشرهم تحت لواء نبيك محمد صلى الله عليه وسلم..
واسقهم من يده الشريفة الطاهرة.. شربة هنيئة مريئة.. لايظمؤون بعدها أبدا..
.. اللهم اجعل القرآن العظيم شفيعا لهم في قبورهم.. وشاهدا لهم في الآخرة..
وحجة لهم يارب العالمين.. اللهم اجعلهم من السبعين ألفا الذين يدخلون الجنة بغير حساب..
اللهم اسكنهم في الفردوس الأعلى من الجنة مع نبينا و حبيبنا محمد صلى الله عليه وسلم..
اللهم اسكنهم في قصورها.. واسقهم من أنهارها.. وأطعمهم من ثمارها..
اللهم اخرجهم من ذنوبهم كيوم ولدتهم أمهاتهم.. واعتق رقابهم من النار..
اللهم اقض عنهم كل دين.
اللهم أبدلهم دارا خيرا من دارهم .. وصحبا خير من صحبهم ..
واجعل لهم من بعدهم صدقة جارية .. وعلم ينتفع به .. وولد صالح يدعو لهم من ذريتهم بخير إلى يوم الدين ..
واجمعنا بهم في الفردوس الأعلى من الجنة .. برحمتك يا أرحم الراحمين
الله يــرحمــك يـــا بــابــا "سعــد" رجــل والرجــالُ قليـــلُ!!
ومــن هــذا المنــطلق تعــلن مــدونتــي الحــداد الرسمـــي لمــدة ثلاث أيــام !!




الأحد، 11 مايو 2008

وأخيـــراً..,, شــي ما قريـــتووه!!

مساء الخير ... وصباح النويير

أدري تأخرت على ما نزلت البوست .. والسموحه من الجميــع بس شنسوي الدنيا ومشاغلها
:p المهــم ...

مقدمــه لا بــد منها " لتفــادي اي شي غير متوقع " !!

تعــرفون ليمــا تسوون حق شي دعايه وتتوهقون !! تصير ردت فعل الجمهور أكثر من المتوقع @@بالضبط مثــل "مهرجان هلا فبراير !!" ليما نشــوف الدعايات نقول فبراير هالسنه أكييد غير وننصــدم فيه وبالإفتتاح ما نلقى غير شخصية ماروكو مالت السنين الي طافت تحــوس مع المذيعيين :D
هذا الي صار وياي كنت حاطه بوست في بالي وقلت بسوَق له بس إنصدمت بردت الفعل :p
المهم .. سألت روحي شنو الشي الي أقدر اكتبه ومحد قراه من قبل ؟
ولقيــت هالشــي...,,!!
إيي لا تستغربون شي لا انت ... ولا اهو .. ولا انتي ... ولا اهي قريتووه !!
تــدرون ليــش لان واقــع أعيــشه أنــا !!
شــي يمكن وايد يحسون فيه مثلي .... بس أنا غيير !!

ربمـــا تتشــابهه النهــايات ولكنــها بالنهــايه ... تختـــلف !!

طول عمري وحياتي الشخصيــه شي خاص فيني ..,,مشكــلتي...,, حق كل شــي أحط حدود !... صداقاتي .. أهلي .. أمي .. أبوي .. أخواني ...حيــاتي ... حيــاتهم ...دراستي .. علاقاتي الإجتماعيه !!
المهم مو هذا موضوعنا

اليوم بتكلم عن شي فيني وفي غيري بس مثل ما قلت كل واحد يختلف !!

مثــل كل إنســان .. أكيــد أغلط ووايد بعد مو شوي "أزعل أمي !!.. أضايق أبوي وأرد أتأسف .. أعصب على أخــوي .. آخذ بخاطري على أتفه الأسباب .. يزل لساني وايد.. أزعَل هذا وأزعَل هذييك .. يمكن أقول شي ويفهموني غلط ... إلخ "

وما أستحي إني أغلط !!
لاني أغلط بس .. أتعب عقبها وايد... وأتعلم ..
ما سمعت !! تقول ليش؟؟
أنا أقولك ليش؟

لأني فيني طبع مره أحكم عليه أنه نعمــه ومــره أقول إنه نقمه
شلون !؟
من أحط راسي على المخــده أفكر شسويت اليوم كله .. شقلت حق هاذي وشقلت حق هذا !!
تصرفي صح ولا غلط !!
ليش عرييت على هذا بالسياره "والله لهدرجه"
أدري ان البعض بيحكم وبيقول مرض بس شسوي هذا شي فيني وما قدرت أغيره
بمجرد إني أستوعب إن في شي زعل أحد مني إييني أرق وما أقدر أنام
يعورني قلبي !!
يأنبني ضميري !!

وخاصه إن سويت شي يخلي أمي وأبوي يزعلون أو شي أدري انه ما يرضون أسوييه
بس هني يستلمني " تأنييب الضميــر"

مره سمعــت إن هذا شي زين إذا كان عندج " نفــس لوامه " وإن هذا من حب الله لج
!!والله أعلم :]

يمــكن هالكلام ما يهــم البعــض ويمكــن البعض بيقول هاذي شفيها فاضيه !!

بــس الكلام الي كتبـــته نابــع من تجــربه شخصيــه ... وخاصــه فيني
ايي سويت شي غلــط وندمت عليــه بحياتي !! مو شي أشيــاء !!
يمكــن الغلط الي انا اشوفه كبير اشوفه من خلال إطار البيئه الي عشت فيها ..؟
يمــكن غيري يشــوف الشي الي سويته شــي عادي !!

غلطـــت وتعــلمت ..,, وكل صطار بتعلومه !!,,,
وللحين أغلط وأتفادى غلطاتي الي طافت !!


خــــلاصة الحــجي !!
والزبـــــــــده مثــل ما يقولون
الواحد حــلو يحاســب روحه
حـــلو إنه يعترف بغلطه
حــلو إن يتأســف إذا غلط
حلو يفكر يكون عنده ضمير ينبه
حلو ان يغلط ويتعلم وما يعييد الغلط
حلو ان يتعلم من تجاربه الشخصيه

كــلام من قلبـــي نقلتـــه لكــم
وأتمنى إنكــم إستفدتوا .. حتى لو بشي قليل
قـــلت كـــلام قلبـــي أحـــلى شـــي مــا قريتووه صح ولا انا غلطانه :)
ماكو كلام أحلى من قلــب يبي الخيــر ومافي مصــلحه من ورا كلامه
وبالخـتـــام مــاكو أحـــلى من الســلام
شـــي ما قريتــــووه حـــادثــه لــن تتكـــرر:D
بــــس هاذي مقــدمة شـــي ما قريتـــووه :p
يتبـــع ..,,,



"بـــــــــوح قلبي "... شـــي ما قريتــــووه :]
عشـــان أكســـر فضــول البعــض شـــي ما قريتووه ...
خــاطره أنا كاتبتـــها ,,.. عــن تجـــربه وخطــأ شخصـــي تعــلمت منــه أشيــاء وايــد !! غيـــر أشيـــاء وايد فيني!!


وللحديـــــــث بقيـــــــــه...!!

الأحد، 4 مايو 2008

حلــم ..؟؟ .... يمكـــن يصيـــــر !!


بهالبوســت حبيت أغير شــوي ..,,
وأكتــب شي ما كتــبته ..
ونكســر الروتيــن شوي ..,, قبل لا أنزل شي ما قريتووه إلي توهقت فيه
;p

المهم بالموضوع الحيين إني فكرت وفكرت شكتب
.. شقول !
وسرحت شوي ..وإذ بي أدخل عالم الخيــال اللا مــحدود
..
قــلت بكتــب حلم يقظــه
..
بكــتب قصة وحده "بس أكييد مو أنا
"
ما ادري صــارت من قبل او لا .. الله يعلم يمكن تصيير ليش لا ولو اني ما اعتقد
!!
المهم ,,,

بكتــب حلم شــاب أو شــابه..يمــكن حقيقه..أو خيـــال..
يمــكن تكــون قصــه تعيشهــا أنــت في يــوم من الأيــام
!!

تنــويه : بكتــبها بلســان " أم مويضي" بــس القصــه لا تمــت لي بأي صــله

تقول "أم مويضــي": نفس كل بنت بعمر 21 سنه كانت عندي أحلام كبيرة .. وأذكر أيام الثانوية كانت أكبر أهتماماتي " طلعات مع رفيجاتي.. سوالف الثانويه "هاذي سوَت وهاذي حطت.. وشطانتها.. يمعتنا مع بعض ودراستنا" لي آخر سنه لي فيها .. قمت أفكر بأشياء ثانيه بحفلة التخرج .. وبنهاية هالمرحله وبداية مرحلة يديده..بداية حياتي الجامعيه ..شلون بتصير ؟ .. وشنو التغيير الي بصير؟ راح أتأقلم بهالمرحله أو لا !!

المــهم أول ثلاث سنين أنقضت وأنا بالجامعه كانت شي يديد شي غير !!.." محاضرات..دكاتره.. استقلاليه ..حرية تعبيــر..وصلاحيات وايد.. والأهم سيارتي وأنا الي أسوق مو سايق"..
آخر سنه لي بالجامعه بديت أفكر بنهاية هالدرب وبدايه مرحله يايه مهمه .. قمت أحاتي .. متى بيلي النصيب ؟ ومتى بتزوج ! وشلون .. ومنو بيكون .. وشلون شكله.. شخصيته ..إلخ ؟ وكل ما طاف الوقت كل ما بديت أخاف إن يطوفني القطار "مثل ما يقولون"

المهم في يوم من الأيام وفي آخر سنه لي في الجامعه و تحديدا عقب آخر محاضره بهاليوم .. وأنا راده البيت وكانت حالتي يرثى لها " تعبانه.. ودايخه .. سرحانه .. ومومنتبهه.. وبالي بعيد.. بالي بالغدا وشنو طابخيين..وأقول بقلبي يارب مجبوس دياي لاني ميته من اليوع"

المهم وانا راده من شويخ ومتوجهه حق العديليه ... وقفت بالإشاره المعتاده وكان جدامي "جيب بورش أبيض ..كايين مثل ما يسمونه.." , رفعت عيني ولا الإشاره خضـراء اللون .. وبما أني مطفوقه بطبيعتي ومستعيله على غير سنع !! حطيت ريلي على البانزين من غير ما اشوف جدامي .. ودست بانزين.. شوي ولا انا داشه بالسياره الي جدامي..من قــوة الطقه ..هزيت السياره هز..

المهم إني أخترعت وما عرفت شسوي .. توني ماسكه التلفون بدق على المنقذ أخوي وإذ بإثنين ينزلون من السيارة .. وإلي كان يسوق درعم صوبي وويه حده أحمر ومعصب !! شوي ويفجر فيني
وقف عند دريشتي ..فتحت الدريشه جان يهب فيني "إنتي عميه ما تشوفيين؟ الله يهداج في أحد يدعم جذي ؟فتحي عينج قبل لا دوسيين "...ما تشوفون إلا أنا اهني أخنقتني العبره وبدون لا أحس إنزلت أدموعي حان أقوله وانا" اتنهوص" لاني قاعده أبجي:"سامحني أخوي ما أدري !!".. مسكين أهوه أهني تغير ويهه وقالي:" سامحيني أنا ما أقصد..بس سيارتي توني مطلعها من الوكاله "عاد الولد صاج السيارة بقراطيسها"..بس يبــه خلاص بالحديد ولا فييج خلاص لا تبجيين"...ما أدري ليش حسيت بشي غريب "ماني قاصه علييكم واقولكم سوالف أفلام سعاد حسني وأحمد فهمي وحب من أول نظره وما ادري أيش" لا حسيت أنه خووش ولد ومحترم حيل وما أغبي علييكم والحق ينقال الصراحه الولد كان مملوح بعد :p
المهم دقيت على أخوي .. وصل وكلمه.. ما رضى ندفع شي .. وقاله:" كافي سلامتها ومعرفتكم".. وقام يسولف مع أخوي بالشارع وخذوا أرقام بعض.


المهم.. رديت البيت وخذيت محاضره من الوالد الله يخليه ويطول بعمره .. بس طول الوقت كنت بعالم ثاني .. كنت أفكر بالي صار !! ومستغربه شلون في أحد جذي بهالزمن.. وكأي بنت بدت وياي أحلام اليقظه ..ونمت بليل وانا أحاول أقنع روحي ان إنسان محترم ..متخرج ويشتغل بشركه خاصه إلي كونها بنفسه..!! مع إن شكله عمره صغير وبجماله وجمال أخلاقه أكيد بيختار بنيه حلوه.. جسمها يعقد.. معني ما فيني شي جني البخت ومملوحه "بس ماكوو ثقه"!:D
المهم نمــت وانا أقول حق نفسي خليه بس حلم ... ولا تحاوليين تقنعيين روحج إن هالإنسان ممكن يصير من نصيبج بيوم من الأيام !!


بعد شهر إلا يوميين تقريبا... أبوي ناداني عنده بالدار وقالي:" يابنيتي في واحد متقدملج وخوش ولد الكل يمدح فيه"... وليما قالي فلان الفلاني أنصدمت .. وطقتني البوهه بويه الوالد@@... ما صدقت .. يمكن ربع ساعه على ما استوعب ..قالي أبوي "ها شرايج ..بالموضوع".. أنا وأنا مستحيه وويههي أحمر من الإحراج :" الراي رايكم انت وامي .. والي تشوفون ان فيه مصلحتي بسوييه ..وبقلبي أقوول يبه من صجك أكييد إيي بدون لا تسأل "


المهم قــابلته وفعلا كان نفس الشخص إلي دعمته...
الشخص إلي كل بنت مهما طلبت وتمنت تلقاه بهالإنسان ... الحمد الله ربي عطاني على قد نيتي (قال تعالى في سورة النور{الْخَبِيثَاتُ لِلْخَبِيثِينَ وَالْخَبِيثُونَ لِلْخَبِيثَاتِ وَالطَّيِّبَاتُ لِلطَّيِّبِينَ وَالطَّيِّبُونَ لِلطَّيِّبَاتِ أُوْلَئِكَ مُبَرَّؤُونَ مِمَّا يَقُولُونَ لَهُم مَّغْفِرَةٌ وَرِزْقٌ كَرِيمٌ}
صدق الله العظيم ).... عطاني إنسان إلي فعلا يحبني ويخاف علي وشاريني بكل ما عنده.. في النهايه ملجنا وتزوجنا.. وكانت حفلة العرس شي مو طبيعي جنه من ألف ليله وليله ..وانتهت قصة حياتي ..وبديت قصه يديده مع إنسان أصبح كيــاني !!

......................................................................................
بالنهايــه .... نشكــر "أم مويضي " الي زارتني وخلتني أحلم معها هالحلم!
عــاد يا بنات مو باجر كل وحده داعمتلها واحد عنبو بتتزوج :p
ويحطون البلشه علي:D


الشاطر الي يقول جم مره قلت .... المهم..؟ :p
,,,,,,,,,,,,,,,,,,,,,,,,,,,,,,,,,,,,,,,,,,,,

البــــوست اليــاي إن شــاء الله "شــي ما قريتــوه" ;p

لاتحطون ببالكم إن شــي خيــالي عشـــان ما تنصــدمون:D