الاثنين، 29 سبتمبر 2008

عيــــــــــدكم مبــــــــــــــــــارك =)


صباح النوط الحمر
ومساء الدينــــار


عيـــــــــــــدكم مبـــــــــــــــــارك


وعســــــــــــاكم من عـــــــــــــــــــواده




ينعـــــــــــاد عليكـــــــــــم بصحه وعـــــــــافيه




يالله كـــــــــل واحد يصـــف دور عشـــان يآخذ العيــــديه

ومــــــــــــن سبق لبــــق ,,, إلي إيي مبجر راح يآخذ نوووط وإلي إيي متأخر مــــــــــاله إلا الخـــــــرده :d











الخميس، 25 سبتمبر 2008

شسالفه شنو هالشي !... ماكو شي ؟ ... صاير شي .. هذا شي .. لا لا هذا مو شي !!


تحديـــــــــــــث

آلمني قرار رحييل المدون العريق والمتميز أخوي "حسافتج يا كويت "

يعطييك العافيه.. وعساك على القوة .. الله يوفقك أخوي

كنــــــت خير سنــــــد للكويت وشعبها

وكــــــان قلمك الونييس لنا ..,,

كان يثلج صدرنا وإحنا بقمــة الحره والحسره

كلمات الشكر والعرفان ما توفى ربع من فضل قـــلمك

أخوي طلبتك ..,,

فكر مره ومرتيين وثلاث

ما يهون علينا غيــاب قلمـــك ...

وخسارة مدون من أفضل وأرقى المدونين سواء بالتعامل او بالكتابات

XXXXXXXXXXXXXX


صباح الشي والمو شي
مساك الكل شي


اليوم البوست شي بس مو أي شي !!
انتوا فيكم شي !!
انا ما فيني شي ؟

>>صـــــــــاير شي !! أحد فيكم ســـامع شي !؟<< من أحلى القصايد الي قريتها لأخونا ولد الصلال :d الصراحه شي شي عجيــــــــبه واااااااايد شي
تعـــــــــالوا نشوف سالفة هالشي ؟

يقولكم صاحب الشي :

فيكم شى !!!صاير شى !!!

احد فيكم سامع شى

طيب احد شايف شى

قارى شى

يعنى كلش ماكو شى !!!

طيب ماشى هاليومين .... احد فيكم حس بشى

ياخى تحس الديره ... يعنى جنه صاير فيها شى

لما تطالع تلقى بوسط عيون العالم اميه شى

ولما تسالك اى واحد يقولك

فكنى ماكو شى



طيب قولى ليش معصب !!!

يقولك ياخى ماكو شى

يمكن صج مو صاير شى

مو انا قلت من الاول .... ماكو شى

لكن لا لا مو معقوله

ياخى مبين صاير شى !!!

طيب دام ان ماكو شى

خلونا نسولف ونخربط

يعنى نسولف فى اى شى

نتوكل بالله سبحانه ويحمبنا الله من اى شى



فى ناس تعيش وودها بـــ شى

و ناس تموت تحصل شى

وناس يذلها الوقت وتصبروبالاخر ماتلقى شى

وناس لشى تبيع اى شى

وناس لشى تدفع اى شى

وناس تموت بظلم الناس

وناس تحب تذل الناس

وناس تعيش بفقر .. وهم ... ومحد يدرى عنهم شى

وناس تبوق الديره وتمشى ... ومحد يكتب عنهم شى

وناس تحب تاخذ كل شى

وناس تنام بحلم صغير

وتصحى وماتلقى اى شى

وفى واحد يعطيلك كل شى

وتلقاه ماعنده اى شى

وواحد ياخذ منك شى

واهوا عنده اميه شى

وواحد واطى لكن واصل

وواحد منصب لكن فاصل

وواحد هيبه واسم ومركز

واهوا مايسواله شى



للحين احنا قلنا شى

اقصد خربطنا او شى

مو احنا قلنا من الاول

انه مو صاير اى شى

طيب ليش الشارع زحمه وتحس انه ناقص شى

والمستشفى تروح بشى وتطلع وعندك اميه شى

والمدارس ... ترس الديره لكن مافيها اى شى


ومرات يوقفون الماى

وقطع مبرج رايح جاى

ونسلف اهل بروناى

والديره مافيها شى

ويقولك فى بالديره شى

صاير سعره اميه وشى

والشى متروس بهالديره

وباعوه وماشفنا شى

اقصد يعنى شالى تغير

لما سعر الشى تغير

فى هالديره تغير شى !!!

مافى شى !!!


الشوارع نفس الشى

والنوادى نفس الشى

والجمعيه صرت تروح

وماتقدر تاخذلك شى

والرياضه بس هواش

واثنين اهما فى هالديره

وكل واحد ماسكله شى

وهذا يطلع يكتب شى

وهذا يرد يقولك شى

والفيفا ابتلشو ويانا

وشى بشى بشى بشى

ردوا ثانى مره هواش

وجنه مو صاير اى شى


وواحد قاعد فوق الشى

وصاير بس اهوا كل شى

وجنه الشى الى تحت ايده

بس حقه ... ومومخلى شى

وشى يحطونه بالشى

ونقول اهوا الى بينقذنا

بسحبنا وياه للاخر

ويخلينا بآخر شى



وشى تحس بان شى

لكن تلقاه يشيلونه

وانته منته فاهم شى



وجسر يكلف جم مليار

واخر شى يطلع اى شى

وحط انته الشى فوق الشى

يمكن يطلعلك اى شى

ولا يمكن تلقى نفسك

صرت بهذى الديره .... شى



ولا يمكن اهما صح

واحنا الى مانفهم شى

ولا ليش تلاقى الواحد

دابس نفسه بقرض او شى

وبس يمر اسبوع يفلس

ومايبقى من الراتب شى

منهو قالك تاخذ قرض

ياخى لاتبنيلك بيت

مولازم تركب سياره

مولازم تتزوج ياخى

دبر حالك باى شى

طيب ... لاتروح الجمعيه

مولازم تاكل كل يوم

جرب صوم

ولا قزر عمرك نوم

فيها شى

مو قلنا من الاول

اصلا والله مافينا اى شى

انا عن نفسى مستانس

ومانى محتاج لاى شى

انتو قولوا فيكم شى !!!

القصيده مقتبسه :d
من أخونا الشاعر هزاع الصلال


..................................................................


شفتواااااااا هالشي شلون شي
فهمتوا شي !!


وانا أقول ردا عن هالشي :

يا أخي ما خليت شي !!
لا ...إحنا ما فينا شي
مو باط جبدي إلا شي
إن كلنا نعرف هالشي
وساكتيين ما نقدر نسوي شي
والله لو بيدي أقطعهم ما أخلي منهم شي
أهم صاروا شي
وإحنا صرنا ولا شي
ترى مو حاله
صارت عاله
انت فاهم انا مو فاهم ولا شي
شنو هالشي ؟! ترى احنا شي
واهموا طلعوا ولا شي
ياكلون ويبلعون كل شي
وانت قاعد ما بيدك شي
يعني مو معقوله هالشي
ما نقدر نطمن على شي
يا خيي صح لسانك إنت شي
وفـــــــوق الشي



آخر شي ..,, فهمتوا شي !!
شرايكم بهالبوست مو شي ؟

الأحد، 21 سبتمبر 2008

أنطــــــم ..,, وإنجــــــــعم !!



مساء بدون تحلطــــم
وصبـــاح الإنجعــــــــام :d




تضامنا مع المدونات الصديقه ..,, وتحديا لنفسي المحبـــه للتحــــلطم :d
قررت إني أرفع شعار اليوم العالمي للإنجعام والي يصادف اليوم 22 سبتمبر
وقررت إني أنطــــــــم وأنجــــــــعم
وأسانــــد مدونة بلوق عمتي >> إلي إهي عمــــته :]




بس فكرت وفكرت وقلت يو تيـــــــرن وما تتحلطم ما يصير @@
المشكله إني أقسمت !! يعني شي مو هين
فــقلت شلون يا يوتيـــرن ما تتحلطميين وترحميين الناس شوي
من قرقتج ولســـــانج :d
فمالقيت إلا حـــل واحــد ..,, وطريقه وحـــــــده عشان أقتل هالهوايـــه
لمــدة 24 ســــــــاعه


ألا وهي...,, طريــــــقة لا أرى ولا أسمـــــــــع ولا أتكــــــــــــــــلم @@







تفاديا لأي تحلطــــم بهال 24 ســـــــــــاعه


وفوق هـــذا قررت إني أنجــــعم وأنطــــم وأسكر حلجي :d





ووفقـــا لهذا القرار بكـــــــون هالبوست عباره عــــــــن ..,,



إنجعـــــــــام
بكـــــــــل ما تحمــــــله هذه الكــــــلمه من معنـــــــى





ويعطييك العافيه بلوق عمتي ..,, على هذه الحمله المفيده

والغيــــر شكل :d

>>والي بتفيدني انا خاصة ً وبتعم الفائده على أمي أولا وأبوي

وباجي العايله الكريمه <<:d

السبت، 20 سبتمبر 2008

شو ..في ... ما ... في !!

مساء الفيمتو
وصباح الحليب والدرابيل :d


المهم شلونكم انتوا ؟

يا ويله إلي يقول يا القاطعه :]

ادري اني قاطعه بس ما يحتاج كل بوست وكل تعليق فيه يالقاطعه :d


المهم ..,,

طبعا الكل يتساءل U-Turn تقط ويين تروح !!

شسالفتها

طبعا كل غطه غير عن الغطه الي قبلها :]
لان كل غطه بكيفي
بس الغطه الأخيره مو بكيفي لان ..,, حبيبت قلبي الغاليه عين السيح
أمي
مآخذه الآب توب ..,, ليش !!
لان تبيني أرتب داري وأصفي أغراضي :] وأصف أهدومي بالكبت اليديد
:d

المهم ما علينا من هالحجي :p

كل يوم أشبك اول شي اسويه أفتح إيميلي

وتبدا أنواع التحلطم

طبعا واصالني إيميل صدمني @@ واهو موضوعنا اليوم @@لان مهما يكون الإنسان فاضي ومخه قوطي ما يألف هالإيميل

ولاني اول مره يحوشني هالأنواع من الإيميلات الكوميديه البايخه
إلي فيها قلة أدب
والإيميل عباره عن >>((كيف تتفاديين الهلاقه ..,, هام لكل بنت لتفادي الهلاقه عند مواعدة الحبيب))@@

وإليكم ما جـــاك بهالإيميل الي صدمني @@

وبدون أي تعديل مني

أدري شطوله مو لازم تقرونه كله :d ما ينفعكم بشي



شوفوا حبايبي .. كثرت في الآونة الاخيرة ( حلوة الآونة هذي ) بعض التصرفات الهيلقية للبنات في امور الشباب و المواعد وهالسوالف ,,
و
انا بصراحة انبطت جبدي و حبيت اوضح بعض الامور للإفادة و منع بل و القضاء على الهلاقة بالديرة ,, لانها زايدة هاليومين يكافينا الشر


شوفي يا وخيتي الفتاة
اذا تعرفتي على واحد يديد ,, و توج تكلمينه لا تبينيين له انج سهلة وايد ,, اليوم كلمج باجر يارج وراه شقته لأ ,, ثقلي شوي ترى الثقل زين و تركدي

ترى هم الركادة زينة ,, بتاخذين كل شي تبينه بس صبري عن الطفاقة الزايدة

نقطة مهمة حطيها في اعتبارج ,, الريال يحب البنت اللي ( واثقة من نفسها ) لا تحسسينه انج مغلوبة على امرج و مسيجينة و مو واثقة من نفسج ولا
من شكلج ,, لا يمه تعدلي بلا سوالف يدتي سنة الطفحة ,, لا تغزل فيج والا بأسلوبج والا بجسمج ابتسمي ابتسامة حلوة و قولي حبيبي كلك ذوق
انت كيووت ومن هالحجي الذرب ,, و عاد يااااااااا كرهي لا قام واحد يتغزل برفيجته و اهي نظام مفتشلة و تقول لا انا مو حلوة انا عادية ولا انا مملوحة
استريحييي زييييييييين يعني متواضعة مع الويه ,, بلا افلام فاشلة اقول
حذاري ثم حذاري ثم حذاااااااري ,, لا تبينيين له انج واثقة من نفسج زياده عن اللزوم ,, قلنا خلج واثقة من روحج بس لا تشدين حيلج وايد .. يقولج
عمري انتي حلوة و تردين عليه ايي ادري ما يبت شي من عندك ,, عييييييب يا امي هذي يسمونها قلة ادب
حبايبي ,, عن الطرارة ,, الريال طفارته سوالف كرت بو 5 دنانير والا 3 دنانير ,, استحي على ويهج و بلا هالسوالف ,, ترى عزة النفس حلوة ,, بأسلوبج
خليه اهو اييب لج كل شي من نفسه لا تقعدين اطرين و اتشرطين ييب لي هذا و ييب لي ذاك ,, ترى عزة النفس و الكرامة هم حلوة

و عن الافلام الزايدة ,, سوالف اليوم عرفتيه عقب باجر عيد ميلادي عشان الهدية ,, شتسوى عليج اذا حاطج فباله و يبيج على زواج و يقوم ينبش
من وراج و يطلع عيد ميلادج الصجي ,, بيقول اشكره هذي داشة على طمع و تموت عالهدايا ,, حزتها فججي روحج ,, تفلسين من الاثنين لا من
الهدايا ولا من الريال و خلج عانس يا المخدية

و اذا بغيتي تواعدين هالله هالله بالسنع و الكشخة و الهدوم المرتبة و الريحة الحلوة ( يعني تسبحي قبل لا تروحين له ) مو تكونين توج رادة من
الجامعة ولا من الدوام و طاقتج ذيج الشمس الحنانة و عرقانة و اتبدلين و ترشين عطر فوق العرق و تصبغين الويه مكياج و اطلعين ,, ديري بالج
ترى يصير في تفاااااااعل قااااااااااااااااتل بين العرق و العطر ,, يطلع لج ريحة يديدة ثالثة ماتدرين من وين ياية

النظافة النظافة ثم النظافة ,, شوفوا جم مره قلتها لكم ,, الريال طفارته البنت الوصخة سمعوا الحجي و انتبهوا بقولكم التفاصيل ,, اول شي الهدوم

تكون نظيفة بالكااااااااااامل ,, لا يكون في بقعه مني ولا مني ترى الرياييل يلاحظون كل شي ,, وبعدين الهدوم ظربييهم اوتي ظرااااااااب سنع

مو تلبسين هدوم معفسة و تقولين مالي خلق اكوييهم و تمشين وانتي مستعيلة و تقولين اي عادي يعني انا كنت قاعدة وايد و تعفسوا هدومي

ترى قديمة هالترقيعة دوري غيرها ,, فاحترمي نفسج و ظربيهم اوتي

(طووووووووووووووووووووووووووووووووووووووووووووووووووووووووووووووووووووووووووووووووووووووط) "حذفت هذه الفقره للحفاظ على الأدب العام " :d ؟ عاد يا فشلتج حزتها بيقولج لا ادقين علي مرة ثانية

حفييييييي قبل لا تواعدين ,, مو تروحين و ويهج متروس شعر ,, يعني طبيعية يكون ,, و تقولين خل يشوفني على طبيعتي ,, لااااا يا ماما ,, خل
يشوف طبيعتج من غير شعر ,, خل يحس انه مواعد رفيجته و حبيبته مو واحد من الربع ,, عاد مصيييييييييبة لا صارت عيمية و الحواجب صاكه
تقول حواجب تامر حسني ,, ينحااااااااااااش الولد و يتعقد من البنات

الابااااااااااااااااااااط ,, اياني و اياااااااااااج اتأبطيييييييييين ,, حطي ديودرنت ,, خصوصا اذا كنتوا طالعين الصبح ولا الظهر و بالصيف ,, في احتمال كبير
انج تعرقين ,, و انتو عارفين شمسنا بعد ماله داعي اتحجى ,,

نيي حق نقطة مهمة اللي اهي الملابس ,, حبايبي بلا هلاقة زايدة و تلبسون لي لبس يتلامع جنج رايحة عرس ,, لبسي شي كشخة و حلو من
غير هاللمعات هذي ,, هالسوالف خليها حق العروس تالي الليل ولا حق المناسبات الخاصة

و اذا واعدتي الريال ,, خفي من كبتج ,, لا تخلينها واصلة لي سقف السيارة ,, من يلتفت الريال على يمينه يطالع صماخ عوود ,, لا يا امي خلج
ذربة شوي و حطي وردة صغيرة اذا انتي ما تقدرين تستغنين عنها

اظااااااااافرج ,, اذا كانوا طوال برديهم و خليهم مرتبين .. اذا في وصخ تحتهم طلعيه ,, و اذا اظافرج قصار هم خليهم مدورين مو مربعيين و تخلينها
جنها ايد ريال .. من يمسك ايدج عباله ماسك ايده اهو

هالله هالله بالاكسسوارات السنعة ,, ما يمنع انج تلبسين خاتم ناعم و حلو او سلسلة مع ساعة يعني من هالسوالف ,, ولا تلبسين اكسسوارات
كبيرة تلفت النظر ,, و ابتعدي عن خاتم سليمان اللي كل فص فيه كبر الكنار ,, بلا هلاقة

ولا ننسى المكياج ,, لا تحفرين المكياج و تروحين ,, الريال يحب المكياج الناعم الغير مبالغ فيه و يحبج اكثر لو تكونين على طبيعتج بس من غير شعر
بالويه ,, ولا تحطين لي حمرة غامجة حيل جنها حمرة احلام ايام الفقر اول ما طلعت انا ربي بلاني فيك بلوة ,, لا يا قلبي يفضل تحطين لون مناسب
لبشرتج و فاتح و اشوية قلوس لإضفاء لمعة جميلة و ناعمة

حبايبي ,, بلا تهلق زايد و تلبسون لي تراجي كبار مع الحجاب ,, بالله شنو يعني ؟ يا اتحجبين عدل مثل الاوادم ولا قطييه دامج تبين تلبس تراجي
سالفة اضرب عصفورين بحجر حجاب و تراجي ما ينفعج ترى لا تسوين روحج ذكية يعني فنتق ,, فنتق غبي هذا ,, حسبي الله على المصاروة
اللي علموكم على هالحركة الغبية سوالف فتكات و حسنية و ربعهم بالحي الشعبي و رأصني يا جدع

حبيبتي لا اتبلسين لي هدوم ضيجة عليج يعني ستايل ,, بلا خرابيط لبسي شي مقاسج بدال لا كل ساعة اتمطين هالصوب و تنزلين هالصوب
وماتعرفين تقعدين كإنه في شي قامت على بطنج و صدرج ,, شحااااااااااااادج ,, العن ابو الستايل المهم راحتي

لبسي الوان تناسبج يمه ,, بمعنى ,, مو عشان انتي بيضة تلبسين لي فسفوري فاااااتح لا و طالعة بالشمس بعد ,, ليش تبين تعمين الصبي ؟

بروحهم الرياييل خلقه من الله فيهم عمى الوان وما يميزون الاحمر من البرتقالي ,, يالله الجدوووه

بالنسبة حق البنات السمر ( او بمعنى اصح السوود ) بلا سوالف ايمان نجم و تلبسين لي اخضر فسفوري يعور العين على بني ,, منتي شييره

يا قلبي ,, ولا تحطين لي حمرة وردييية يعني شفايفج طبيعية من الله جذي لونها ,, لا يا ماما تقصين على منو انتي ,, يا هوييييلة تهولي

الحين بكلمكم عن بعض الاشياء اللي المفروض تسوينها و تحتاطين منها قبل لا تروحين حق فارس احلاج ( هذا اذا كان فارس صج ) الله يستر

اذا عندج اكثر من واحد و مكودتهم على قلبج هالكثر ,, دقي عليهم واحد واحد و قولي انج طالعة مع اهلج عشان مو كل ساعة يدقون عليج

و انتي اتبلعمين ماتعرفين شتسوين ,, و يشك فيج الريال ويقول هذي اشفيها ما ترد عالتلفون

شوفي ربعج كلهم واحد واحد شنو اكثر الاماكن اللي يحبون يروحون لها ,, عشان اذا انتي واعدتي ما تروحين نفس اماكنهم ,, و مثل الشقوول
يطيحون عليج ,, فتحي مخج شوي

سيفي اسامي ربعج بأسماء طبيعية محد يشك فيها ,, ممكن تخلينها بأسماء بنات ,, و ابتعدي عن هالمسميات اللي اهي حبيبي و عمري و حياتي
و قلبي ,, اشكره هذيل رياييل مو رفيجاتج ,,يمكن بيطالع تلفونج الريال اشلون يعني ؟الريال يفتهم مو مخه بركبه

المسجااااااااات لا تحتفظين فيها مسحيها اول بأول ,,مو تمسحين المستلمة و تخلين المرسلة ,, بلا غباء عفيه ,, ولا تسيفين ولا مسج عشان لا
يشوف الرسائل المحفوظة

اذا في صور في بوكج حق جم واحد خليهم بالبيت و طلعي ,, عشان لا ينبش بأغراضج و يشوف صورة واحد فيهم ,, و تقعدين ترقعين بعدين هذا
اخوي والا هذا ولد خالي ترى قديمة هالسالفة .. شهالمحبة حاطة صورة اخوج مو انتي مجابلته بالبيت 24 ساعة ,, عاد يا ملقييييييي لما
تكون البنت بيضة و رفيجها اللي بالصورة اسود ,, والا تكون اهيي سودة و رفيجها اللي بالصورة عيمي ,, ما اترقع كلش شيااااااااب لي يااااب

اخيرا اخواتي البنات اتمنى انكم تستفيدون من هالنصايح و سامحوني اذا نسيت شي مني ولا مني

XXXXXXXXXXXX

""صلي على نبي شنسامحج @@..,, الله يلوع جبد العدو على إيميلج هذا ..""

وانتي خليتي فيها شي ينسي

يالله لا تبلينا وتشافيهم يا رب !!

ما هذا @@
ما حطيته للإيفاده
بس حطيته عشان تحمدون ربكم على نعمة العقل
وتدعون حق الي كاتب هالإيميل هم بالعقل :p


................................................................................................


الإيميل الثاني


خوش شي :p


الإيميل عباره عن سايت

تنزل صورتك فيه

ويطلعلك أكثر واحد من مشاهير العالم يشابهك

يعني نفس البوهه



جربته لوووووول وشوفوا شطلع لي

تشابهني بنسبة 65% :]
ماكو شغل :]
عاد ما ادري صج جذب الله اعلم :p
والي يجربه يقولنا شطلعله :p
........................................................................................
وهذا كل شي لليوم :]
بوست تغيير ..,, مو اطلعون إشاعات وتقولون فوق تحت "على قولت شلالات :]"
مالها خلق تكتب
المهم
الله يتقبل قيامكم وصيامكم وصالح اعمالكم
ومبارك عليكم هالعشر تيام الي باقيه
واللهم بلغنا ليلة القـــدر
واللهم إجلعنا من من يصوم رمضان إيمانا وحتسابا
وسلامتكم
خووش بوست صح خفيف لطيف :d ولا ما عندي سالفه ؟ :p

الجمعة، 12 سبتمبر 2008

هالمـــره رمضـــان غير !! غير ..غير ؟؟ شلون ؟ليش ؟


صباح الطـــاعه
مساء الراحــه


إيي شفيك مستغــرب ..لا تبقق عيونك !!
شفييج تنحتي @@ ..إيي صج إلي قاعده تقرينه !! غيـــــــر !


شلون ..؟ ...وليش ؟ .
خلوها علي هاذي !!


أول قولولي ,,, عندكم نيـــه وودكم هالرمضان يصير غير ؟
لا تقولون خلاص راحت علينا !! باقي 18 يوم !! 18 فـــرصه

من صجكم ... إيي يعني أكييد .. ما راح تردون بكلمتكم ,,, كلام رياييل :d

هااا آخر مره بسئل ... متأكديين تبون هالتغيير !! ولا ويين رايحيين معاكم !

إذا الثانيه من الحيين أقولك ..لا تعب روحك وتقرا !!
مو لك هالبوست أنطر البوست الياي :p


إذا الأولى حيالله من يانا ..
وهالبــــوست لك ... إيي لـــك ليش مستغرب تعبت وكتبته عشانك ...لأنك تستــاهل وتعبك راحه :]


تعالوا معاي أول .. بقولكم سالفه
وعقب قارن روحك بأبو سليمان وأبو خالد .. وشوف أي واحد أنته !!

تقولك أم مويضي .. بو سليمان تاجر معروف ... وهامور من هوامير الديره !! ما تمر صفقه إلا وترسي عليه
أهم شي عنده تجارته والربح ..بس ها بشرط ... الربح يكون سريع !! شلون يعني ... يعني يحط بيزاته هني وياخذ دبلاتهم من الصوب الثاني
بس في شي ما وظحته ام مويضي .. بو سليمان ما يهمه ان يكون ربحه حلال أو حرام المهم فلوس وبس !! وفوق هذا ما يهمه تكون تجارته مشروعه او لا @@
المهم كاااااااان غني .. بليااااااااااردير @@ من هالأرباح الي قاعده على قلبه


إيي ما قتلكم .. بو سليمان كان عنده أخو "عضيد "... أسمه بو خالد ...سبحان من خلق وفرق
فرق عن أخوه بكل شي .. حتى بالشكل :d المهم الفرق بينهم فرق السما عن الأرض


بو خالد خووش ريال .. والكل يشهد له .. وبما انه حاله حال أخو من عايلة تجاريه ومهنة كل أفراد العايله التجاره !! كان تاجر بس غير عن أخووه .. شلون ؟ ... كان ما يهمه الربح المهم شي يستره اهو ومرته وعياله .. أهم شي عنده يكون الربح حلاااااال .. والأهم رضى الله .. ما تهمه الفلوس إن شاء الله تييله عقب سنين المهم ما يوكل عياله من فلوس حرام !!



الحيين أنسى السالفه ..
وفكر بالواقع ....,,, ترى هذا حالنا برمضان !!؟؟ بعضنا نفس بو سليمان وبعضنا نفس بو خالد !!

ناس يمر عليهم رمضان مرور الكرام ما يطلع منه إلا بحرمان نفسه من الأكل والشرب !!
أما جوارحهم فحدث ولا حرج من المعاصي ..الي ما تخطر على البال من زنى العيين .. والغيبه ..غير اللسان الي ما ينصان @@ وغيره وغيره ...

ومتابعة بعض هالمسلسلات إلي ما تقدم ولا تأخر ... ما غير تضيع الوقت ونستآثم بهالأشكال !!وفوق هذا تطير بركة الوقت !! وإلي تراكم السيئات وتطير الحسنات ..إلي إحنا بحاجه لها لان مهما وصلنا بالإلتزام والطاعه محد واثق بدخوله الجنه !! إلا برحمة ربه ومنته وتفضله علينا بمغفرته :]



In the other hand :p,,, ناس كل رمضان يجددون نيتهم .. وينوون إن هالمره رمضان صج غير ..بس يوم يوميين وترجع حليمه لعادتها القديمه !!
ليش لان اهو على طريف ... ونواي .. بس ربعه ما يساعدون واهو يا مع الخيل يا شقرا ... يا يصير حالته حالة مد وجزر !!


وناس الحمد الله ربي منعم عليهم بطاعته و ويدورون رضى ربهم بكل خطوه مهما كانت صغيره او كبيره سواء برمضان ولا بغيره




وبــــــس كلام بقلبي كان يقرقع .. قلت بكتبه وبريح قلبي ... وأنفع فيه وأنتفع :]
عسى بس يكون فيه فايده حق كل واحد مر عليه :]
صح مر 12 يوم !!
بس ترى باقي 18 يوم!!
و18 يوم مو شويه :] فكر فيها شويه
إن كنت غافل وراحت علييك ال12 يوم
عوضها بهال 18 يوم الي باقيين


خلونا ... نجدد النيه

خلونا نكسر الروتيين

خلونا نعاهد نفسنا ونوقع مع "رمضان" عقــد
" بدايه يديده"

هالمـــــره رمضان غير

بدون معــــــــاصي


هالمــــــــره رمضان غيـــر

هالمـــره رمضـــان راحــه


وتقبـــــل الله منا ومنكم صــــــالح الأعمــــــال :]

الاثنين، 1 سبتمبر 2008

مسلسلات ولاكن !!...هاذي فـــرصة العمـــر ..جــرب تتقـــرب ..وU turn مقــصره :p

مســاكم خيـــر
وصبــاحكم نوير

ولهـــانه عليكم وايد والله :]

هلا بالي لفاني يا هلا به ,.,,

يانا رمضان بحـــلوه ولقيماته
ويتنـــا هالمســلسلات !! الي بتنغص عليه حياته :d
"أصلح أصير شاعره ها "
ما علينا ... مو هذا موضوعنا


وايـــد منا يتابعون هالمسلسلات .. وأكثر الي يتابعونهم يكون بسبب الفضول لا أكثر .. والأغلبيه يلاحظون وللوهلة الأولى ما يتميز فيه بعض كتاب هالمسلسلات
.."مع أحترامي لهم" .. بثقافه شوارعيه عاليه!!

شلون ؟... أنا أقولكم شلون !

وهالشي من خلال ما يكتبونه والمبالغه بالأحداث الي ما تمت بالواقع بصله !!..هم ليش ؟؟ أنا أقولكم ليش !
لأنهم بس يعكسون الجانب السيء!! وجنه كل شباب الخليج يتعاطون المخدرات ومنحرفيين وإتكاليين !!...وبنات الخليج يغازلون "ورايحيين فيها "@@...!!,,, وفوق هذا الأبو مشغـــول بشركاته .."ما يدرون إن ثلاث ترباع الخليج أقساط!!" وفوق هذا راعي قعدات وسكير@@..,, والأم تسافر من مكان لي مكان "جنها إبن بطوطه" وهـــايته @@!!.... وغيرها من أحداث ما تنقال !!
ولو بقول ما أخلص

والمشكله وإلي معور قلبي إن إلي يتابعون هالمسلسلات أغلبهم ما بين 10 لي 16 او يمكن بعد 18 سنه .. وهالفئه أكثر ناس يتأثرون @@ ويحاولون يقلدون !!

صح ولا أنا غلطانه :]

بس خلاص لا تابعون قتلكم القصه :p


حلو الواحد على الأقل يفرغ روحه .. ويعيش بهالأجواء الروحانيه واهو مرتاح !!
بالنســـبه لي هالرمضان بكون غير عن كل مره
.. شلون يعني .. ؟
بحاول إن شاء الله أختم ختمتين بدال الختمه :]... صلاة التراوييح بروحلها المسيد.. كل يوم بسوي حق ألفطور صحن سلطه و طبق حلو لان هذا الي فالحه فيه بس :d ... بحافظ على السنن ...و الله يعيني إن شاء الله J
بكل بساطه مهما اسوي أكون مقصره .. بس الحمد الله على كل حال :]

ومبـــارك عليكم الشهـــر ... والله يتقبل صيامكم وقيامكم
وينعاد عليكـــم وإنتوا بصحه وعافيه :]

إيي صج ..
أنا وعدتكم بحط تغطية السفــــره وطلعـــت الحداق وأم المرادم :]
بس والله هاليومين الي طافوا لويه الواحد يالله يحك راسه :d
وفوق هذا باقوا إيميلي الله يسامحهم :p بس حلالهم مطرح ما يسري يمري :d
فقلت بأجلها عقب رمضان لان حاطتلي خطه بمشي عليها وبما إني بأجلها فراح تصير من الأرشيف يعني مو" "fresh:] فقلت بتعذر منكم
وآخر مره بوعدكم بشي ..لان كل ما اوعدكم يصير شي لووووووول
بس شسوي يا ربي أحب أسوي آكشــن شوي .. وعقب أتوهق :d

على العموم حيـــــاكم الله
وعطوني راييكم بموضوع المسلسلات الي مسببلي قلق :p

الأربعاء، 13 أغسطس 2008

بلادكم حلوه ... بـــس الوطــن مالـــه مثـــيل :]

مساء الخير ... مساء الوله والشوق ... مساء ماليزي ..!!
اعذروني شوي على التقصير .. ما راح أقدر أتابع المدونات كلها لقلة الوقت
ويمكن أقصر شوي بالبوستات ... لأني مسافره ماليزيا وإن شاء الله بسوي تغطيه حق السفره كامله وبنزلها بالمدونه :]
وعقب يوميين ان شاء الله بننتقل سنغافوره .. وعقبها بأربع أيام ديرتنا الثانيه دبي :d
إيي صج ووعد مني أحط لكم طلعت U-Turn لأم المرادم موثقه بالصور :d
وطلعت الحداق مع الربع :d شكلي بنزلها بقناة بحري :D ببرنامج طلعة ربع :d
يالله تــــامرون على شي من هني ؟
إلي يبي شي لا يرده إلا لســـانه :d
و ما أقول إلا ... بلادكم حلوه .. حلوه .... بس الوطن ماله مثيل ..!!
الله يردنا بالسلامـــه :p
ونشـــوفكم على خير

الأحد، 10 أغسطس 2008

حاضرين للطيبيين :]

لا تخافون مقدمتي اليوم مو مثل مقدمة كل بوست :]
ما راح أتحلطم:d
بس والله بتأسف ... لاني مقصره وايد ولأسباب ما تشفعلي such as :رباده, عيز وكسل :d
المهم ..مو هذا موضوعنا ..
وأنا أسير على المدونات الصديقه والجيران ..جان ألقى بمدونة الغاليه شلالات TaG موجهته لي .. وأنا الصراحه ما أرد الغاليين :]
وسامحيني على التأخير يالغاليه
المهم ..
بسم الله نبدا :]
بدأت تدون من امتي ؟
تاريخ 20 أبريل 2008
دخلت العالم ده ازاي ؟
بدايتي كانت ..
اممم كان عندي أخوان دنيا :] عندهم مدونات وكنت أتابعهم .. وشوي شوي قمت أتوسع أكثر .. وأتابع مدونات أكثر
وحبيت التدوين والناس الي فيه .. وحسيت إن كل مدونه تعكس شخصية المدون الي يكتبها .. وبطبعي أحب أجرب كل شي
قلت بجازف وبدش هالعالم .. إن عجبني كان بها .. وإن ما عجبني راح تكون تجربه حلوه ما راح أندم عليها :] والحمد الله
ايه كان انطباعك في البداية ؟
مثل كل بدايه .. أكيد كانت تواجهني صعوبه شوي .. يعني شلون أكتب إلي في بالي .. وشنو راح يكون موضوع البوست الياي
وشنو راح تكون ردت فعل الناس الي تقرا ..!!
اممم مثل كل فقره .. تواجهين صعوبه ليما تكتبين أول كلمتيين وشوي شوي تلقين روحج كملتي الجمله وحطيتي النقطه :]
مين أكتر واحد بتهتم بتعليقه علي بوستك الجديد ؟
والله الكل بدون إستثناء "ترى مو إجابه دبلوماسيه :d" إن كنت أعرفهم أو لا وإن كانوا من عالم التدويين او لا :] والسبب إن الي يعلق ويقرا اهو الي يحفزني إني استمر بالكتابه
مين اتعرفت عليه من خلال المدونة و نفسك تتعرف عليه في الحقيقة ؟
تعرفت على أخوان وايد .. وودي أتعرف على كل واحد بهالعالم بالحقيقه ...
ودي أدرس شخصياتهم وأشوف هل كل مدونه تمثل شخصية المدون !:d
ايه أهم حاجة اتعلمتها من عالم التدوين ؟
من التدويين تعلمت أشياء وايد ..
تعلمت شلون أحسـّن كتاباتي .. تعلمت شلون أتعامل مع الناس ..
عرفت أشياء كنت ما أعرفها سواء كانت أجتماعيه أو ثقافيه ..
وفوق هذا عالم التدويين يغنيي عن الجرايد والأخبار .. يعني أعرف كل شي صاير بديرتي بمجرد إني أمر على المدونات ..
ايه أكتر حاجة كرهتها ؟
أكثر شي ما حبيته بهالعالم .. وما إكتشفتها إلا عقب مده
مدونات مالها داعي كلش ... وناس ما عندها شغل غير التطنز وسب فلان وعلنتان
وغير المدونات الي تسيء حق دينا .. ومجتمعنا :)
ممكن تدي مثال عن اللي بتحلم تلاقيه ؟
أحلم ..إني من خلال مدونتي أقدر أغير أو أفييد أي شخص
حتى لو كان بشي صغير ... ودي أتعلم من غيري .. ومن الي أحسن مني بهالعالم
ودي أتعلم شلون أحطلي هدف كبير بحياتي وأحاول أوصله مثل أغلب المدونين :]
حاسس ان التدوين له تأثير ؟
أكييد له تأثيير .. ويأثر وايد بعد
لأن في الأيام الأخيره .. في وايد ناس قامت أتابع المدونات ..
وأقرب مثال إن في وايد مدونين صار عندهم كتب .. وفي غيرهم صارت مدونتهم كتاب :)
طيب كلمة أخيرة ؟
عالم التدويين عالم حلو ..
أستمتع ليما أقعد وأقرا أفكار غيري .. حتى لو كانت ما تهمني !!
وأكثر شي مخليني أستمر بهالعالم أهم أخواني إلي عرفتهم فيه :]
ما أبالغ إن قلت إني تشرفت وايد بمعرفتهم .. وإنهم غيروا فيني أشياء وايد :]
والحمد الله على قدرت أكتبه وأسوييه للحيين .. والله يعيين على الياي
وتسلميين شلالات على هالTAG الخفيف واللطيف
وسامحينا على القصور ..والتأخير
الله لا يخليني منج ولا من أخواني الثانين :]
وســـلامتكم :d

الأحد، 27 يوليو 2008

هكذا علمتني اللقافه

أممم أول شي مساكم الله بالخير !
تدرون شنو المنــاسبة الي خلتني أنزل هالبوست ؟
أنا أقولكم ... شوفوا الله يسلمكم .. تعرفون ليما تييلكم حالة إن الدنيا صاكه فيكم !!
ومن زمان ما ضحكتوا ! وحتى الإبتسامه ما تطلع من قلب ؟ ووراك باجر إمتحان ومالك خلق تدرس ؟
ووراك مشاغل الدنيا كلها ... بإختصــار المناسبه ...لأن ماعندي سالفه :p

********
بيني وبينكم اللقافه طبيعه بشريه .. كل الناس ملاقييف :p
ولو مو اللقافه جان محد تعلم !!
المهم في لقافه شينه وفي لقافه زينه !
شلون يعني ؟
انا اقولك شلون!!

يعني إنت ...إيي إنت ....ملقوف واهو.. واهي.. بس تختلف نوعية الثقافه !!

يعني من اللقافه المو زينه والي تسبب الزحمه بالكويت
إلي ما يصدقون على الله يشوفون واحد واقفه سيارته او داعم لازم يخففون ويشوفون شسالفه ولا ما يرتاحوون @@

يعني ليما توصل اللقافه حق تدخل بشؤون الآخرين هذا شي مو زين
ليما تتليقف وايد وتدخل بكل سالفه هاذي لقافه مو زينه
ليما تصر تبي تعرف هذا شقول وهذاك شسوي هاذي لقافه مو زينه

بس لقافة الإنسان الزينه هاذي شي ثاني
يعني تشوف شي غريب أقصد ظاهره نظريه شي من هذا القبيل شي يتعلق بالعلم "لقافة الثقافه" كما اسماها الدكتور غازي القصيبي !

وتتليقف وتسأل هذا ليش وهذا شلون ... بمعنى لقافه من نوع ثاني أقصد فيها حب التعلم .!
فالاكتشاف العلمي المبهر الذي قد يمر عليك في خبر سريع أو جائزة يعلن عنها قد يبدأ بملاحظة أو سؤال أو مجموعة من الملاحظات والأسئلة التي منبعها الرغبة في المعرفة أو يمكن أن نقول «اللقافة»! «فالملقوف» لايريد فقط أن يعرف و إنما هو مهووس بأن يعرف! وهذا يعني أن اللقافة قد تكون صفة مرغوبة ومهمة وليست صفة مكروهة لابد للشخص أن يتخلص منها أو يسيطر عليها!
المهم مو هذا موضوعنا

الله يسلمكم ... وبيني وبينكم
انا فيني هالنوعين اللقافه الزينه والشينه ..!!
ايي الاعتراف بالحق فضيله .. بس الحمد الله لقافتي ما تأذي أحد :p والشي الحلو فيها إن كل ما تليقفت كل ما تعلمت :

اممم .. بس الشي الي محيرني ليش اللقافه دايما ترتبط بالحريم !!

بس الحيين عرفت ليش :p

طبعا طبعا مو الكل :D


المهم ... تقول أم مويضي هذاك اليوم وعلى شارع الخليج ...
واحد كان مسرع بالسياره ومعاه وحده وأغلب الظن انها مرته "زوجته"!
المهم ... فجأه ما يدري من ويين طلعله شرطي ..!!
وقاله : بو الجيب الأسود أصفط على اليمين !! إيي إنت إنت لا تقعد تتلفت :p
المهم ..صفط الريال !و نزله الشرطي
قاله الريال : خير ان شاء الله ؟ شسالفه ؟
رد عليه الشرطي :انت كنت دايس 160 وهالشارع حدك 80 @@
رد الريال : سامحني .. بس والله اخوي كنت معدي ال 80 بشوي
جان تنط الي يمه : تقصد كنت على الاقل ماشي 180@@
الريال : خزها خزة حقد

رد الشرطي : وليش اليت الي وراه مكسور؟ وهاذي مخالفه ثانيه !
رد الريال :صج مكسور ؟ توني أدري طال عمرك !
ردت بنت الاوادم ونقزت : مو اسبوع الي طاف قايلي بتروح تبدله ؟؟
الريال : خز البنت وقالها احسابي معاج بعديين !

الشرطي : وبعديين ليش مو رابط الحزام ؟؟
الريال : طال عمرك توني ليما صفطت فتحته ! كنت بنزلك ؟
نقزت بنت الحلال مره ثالثه: اصلا انت عمرك ربطته !!

اللتفت الريال على البنت وقالها بصوت حاد : انتي ما تعرفيين تصكيين حلجج كلش @@

سأل الشرطي:اهو كله يصارخ علييج جذي
البنت : ايي بس إذا كان "سكران"!!
نقز الريال وقال حق الشرطي : لا طال عمرك لا لا لا لا تصدقــــــــــها !!
ردت البنت : ما علييك منه اصلا اهو قام يشرب من بدا يبوق
قال الشرطي : يعني أهووو يبوووق @@
قال الريال : إإإإإِش.... ما علييك منها يا طويل العمر !! هاذي ما ينوخذ منها حجوه ؟!

ولتفت على البنت وقالها : بتسكرين حلجج ولا بطلقج الحيين ؟
جان يسأل الشرطي بنت الحلال: اهو دايما يهددج بالطلاق ؟
جان ترد الحبيبه @@: أهو بالأول خله يتزوجني عشان يطلقني :D

طبعا القصه أنا سامعتها ومحرفتها بإسلوبي :p

للتمـــــــــويه :d

صج لقافة الحريم ما ترحم :p

المهم هذا مثال على لقافه الموزينه

تصدقون يعني أنا صج فيني لقافه بس الحمد الله محد يلاحظها إلا القريب مني :p
والحمد الله لقافتي ما توقف شارع الملك فهد كله عشان أشوف حادث@@


الحيين وعقب ما قريتــ"ــي" هالبوست !

في واحد بهالدنيا ما تليقف بحياته ؟?







الأربعاء، 23 يوليو 2008

خوووش خبـــر :)



ألـــــــــــف مبـــــــــروك أخوي "بــــــــراك"
صـــــدور ديوانك اليديد .... ومو آخر ديوان إن شاء الله
والله يوفقــــك
عـــن نفسي ما شريت الديوان للحيـــن
بس أنـــا متابعه جيـــده للمدونــه وأنصحكم إنكم تشترونه :)
موجـــود بفيرجن المرينا مول .... وقريبا إن شاء الله بفيرجن المطـــار



الجمعة، 18 يوليو 2008

رديت للواقع !!


مساء الخير !!

والله أدري إني مقصره وايــد !! اصلا مالي ويه أنزل بوست :p

بس الواحد شسوي هاذي حال الدنيا .. مشاغل .. أهل .. مشاكل ... صيفي .. دراسه ... لويه !! والله يعين الجميع

والله ولهت على الكل وولهت على مدونتي أصلا كل ما أمرها تتشره علي !! مو عن شي تقولي انتي ما تستحيين الأوادم تمرج وأنتي قاطعه عنهم ولا تسئليين !! صج ما فيني خير :)

وبيني وبينكم .. ماكان عندي شي يستاهل إني أنزله .. أحس إني مو انا هالشهرين إلي طافوا عشان جذي ما حبيت انزل شي :)



والله ولهت على الكل وما ابي أذكر أسماء عشان ما انسى أحد كلش ... ومشكوريين واايد كل إلي إسئلوا عني :)
وصلتني الأخباروضيقت خلقي زياده ..إني سمعت وما ادري صج ولا جذب إن أختي الغاليه kuwait تقاعدت !! ليش عاد ما تدريين ان كل ما صكت فيني الدنيا اروح أقرالج وأستانس !! والله من صج ضيقتي خلقي
أتمنى انج تفكريين مره ومرتيين وثلاث يعني إذا مو عشانج عشانه :)


**********************************************************************************


لم الهروب من الواقع ؟!

كان هذا واحدا من أسئلة نفسي التي لا تفتأ حتى تبحث لها عن إجابات
لمغزى في داخلي لا أصرح به عادةً!
فكرت كثيرا ً...,, لا أشعر انني "أنا" في الأشهر الأخيره !!
هل حقا أحاول الهروب من الواقع ؟ أم ماذا
وإن كنت أفعل فهل ما أقوم به صحيح؟
هل الواقع يحمل من القسوة لي ما يجعلني أحلم وأفكر الهروب منه ؟!!
وهل سوف أنجح بالهروب منه ؟

الواقع هو الواقع .. رضينا أم أبينا ..هو الواقع ..اعترفنا أو أنكرنا ..هو الواقع لا محاله !!
قد لا يحمل لنا من القوه ما يجعلنا نفكر في مقاومته والهروب منه او حتى أن نتناساه أو حتى الإستسلام له!
وقد يحمل لنا الكثير من القسوه و الحزن والحقد الذي قد يضر بنا ويجعلنا لا نتحمل العيش في هذا الواقع الأقرب إلا الحقيقه التي لا تتقبل التعديل فنستسلم له ونحاول الهروب منه لننسى ما قد يقودنا إلى الألم اللا منتهي !!

فكم تألمت ..حزنت ... وكرهت هذا الواقع !!
نعم .. كم هربت من هذا الواقع ... أغمض عيني !! وأهرب إلى عالم الأحلام .. عالم كان معي هو ..كان معي بكل اللحظات !! هنا كان يمازحني !!.. هناك كان يخجلني بكلماته وضحكته الساحرة !! بهذا المكان كان يحلم بمستقبل يجمعنا معا ! ... ما ألبث قليلا حتى أسمع صوتها :أين ذهبتي إلي أي عالم رحل عقلك؟ ... أستيقظ من هذا الحلم وأعود إلى واقعي المر ! واقعي من غيره هو
أصيح بها : لماذا جعلتيني أعود إلى هذا الواقع !! ألا تدركيين كم أفتقده أحن إليه لكلماته لجنونه ....له هو !

تحضنني لتخفف عني كما يفعل الجميع ... تراني بنظرات الجميع مشفقةً على حالي !

أعلم إنه لن يعود... وأعلم كذلك إنني لن أستطيع أن أغير هذا الواقع !
إن الواقع واقع ...وعلينا أن نفكر مليا كيف نتعامل معه نتأقلم مع حاله !! وليس حالنا !
قد نستسلم ... ونصبر!! قد نحاول تغييره ولو جاء التغيير بعد حيين !! قد نواجهه ونتصدى له لانه لابد لنا من المواجهه وإلا فرط الأمر من بين أيدينا !
الهــــروب من الواقع لضعاف النفـــوس فقط !! ولا أجــد نفسي بينهم !

(لكنّ التطبيق يبقى واقعاً بعيداً عن أذهان كثير منّا)

الثلاثاء، 27 مايو 2008

كنــــت ..."منــــهم"!!


مسَاكم الله بالخير
والنويَــــر !


بيني وبينكم ...كنت منهم !!
كنت كله أحكم على الناس من أول مره أشوفهم .. من أول كلمه يقولونها !!
أحكم من مظاهرهم
!!

أذكر اول ما دخلت الجامعه .. وأول كلاس دخلته ..قعدت يم وحده كانت ماده البوز شبريين @@
جان أقول بقلبي ويي الله يعيني أنا ويين قعدت !! شكــلها قــــشَـــره وما تتحاجه وشكلي ببتلشت فيها
بس بعد جم يوم بدت تآخذ وتعطي وياي .. وطلعت خوش بنت وطلعت ظالمتها..يمكن بذاك اليوم كان عندها شي او متضايقه من شي عشان جذي كانت مبوزه :] ... وقلت بقلي انا ليش كله مطيوره وأحكم على الناس بسرعه
!!

ومن ذاك اليوم غيرت هالشي فيني وبدييت ما أحكم على الناس من أفعالهم او مظاهرهم ...بديت أشوف وأدرس هالناس والزين أقربه مني والشين أوخر عنه :)

والحين قمت أستغرب من الناس الي يحكمون على المظاهر أو حتى من اول كلمه تنقال !!
الواحد لازم يفكر مره ومرتيين وثلاث قبل لا يحكم على خلق الله
يمكن في ناس يشوفون وحده سفور ويقولوون ويي هاذي ما تستحي !! أو حتى يشوفون وحدة لابسه عباة ومحجبه ويقولون هاذي خوش بنت !!
وفي ناس بعد يحكمون من المواقف ... يعني مثلا هاذي سلمت على واحد على طول قالوا هاذي ما تستحي @@
يمكن أخوها ..ولد عمها يصيرلها !!
ليش تتسرعون بالحكم وتستاثمون فيها
؟


المهم
...
الي خلاني اليوم أتكلم عن التسرع بالحكم على الأوادم قصة هالبنت
يقولكم في يوم من الأيام ...هذيك البنت كانت قاعده مع رفيجاتها بمكان عام .. عاد ويين؟ الله أعلم! ...
المهم..
الطاوله إلي مجابلتهم كان فيها شباب قاعدين !!
خالد وبدر ومحمد
والبنت كانت مجابله بدر وخالد ومحمد معطيها ظهره
:p

المهم...
خالد : بدر تشوف هاذي البنت الي ماتت وإهي تخزك !!
بدر : إيي بس أنا قلت يمكن قاعد أتوَهم :S
أخاف البنت قاعده إطالع شي وراي !!
محمــد: وين وين ؟؟ أي بنت ؟؟
خالد : هاذي الي قاعده بالطاوله إلي جبالنا!!
محمــد: إيي والله @@... شعلييك بو ناصر عاد ترى مملوحه !!
بدر: إذبحتني ما أحب أحد يخزني وأنا آكل !! المشكله أكاسرها بعيني ولا تشيل عينها @@
شنو ما تستحي هاذي ماكو حيى .. ماكو غيري بهالمكان يعني !!
محمد: بدر سو روحك ثقيل وما تعطي ويه ... وجنه مو هامك
خالد : إيي إيي إحقرها ..!!
بدر : عاد والله ما همتني خلها تخز لين تنعمي عينها @@
محمد: عاد ما خزتك إلا إنت @@ الله يعينها شفكها من لسانك :D
خالد:هاهاهاها...إيي والله صاج الله يعينها !!الحين بيَسطر فيها قصيده :p
بدر: إيي والله... أنا أعلمها ..بكتب فيها جم بيت عشان تتعلم
!

وقال في هالبنــت:

كل شبر بهالوسعيـه ملـك ربـي تعلميـن
وأعلم إن اللي خلقني هو خلق لـك هالعيـون

لكن انتي من جلستي وانتـي فينـي تحدقيـن
كن ما به ناس غيري بهالكراسـي يجلسـون

لو سمحتي عاد سمعي وحتى لو ما تسمحيـن
المهـم اللـي بقولـه تسمعينـه و يسمعـون

ع الأقل لين نظرتك سـوي روحـك تستحيـن
غضي طرفك مثل غيرك خوف ربعي يلمحون

الركادة عاد زينة والحياء فـي البنـت زيـن
وفيـك جآزم لا ركـادة ولا حيـاءٍ يـذكـرون

تعرفينـي ؟! أعرفـك ؟! ماأذكـر إنــا ملتقـيـن
لا أعرفك من تكوني و لا تعرفي مـن أكـون

وإطمأني إن كان قصدك بس فينـي تشبهيـن
ما هـو أنـا إلي تعرفيـه والبشـر يتشابهـون

مـا دريتـي من التشابـه يخلـق الله أربعيـن
وأعرف أربع يشبهنك بـس والله يستحـون

وإن كان قصدك شي ثاني عاد قولي وش تبين
خايف إنا نصير فرجة وإللي ماشترون يتفرجـون

وإذا ببالك عاجبتنـي لا يحوشـك تحلميـن
صح ربعي من جمالك فيـك صـار يمدحـون

بس وش لي في حلاتك دام فيهـا ترخصيـن
حشمة البنـت وحياهـا والكرامـة يلفتـون

ولو توفر فيك هـذا مـع حلاتـك تبشريـن
ما هو أنا ألف غيري بـاب بيتـك يطرقـون

وش علامك رغم كل اللي أقولـه وتسكتيـن
مو طبيعي هالسكوت وهالبـرود وهالسكـون

إنتـي خرسـا أسألـك ولا منتي تسمعيـن؟؟
قالوا ربعي ذي كفيفـة قلـت لا لا تمزحـون

لين شفتك يوم رحتـي يمسكونـك باليديـن
ما دريت إلا عيونـي أربـع أربـع يذرفـون

آه ياني منه مشهـد يـوم شفتـك ترحليـن
جيت اشوف عيون ربعي لقيت الكـل يدمعـون

قلت سنّـة هالحيـاة وحـنا ترانـا مؤمنيـن
الله اللـي مسيّرنّـا بيـن كافـ وبيـن نــون

وكل أبونا نختلف مع إننا مـن أصـل طيـن
سبحان يلي مصورنا ولله في خلقـه شـؤون

يعني حنا كل أبونـا عـاد إسمنـا بنادميـن
وليا قضى ربك أمر وقـال لـه كـن فيكـون

فينـا يلـي رازقه خيـر رب العالمـيـن
وفينا يلي هو لعطفه بحاجة القلـب الحنـون

وفينا يلي مـا شكـى مـن علـةٍ كالآخريـن
"صـمٌ و بكـمٌ وعمـيٌ فـهـم لا يفقـهـون"

بس قليل عـاد فينـا للنعـم هـم شاكريـن
والله يرزق هالخلايق من حيث هم لا يعلمون

وتدري عاد يالكفيفة حنا تراى متشابهيـن
وإن ماانعمت أبصارنا قلوبنا هـم إللي يعتمـون

يالكفيفة يالعفيفـة إن قلـت آسـف تقبليـن؟؟
يغفر الله ذنوب عبده ليا خطا وهـل تغفـرون؟؟؟؟

إيي طلعت البنت عميه @@..الله يكافينا ويكافييكم الشر
والولد حكم عليها على طول @@ إنها تخز وما تستحي
!
المغـــزى من الموضوع
"لا تستعجـــل يا بني آدم بالحكـــم"!!


للأمانه الكتابيه... القصيده مو قصيدتي طبعا :D
بس القصه من وحي خيالي :)

وحياكم الله :]