مســاكم خيـــر
وصبــاحكم نوير
ولهـــانه عليكم وايد والله :]
هلا بالي لفاني يا هلا به ,.,,
وصبــاحكم نوير
ولهـــانه عليكم وايد والله :]
هلا بالي لفاني يا هلا به ,.,,
يانا رمضان بحـــلوه ولقيماته
ويتنـــا هالمســلسلات !! الي بتنغص عليه حياته :d
"أصلح أصير شاعره ها "
ما علينا ... مو هذا موضوعنا
وايـــد منا يتابعون هالمسلسلات .. وأكثر الي يتابعونهم يكون بسبب الفضول لا أكثر .. والأغلبيه يلاحظون وللوهلة الأولى ما يتميز فيه بعض كتاب هالمسلسلات .."مع أحترامي لهم" .. بثقافه شوارعيه عاليه!!
شلون ؟... أنا أقولكم شلون !
وهالشي من خلال ما يكتبونه والمبالغه بالأحداث الي ما تمت بالواقع بصله !!..هم ليش ؟؟ أنا أقولكم ليش !
لأنهم بس يعكسون الجانب السيء!! وجنه كل شباب الخليج يتعاطون المخدرات ومنحرفيين وإتكاليين !!...وبنات الخليج يغازلون "ورايحيين فيها "@@...!!,,, وفوق هذا الأبو مشغـــول بشركاته .."ما يدرون إن ثلاث ترباع الخليج أقساط!!" وفوق هذا راعي قعدات وسكير@@..,, والأم تسافر من مكان لي مكان "جنها إبن بطوطه" وهـــايته @@!!.... وغيرها من أحداث ما تنقال !!
ولو بقول ما أخلص
والمشكله وإلي معور قلبي إن إلي يتابعون هالمسلسلات أغلبهم ما بين 10 لي 16 او يمكن بعد 18 سنه .. وهالفئه أكثر ناس يتأثرون @@ ويحاولون يقلدون !!
صح ولا أنا غلطانه :]
بس خلاص لا تابعون قتلكم القصه :p
حلو الواحد على الأقل يفرغ روحه .. ويعيش بهالأجواء الروحانيه واهو مرتاح !!
بالنســـبه لي هالرمضان بكون غير عن كل مره .. شلون يعني .. ؟
بحاول إن شاء الله أختم ختمتين بدال الختمه :]... صلاة التراوييح بروحلها المسيد.. كل يوم بسوي حق ألفطور صحن سلطه و طبق حلو لان هذا الي فالحه فيه بس :d ... بحافظ على السنن ...و الله يعيني إن شاء الله J
بكل بساطه مهما اسوي أكون مقصره .. بس الحمد الله على كل حال :]
ومبـــارك عليكم الشهـــر ... والله يتقبل صيامكم وقيامكم
وينعاد عليكـــم وإنتوا بصحه وعافيه :]
إيي صج ..
أنا وعدتكم بحط تغطية السفــــره وطلعـــت الحداق وأم المرادم :]
بس والله هاليومين الي طافوا لويه الواحد يالله يحك راسه :d
وفوق هذا باقوا إيميلي الله يسامحهم :p بس حلالهم مطرح ما يسري يمري :d
فقلت بأجلها عقب رمضان لان حاطتلي خطه بمشي عليها وبما إني بأجلها فراح تصير من الأرشيف يعني مو" "fresh:] فقلت بتعذر منكم
وآخر مره بوعدكم بشي ..لان كل ما اوعدكم يصير شي لووووووول
بس شسوي يا ربي أحب أسوي آكشــن شوي .. وعقب أتوهق :d
على العموم حيـــــاكم الله
وعطوني راييكم بموضوع المسلسلات الي مسببلي قلق :p
هناك 41 تعليقًا:
الله لايهنيهم بالايميل الي باقوه ويارب الله يبليهم
المسلسلات سلاح ذو حدين في مسلسلات كوميديه حلوه وفي مسلسلات مفاصيخ و زارين عن عقلهم احنه نحاول نشوف الشي الحلو المفيد و نبتعد عن المسسلات التافه الي تحرض على البوق والفسق واغلب التمثيلات الي شفتها رايحين فيهاا
لووووووول
حرام لا تدعي عليهم محللتهم انا :d
ايي والله صــاج بس شنسوي هذا ما ادري منو وهاذي خلاجينه ;d
يعطييك العافيه أخوي كويت مستر
وعساك على القوة
مبارك عليج الشهر والحمدالله ما شدني شى بالتلفزيون :)
السلام
رمضان تحول لمهرجان درامي فكاهي في نظر المنتجين والمحطات الفضائية ..
كأنهم يرغبون في تحدي القلوب المؤمنة وتدعوها لترك التقرب للسماء وتدعوه للتمسك في الارض..
نعم رمضان ومسلسلاته ليست جميعها غير هادفة فالحكم بهذه الطريقة انقاص من جهد بعض الاجتهادات لكن في المقابل هناك قضايا لا يجب ان ننكرها بدت لا تشكل ظاهرة يطاردها نواب المجلس الملتحين بل مشكلة قناعة الفرد انه في مجتمع فاسد فإما يتحول لعضو فاسد ويستفيد من الوضع او يرفض الوضع بالتكفير والعزلة..
اعتقد طرح جاد ووقفة جادة من الجمهور الذواق سيجعل من التلفزيون كاملية في البيت خلال الشهر الفضيل..
غير صحيح اطفأ التلفزون بل الصحيح اجلس مع الجميع واتناقش معهم ونحكم العقل فيما نراه..
عموما اختيار موفق واتمنى المزيد من التقدم لهذه المدونة الجادة
وحياكم في مسابقة مدونتي الرمضانية الثقافية..الجائزة مفاجأة
يو تيرن مبارك عليج الشهر والله يوفقج على مانويتيه من خير ويسدد خطاج يارب :)
وان شاء الله تختمين ثلاث ختمات بعد...
المسلسلات مرض حسبى الله عليهم
انا اقول لج شى ..يسمونها مسلسلات كويتية والى يمثلون اما جناسيهم غير معروفة واما عرب واما خليجيات واما عيميات واما عراقيات يعنى شلون كويتية....
بعدين شللى يحلل لهم السهر مع بعض علبوا تمثيل ولى تالى الليل ويلمسون بعض ويتلزقون ببعض ويطقون بعض شهالمسخرةةة ؟؟
واخرتها وحدة منهم قبل شهرين طاحزا عليها بقضية مخدرات تعرفونها اكيد الاماراتية اذا شفتها كل اقول الله يخزيها ...
يمعودة عساج من عوادة ولا تقاطعينا :)
ترى انا عيوني عورتني وانا اقرا
:((
الله يقدرنا ويبعدنا عن المسلسلات
ويوفقنا لطاعته
:)
مبارك عليج الشهر يايوتيرن
ونورتي
:*
أخوي مشاري
علينــا وعليــك إن شاء الله
ويتقبل منا صالح الأعمال يا رب
والله أحســن لـــك :)
إنـــت بنعمــه :]
أخوي كاريكتير
إن لم يكونوا جميعهم فهم الأغلبيه في الظاهر ..
في هذا البوست أنا لا أتهجم على المسلسلات والكتاب جميعهم.. بل فئه معينه للأسف بدأت بالتكاثر !!
نعم يوجد مسلسلات تاريخيه هادفه ..ويوجد برامج تستحق التسمر أمام شاشه التلفزيون .. ولكن ليش على حساب العباده !!
ولكن عندما نشاهــد مسلسل كوميدي .. وتبدأ الممثله بالتمايل والرقص بطريقه تقشعر بها الأبدان وتبدأ مظاهر الخجل و "الحــــره" على وجهي كيف إن أخي وأبي الجالسين معنا يشاهدون ما أشاهده !!هل هذا المشهد يستحق المناقشه أو تحكيم العقل فيه !! لا أعتقد
البوست موجه لفئه معينه ولا اتبع التعميم بالكلام أسلوبا لي لان لو خليت خربت :]
مشكور أخوي على التعليق
ومنور المكان
وينعاد عليك وانت بصحه وعافيه بدون هالمسلسلات المأساويه :]
أفرحني مرورك
وإن شاء الله بنشارك بمسابقاتك :]
علينــا وعليــك
آمييين أجمعيــن يا رب
الله يســـمع منــك أخوي كظماوي :]
إيي والله شي يعور القـــلب
ما أدري ليش هالأشكــال محسوبيين علينــا !!
بس ما نقول إلا الحمد الله على كل حال
الواحد شنو يقدر يسوي
وما يحروني إلا إلي يلملمون وبوسون راسهم @@ يعني أبوهم أو ريلهم !!
الله يستر عليهم بس :]
ما ودي أستاثم عشانهم :d
وينعاد علييك بالصحه والعافيه أخوي
والله يتقبل من الجمييع ان شاء الله
يا قلبي والله نجمه
سلامت عيونج .. قتلكم إلي يدش مدونتي يلبس نظاره شمسيه :d
يالله ما عليه تكبرين وتنسيين :d
آميين يا رب ويسمع منج إن شاء الله
ويتقبل قيامج وصيامج وصالح أعمالج :)
والنور نورج يالغاليه :]
أول شي مبارك عليج الشهر يالغاليه :) وكل عام وانتي بخير
المسلسلات فيها الزين وفيها الشين والي يجبن .. المسلسلات التاريخية لأنها تثبت المعلومات من أحداث وشخصيات أكثر من الكتب .
بالنسبه للمسلسلات الغير جيده .. فالهدف الأول والأخير هو المادة .
فكل مثير مرغووب .. فنشوف بعض المسلسلات مبالغ فيها بشكل كبييير . فقط لجذب الجمهور !!
ألف شكر لج اختي العزيزة وكل عام وانتي بخير
امس ما شفت الا جد ولعب حق امل العوضي
ولاني افصصصصصصل على هالبرنامج استانست عليه
:)
اما البقيه !!! لا تعليق
في سر بقوله لج بعدين
:)
وانا اقول بطلي موااااااااااااعد بالناس لوول
توعدين وتخلفين يا حظي !
p;
أخوي ذا ثنكر :]
علينا وعلييك يا رب
وينعاد علييك بصحه وعافيه .. والله يتقبل صيامك وقيامك وصالح اعمالك إن شاء الله :]
إذا على المسلسلات التاريخيه تهوون :)
أنا أتكلم على الإنحطاط الي صاير
ولا في احترام للشهر ولا شي
الله لا يبلينا بعقلياتهم يا رب !!
وما سوينا إلا الواجب :]
وانت بخير وصحه وسلامه
هلا بالطش والرش ودهن العود بالقرش
هلا بنت العم :]
حيالله من يانا
لووووووول أدري فييج ما تفصليين إلا على هالخبال :d
شنو شنو السر @@
اليوم تقوليينه :d
لووووووول إنزين خلاص لا تفظحيني :d
خلاص يبه زلت لسان ما راح اوعد أحد :d
ما أخلف بس الظروف كله ضدي شسوي :p
مبارك الشهر عليج حبيبتي
و عساج من عواده :)
بالنسبه للمسلسلات اغلبهم سفه
و ربح مادي لا اكثر و لا اقل بس
هم ما يمنع اني في مسلسلات هادفه
و لها معنى :)
ترا ناطرين وعدج متى ما فضيتي :))
و تقبل الله منا ومنج عسى الله
يعينا على صيامه و قيامه
علينا وعلييج يالغاليه:]
صح كلامج :]
إيي إن شاء الله أفا علييج بس أنا أوعدكم بشي وما اسويه لا يمكن :d
آميين يا رب
آني المسلسلات الخليجية بالذات ما أحب اتابعها.. يا خيتي كلها نكد و هموم و ضرب و بجي و انتحار و عنف، ما ادري شالسالفة، الموضوع مبالغ بيه.
يا خيتي قلبنا خلصان، آني صايرة ما أتحمل أسمع أي شي يزعجني أو يضايقني لأن احس خلص ما بيَّ حيل بعد أتنفس..
الواحد يجي يفتح التلفزيون حتى يروح عن نفسه و ينسى همومه يجي التلفزيون نفسه هم ع القلب؟؟ و الله حاله.
تقبلي تحياتي و شكراً على طرح الموضوع
صح .. اساساً لو ما انطالع تلفزيون احسن .. صج فيه جم برنامج يضحك بس مالي خلق الدعايات .. بعد رمضان يمكن اطالع لي جم شغلة تنعاد
الله يوفقج اختي :)
*الخاتــــIraqi Ladyـــووون*
إيي والله أختي التلفزيون صار هم :)
صاجه والله
الله لا ييبلج الهم ان شاء الله :]
العفو ما سوينا شي :]
حياج الله أختي
منوره المكان
ايي والله محد يلوع جبدي غير الدعايات
تكره البرنامج إلي اطالعه والسبه هالدعايات :d
ايي والله زين تسوي
كل شي بعيدونه مليون مره وبتمل منه :]
ويوفق الجميع إن شاء الله
يعطيك العافيه أخوي عبادي وعساك على القوة :]
عيل انا ما ادخل المطبخ
الا مره بالسنه
اذا جربتي ماعون حلو
قولي لنا الطريقه
بالعافيه
مبارك عليج الشهر :*
المسلسلات محاربتها مو عشان مابي أطالع المسخره لا والله الصج الصج ان ماعندي وقت ولو عندي وقت جان طالعت ;a
<-- شفتيني وانا صريحه شحلاتي لوووول
مبرووك عليج الايميل الي انباق وحالج مو احسن من حالي ;q
تحية طيبة و بعد
رمضان شهر المسلسلات السخيفة
الله يهدينا
مانتوفاني
مبارك عليج الشهر
مسلسلات اهو في شي يسوه
بعدين لاكن ما تنكتب جذي تنكتب لكن :)
أختي الغاليه Peace
من عيوني أفا علييج :]
ان شاء الله البوست الياي إهداء مني لــج :d
والله يعافييج ويخلييج لعين ترجيج :]
منوره المكان
هلا وغلا
هلا بكويتنا
انتي ويينج يالقاطعه :d
لووووووووووول يا حلوج وانتي صريحه :]
ايي زين تسويين لا طالعيين لاحقه عليهم:d
ومبارك علينا وعلييج يا رب :D
الله يبارك بحياتج :d والله فكني منه ما بغينا نغيره صارله 5 سنين :d
مانتوفاني
إيي والله صاج أخوي
ويهدي الجميع يا رب
مبارك علييك الشهر :]
ويعطييك العافيه
هلا بمــهندسنا :]
عليينا وعلييك أخوي
والله يتقبل قيامك وصيامك وصالح اعمالك ان شاء الله
إيي والله ماكو شي يسوه وبيني وبينك أحسن عشان ما يشغلون العالم :d
إيي عادي أخوي لاكن ولا لكن كلو نفس بعضو
العتب على النظر :d من العيله والله ومن كثر ما أنا مشتطه ابي انزل البوست :d
بس يعطييك العافيه إنك فطنتني :]
عشان ما أعيدها
السلام
مرحبا
حياج شوفي اللي صار...
سالفه ما تتصدق بالكويت
التفاصيل في مدونتي
عنوان الموضوع
انا وجريدة الجريدة توارد خواطر كلاكيت ثاني مرة@@
حبيبتي ما اعرف ايميلج
دزيلي ايميل عشان الانفايت
شكرا
اي والله صح كلامج
اغلب المسلسلات جذي :)
و رمضان شهر العباده لازم الواحد يستغله بالاعمال الصالحه اللي تزيد من حسناته
و المسلسلات كلها خرابيط و جن احنا عايشين بفساد و مجتمعنا مافيه خير
الله يهدي الجميع ان شالله
و شكرا لج
الصراحه انا معاج او كلامج كله صح .. اصلن مسلسلات هل الرمضان اتفشل حتى ما نقدر انشوفها مع الاهل !!! من كثر سوالف اتسود الويه !!! بس هم في جم مسلسل حلوين او هدفهم سامي مثل الدايه
تبين الصج
انا كل سنة اقول ماني متابعه هالسنة ولا مسلسل وماكو فايدة :( هم اتابع اول شي قلت بس باشوف باب الحارة بعدين قلت لا باشوف باب الحالة وابلة نورة بعدين قمت اشوف التنديل خخخخخ ما نخلص يعني ولا شلون يعني؟؟
وبارك الله فيج صراحة خطج تمام عسى الله يسهلها عليج وبشرينا عسى ماشية تمام؟
صباح الورد
مافي مسلسل حلو هالسنة عجبني بس التنديل
وحسن فتح الباب
التلفزيون صار قرين رمضان مثل الفيمتو:)
ولاتلومين الناس
لومي أهل الفن والأعلام بللي يقدمونه
شكرا يوتيرن
وكل عام وانتي بخير
وبس
بابل
أخوي كاركتير
حياك الله أخوي مره ثانيه :]
وسامحنا على القصور ... ما قمنا نسير على مدونتك وايد :)
الغاليه لوير
دزيته لج :]
ومشكوره وما تقصرين
يوميات مغتربه :]
منور المكان :)
الله يسمع منج
وآميين :)
إيي والله صاجه ... بس ويين الي يسمع !!
الغاليه كويتيه للنخاع :]
حياج الله
وتو ما نور المكان :)
والله الدايه حلو بس آخر الأيام لج عليه شوي صار نفس باجي المسلسلات :] على حد علمي
ويعطييج العافيه
وما ننحرم من مرورج ان شاء الله
أختي الغاليه بنت بطنها
الحمد الله كلو تمام التمام
بس دشة المطبخ لوووووول لج عليها :p
يالله الله يعينج :)
شوفي عادي بس لا تكثريين :)
وانت بخير اخوي بابل :]
وصباحك نوير :d
لا والله اخوي حتى الناس تنلام تقعد تشوفلي ناس تترقص برمضان
وهذا سكير
وهذيك رايحه فيها
و و و و ....إلخ
وناسيين صلاتهم ...,, ومتناسين ان احنا بشهر فضيل
بيني وبينك الكل ينلام :]
وحياك الله أخوي
ومنور المكان
إرسال تعليق