الخميس، 11 يونيو 2009

ال MOOD zFt @@ + بـــــووووم .... قـــــــويه


صباحكم عسل مع القيمر والخبز الإيراني
ومساكم رقيــه بارده تسرسح على الجبد






لا تضحكون على الألوان ما أعرف أدرس إلى إذا سويت الكتاب لوحه فنيه وطبعا هذا يآخذ مني نص وقت الدراسه !!



بلشنــا فاينلز !! وبلش الMOOD يعتفس



أمس كان عندي فاينل قانون تجاري ... الماده وايد سهله والدكتور للأمانه عجيـــب يقولك أخذ A بدون لا تعور قلبك
فيني طبع مو شي !! ما أعرف أدرس حق الإمتحان قبله بمده .. لازم يكون إمتحاني باجر وانحط جدام الأمر الواقع
وأصك على روحي الدار " الغرفه" و أكرف .. وأواصل وأدرس وأدرس وهذا ما فهمته طاااااااف هذا ما حفظته مو لازم

هذا ما أدري شسالفته !! عادي مو أول وحده ولا آخر وحده @@ يعني بالضبط ما ادري ليش أعور قلبي وأفتح الكتاب



على فكره انا أول وحده بالعالم أؤمن بهالمقوله " الوقت كالسيف إن لم تقطعه قطعك " ... وآخر وحده بالعالم أطبق هالكلام
لا تسئلوني ليش !! لان صج ما أدري



بس on the other hand
علي ضمير يقتلني كله يأنبني وتشوفوني بحاله يرثى لها قبل الإمتحان بساعه جنه علي حكم بالإعدام ..!! شوي وأبلع الكتاب :d



المهم مو هذا موضوعنا

الموضوع إني قبل لا آخذ قيلولة العصر طلبت من الوالده العزيزه انها تقعدني !! قلت أصلي العصر وانام لي ساعه
ونقوم نجابل.. أنام نومة الغزلان بالبريه :d
أفتح عيون المها :d ولا @@ الساعه 7 المغرب @@

ها 7 !!

ويييييييييين امي ؟
ليش ما قعدتيني !!وراااااااااي فاينل !! ما درست شي !!
أمي العزيزه: رعيتي قلبي وانا اقعدج @@ وانا كبرت مالي خلق أقعد أحن على أحد .. إداد لي @@
أبوس راسها :* يالله ما عليه بس إدعيلي ما أسقط سهوا :d




أقعد أصك على روحي الدار وأقراوأقرا وأقرا @@ وأوراق ماليه وتجاريه والشركات لها 7 انواع ..رئيس مجلس الإداره
رئيس مجلس الإداره @@ لحظه لحظه !!
ما فهمت " قفل المخ" يعني هذا الي يسمونه chairman ؟؟



يمه .. ما ترد... أعلي نبرتي وانا متربعه على الفراش وماسكه الكتاب يـــــــــــــــــمه
ترد علي بكل حنيه : وااااي يالعيز @@ تعالي هني ما اسمعج !!
يمه يمه .. الحين رئيس مجلس الإداره اهو الي يسمونه chairman
شدراني يا بنيتي !! دقي على ابوج او واحد من أخوانج ؟



أحوووس وأحوووس بالبيت !! ... فجأه أشوف marbel العزيزه تتخطرف بأرجاء المنزل
أنا hi !! how are you ?
تعالي ماربل يو نو وت ذا مين اوف chairman ازت a boss اور وت ؟
ترد ومن الوناسه ودها تلمني @@: نو اتز employee
أنا : لا والله حلفي !! اشوه انج قلتيلي .. ثانكيو يبا ثانكيو الشرهه على الي يضيع وقته الثمين
خل أروح أجابل بس لا اسقط سهوا بسبتج !!
أرد وانا أجر خلفي أذيال الهزيمه
أرد داري العزيزه أطالع الكتاب .. وأكتشف إني مقفله ليش ؟!!

أنا أقولكم ليش ؟

أتصفح الكتاب وأعد جم صفحه باقيلي !! فجأه تطلع بمخي a spot light
الحين انا شكو إذا هذا chiaRMAN ولا EMPLOYEE
لا لااااااااااااا أقفل اصلا مو مكتوب بالكتاب !! ومو مطلوب منا ؟ !!
أرد أنغمس بالدراسه ! وأواااااااااااااااااصل وما أناااااااااااااااااااام آآآآآآآآآآآآآآخ يا قلبي



ويصير الصبح وأطلع من البيت فجأه !! الساعه 9 الصبح ولا الأخ ولد أخوي !! حاطيله حمام سباحه وقاعد يغاوص على قولته !!



أنا: إنت شتسوي بهالشموس @@ ؟ ويين أمك تدري !!
اهو :لا انا قلت حق جووس>>> اسمها لووس :d
وهالهبله شكو مطلعتك لا كبوس ولا سن بلوك ولا شي .. من زوووووووود البياض !؟
وبعدين عفيه خلق من صباح الله خير @@ الناس وراها امتحان ومو شبعانين نوم وانت تغاوص !!

يرد علي بكل براءه: فوفو في وحش بهالديره @@؟

أنصدم أنا وإطقني البووهه @@ ها وحش انت منو قاص علييك !!

لا ماكو وحش بهالديره !! انا اقول غاوص غاوص حبيبي
يرد علي ويين رايحه الكولج @@

أنصرع انا انت شعرفك @@ جان يرد علي خالتي علمتني

ويرد يحن : كله قولي حق الناس انج مو حلوه @@
انا اطقني البوهه مره ثانيه :ليش بعد ؟
يرد علي : تعالي اساسرج : شفتي هالوحش يآكل الحلوين بس !!@@
أرد عليه وأنا أضحك : طل بعينه ما يقدر !!
يرد واهو عافس الويه : ألوووحه @@ لا تقولين طل بعينه !! قولي "الله يهــــــداه".... حده قص ويهي مالي ويه أشوووفه
على فكره عمره 4 سنين :]


جان أنحاش .. رحت الكليه.. رديت قعدت مع ابوي تحلطمت وصكيت راسهم ورحت كبرت المخده

وقمـــــــــت وأنا حدي متعــــــــــــــــسره !!

وكل شي متكســـــــر فيني !!

عرفتوا ليش مزاجي ZFT @@





^^^^^^^^^^^^^^^^^^^^^^^^^^^^^^^^^^^^^^^
حـــــــــــــــاذف الآدمي في " البووووووم"




والله فشله !!
محد مدهور هالبلد غير هالأشكال !! الهيلق والميلق
لعنبوا دارك رايح حق الريال بريولك وحاذفه بالبوم الي بمكتبه ... على الأقل أحذفه بعقالك إنعالك"وإنتوا بكرامه" أي شي
بس مو إب بوووووووووم الريال !!



شي يفشل ويكدر الخاطر
وتسعــــــــون حق الإصلاح ... خيـــــــــــــــــــــــر إن شاء الله !!

انا ليش أحر روحي !! يا مـــــــــالنا من الخير

اللهم طولك يا رووووووووووووووووووووووووووووووووووووح




^^^^^^^^^^^^^^^^^^^^^^^^^^^^^^

"بالضبط هـــذا أنا :d"

الفاينلز اليايين حدهم جايدين !!

@@ الله يستر ويعين ان شاء الله
فلا تتوقعون بوست يديد على هالإسبوعيين اليايين :d


تنويه: ما مداني أراجع البوست كتبته ودزيته سيده " لضيق الوقت"... أي أخطاء مطبعيه .. أو حرف ضايع هني ولا هني .. جمله مو مفهومه !! .. كلمه مالها داعي !! ... طوفها وروحوا حق الي وراها :d .. وإذا ما تتطوف مسحوها بويهي :d

"سامحينا نجمه إضطريت أستخدم الأزرق عشان محد يقول ما قريت :d"



اللهـــم بلغـــت ... اللهــــم فشهــــد :d


هناك 22 تعليقًا:

Enter-Q8 يقول...

اللي ودي اعرفه اشلون طار حق البوم و شاله و العوضي يطالعه
مو راضيه دش بالي السالفة

و الله يعينك على الامتحانات
بس خبري الشيرمن رئيس

-mate يقول...

يو تيرن

يامعودة كلها أيام معدودات وتفتكين، وإذا خذيتي صيفي هم أيام معدودات وتنقضي، قصي على عمرج يعني

عدل كلام بو وليد، خبري شيرمان رئيس اللجنة مو الموظف. شكلها ماربل إمضيعة

ويالله بالتوفيج إن شاء الله
:)

esTeKaNa يقول...

مسا الورد كله
مسا شركه محاصه ومقفله ومساهمه وربعها
:))
تذكريني بنفسي
انا كنت اتمغط وفجأة يصحى ضميري واصير جني مينونه ودي بالضبط اكل الكتاب كله
:))
الله يحفظج ويبارك بوقتج ويرزقج الدرجات العليا بالدنيا والآخره
واماااااااااانه
حبي لي هالمزيون ولد اخوج خفيف الطينه يا حلاته
:)

mtfa2el يقول...

لوول
ذكرتيني بتجاري 10
هذا حدي اللي وصلته بالسوالف التجارية
و بعدين كعادة الكويتيين تيمع فلوسك و تسوي روحك بو العريف و تدش البورصة و آخرتها تبط على أفاك لا من فلوسك ولا من ويهك
any hoo

لا بعد ما خلصت عبالج خلصت ؟؟
صج باتحلطم شوي
الحين يكون هالتصميم اليديد غير عن القديم
كله اسود باسود ماكو فرق !!
لي الحين شعور فلم الرعب موجود
:p

رورو الشخبوطه يقول...

السلام..


اول البوست كئيب ذكرني بماضي الاسود خخ اول شي مادرس الا بالليلة الامتحانات لا واتنح ع اول صفح و قبل الامتحان بشوي اطير الصفحات خخ..

واي ايام تنذكر ماتنعاد..

لا وحزة الامتحانات كل شي يتسلط ويصير حلوو النوم والسباحه والرياضه والجمال خخخ..

وموفقه يارب خيتوو..

ويونس ولد اخوج بسم الله عليه الله يحفظه يارب..

طموحة مملوحة يقول...

لوووووووووول


نصيحة شيلي التلفون من الصورة لأن ماراح تقدرين تدرسين منه لوووول

غير معرف يقول...

الله يعينج وييع.. انت علوم ادارية؟

{~المباركية~} يقول...

اتصدقين همن انا جذي
قبل الامتحان بجم يوم على بو انه بدرس افتح الكتاب اقعد اسرح و افكر و اصلح لما يضيع الوقت احس مالها داعي هالدراسه اقوم اشبك وبعدين انام هذا سستمي

يحليله ولد اخووج يوونس الله يخليه لكم
لالا خليه يسبح زين يسووي عشان اذا كبر يصير سباااح مثلي p;
ياحلو الحوض حلوااه

موفق لي ولج بالامتحانات وللجميع

7osen يقول...

دائماً بالامتحانات النهاية يكون المود معفوس والتفكير مشدود

حاولي ترتبين نفسج وتكونين ريلاكس

وبالتوفيق إن شاءالله

Makintosh يقول...

عاد قانون تجاري تهبل الماده وصج مفيده كلها معلومات

الله يوفقج ان شاء الله ويسهل عليج الامتحانات


اما سالفه البوم قويه وتفشل وتخدش الحياء

Blog 3amty يقول...

جمعية القلاليف الكويتية تستنكر الإعداء الغاشم على مجسم البوم !

ReLaaaX يقول...

@@ ؟


آنا راده عليج ليش ماطلع شي :/

عفره يقول...

الله يوفقج يارب
و قلبوووسي ولد اخوج حده اينن
اسم الله عليه وربي يحفظه
هاذي زيارتي الاولى هني بس وااايد حبيت يور بلوق

Q80 Blogger يقول...

بالتوفيق :)

terkwaz يقول...

يووو تيييرن


انا مارحت بعيد عنج :sSs
انا سيم سيم انتي

عندي امتحان جاايد عقب باجر
تتصل علي زميله اقولها مادرست
تنصدم تقولي حدج انتحاريه لوووول


تدرين شيلي الموبايل واللاب من المكان اللي قاعده فيه
وحطي جدامج بطل ماي وساعه
ونثري اغراضج وبدعي بالدراسه لووول

لوول انا اعطي نصايح ماطبقها !!



الله يسهلهااا
GooD LuCK

Q8 TeaCHeR يقول...

بالتوفيق عزيزتي (",)

حَافِـيَةُ الَقَدمَيّـنْ ولِبَاسِي المَطـرْ يقول...

يقولون دراسة الجامعه احلى شي
جنهم غلطانين مو p;?
الله يسهل عليج قولي امين

kazmawy يقول...

لوووووووووووووووووووول
والله اقول وين يوتيرن فاااقدها
وين فوق تحت
وين عكس السيوين وزيرة المواقف والمظلاااات
لوللللللللللللللل
اثاريج بامتحااان
لا يباا
شدىىى حيلج وان شاء الله الايهات مالها اخر يارب"))
بس طمنينا عليجججج

شركة المثالية يقول...


شركة تنظيف منازل بالخبر
شركة تنظيف مسابح بالخبر
شركة تنظيف مكيفات بالخبر

شركة المثالية يقول...


افضل خدمات التنظيف بالدمام تجدونها مع شركة تنظيف مسابح بالاحساء شركة المثالية للتنظيف المتفوقة والمتقدمة دائما لانجتزتها وخبرتها الكبيرة التي قدمتها لعملائها بالجودة والمواصفات القياسية بالاسعار المناسبة والجودة العالية بخصومات تصل الي 50% مع الضمان للجودة

شركة تنظيف مسابح بالدمام

المثالي ماكس يقول...

شركة تنظيف بالجبيل
شركة تنظيف فلل بالجبيل
شركة تنظيف منازل بالجبيل
شركة تنظيف شقق بالجبيل

المثالي اون لاين يقول...

شركة تنظيف فلل بالجبيل
شركة تنظيف شقق بالجبيل
شركة مكافحة حشرات بالجبيل
شركة تنظيف منازل بالقطيف
شركة تنظيف فلل بالقطيف