بهالبوســت حبيت أغير شــوي ..,,
وأكتــب شي ما كتــبته ..
ونكســر الروتيــن شوي ..,, قبل لا أنزل شي ما قريتووه إلي توهقت فيه ;p
المهم بالموضوع الحيين إني فكرت وفكرت شكتب .. شقول !
وسرحت شوي ..وإذ بي أدخل عالم الخيــال اللا مــحدود ..
قــلت بكتــب حلم يقظــه ..
بكــتب قصة وحده "بس أكييد مو أنا "
ما ادري صــارت من قبل او لا .. الله يعلم يمكن تصيير ليش لا ولو اني ما اعتقد !!
المهم ,,,
بكتــب حلم شــاب أو شــابه..يمــكن حقيقه..أو خيـــال..
يمــكن تكــون قصــه تعيشهــا أنــت في يــوم من الأيــام !!
تنــويه : بكتــبها بلســان " أم مويضي" بــس القصــه لا تمــت لي بأي صــله
تقول "أم مويضــي": نفس كل بنت بعمر 21 سنه كانت عندي أحلام كبيرة .. وأذكر أيام الثانوية كانت أكبر أهتماماتي " طلعات مع رفيجاتي.. سوالف الثانويه "هاذي سوَت وهاذي حطت.. وشطانتها.. يمعتنا مع بعض ودراستنا" لي آخر سنه لي فيها .. قمت أفكر بأشياء ثانيه بحفلة التخرج .. وبنهاية هالمرحله وبداية مرحلة يديده..بداية حياتي الجامعيه ..شلون بتصير ؟ .. وشنو التغيير الي بصير؟ راح أتأقلم بهالمرحله أو لا !!
المــهم أول ثلاث سنين أنقضت وأنا بالجامعه كانت شي يديد شي غير !!.." محاضرات..دكاتره.. استقلاليه ..حرية تعبيــر..وصلاحيات وايد.. والأهم سيارتي وأنا الي أسوق مو سايق"..
آخر سنه لي بالجامعه بديت أفكر بنهاية هالدرب وبدايه مرحله يايه مهمه .. قمت أحاتي .. متى بيلي النصيب ؟ ومتى بتزوج ! وشلون .. ومنو بيكون .. وشلون شكله.. شخصيته ..إلخ ؟ وكل ما طاف الوقت كل ما بديت أخاف إن يطوفني القطار "مثل ما يقولون"
المهم في يوم من الأيام وفي آخر سنه لي في الجامعه و تحديدا عقب آخر محاضره بهاليوم .. وأنا راده البيت وكانت حالتي يرثى لها " تعبانه.. ودايخه .. سرحانه .. ومومنتبهه.. وبالي بعيد.. بالي بالغدا وشنو طابخيين..وأقول بقلبي يارب مجبوس دياي لاني ميته من اليوع"
المهم وانا راده من شويخ ومتوجهه حق العديليه ... وقفت بالإشاره المعتاده وكان جدامي "جيب بورش أبيض ..كايين مثل ما يسمونه.." , رفعت عيني ولا الإشاره خضـراء اللون .. وبما أني مطفوقه بطبيعتي ومستعيله على غير سنع !! حطيت ريلي على البانزين من غير ما اشوف جدامي .. ودست بانزين.. شوي ولا انا داشه بالسياره الي جدامي..من قــوة الطقه ..هزيت السياره هز..
المهم إني أخترعت وما عرفت شسوي .. توني ماسكه التلفون بدق على المنقذ أخوي وإذ بإثنين ينزلون من السيارة .. وإلي كان يسوق درعم صوبي وويه حده أحمر ومعصب !! شوي ويفجر فيني
وقف عند دريشتي ..فتحت الدريشه جان يهب فيني "إنتي عميه ما تشوفيين؟ الله يهداج في أحد يدعم جذي ؟فتحي عينج قبل لا دوسيين "...ما تشوفون إلا أنا اهني أخنقتني العبره وبدون لا أحس إنزلت أدموعي حان أقوله وانا" اتنهوص" لاني قاعده أبجي:"سامحني أخوي ما أدري !!".. مسكين أهوه أهني تغير ويهه وقالي:" سامحيني أنا ما أقصد..بس سيارتي توني مطلعها من الوكاله "عاد الولد صاج السيارة بقراطيسها"..بس يبــه خلاص بالحديد ولا فييج خلاص لا تبجيين"...ما أدري ليش حسيت بشي غريب "ماني قاصه علييكم واقولكم سوالف أفلام سعاد حسني وأحمد فهمي وحب من أول نظره وما ادري أيش" لا حسيت أنه خووش ولد ومحترم حيل وما أغبي علييكم والحق ينقال الصراحه الولد كان مملوح بعد :p
المهم دقيت على أخوي .. وصل وكلمه.. ما رضى ندفع شي .. وقاله:" كافي سلامتها ومعرفتكم".. وقام يسولف مع أخوي بالشارع وخذوا أرقام بعض.
المهم.. رديت البيت وخذيت محاضره من الوالد الله يخليه ويطول بعمره .. بس طول الوقت كنت بعالم ثاني .. كنت أفكر بالي صار !! ومستغربه شلون في أحد جذي بهالزمن.. وكأي بنت بدت وياي أحلام اليقظه ..ونمت بليل وانا أحاول أقنع روحي ان إنسان محترم ..متخرج ويشتغل بشركه خاصه إلي كونها بنفسه..!! مع إن شكله عمره صغير وبجماله وجمال أخلاقه أكيد بيختار بنيه حلوه.. جسمها يعقد.. معني ما فيني شي جني البخت ومملوحه "بس ماكوو ثقه"!:D
المهم نمــت وانا أقول حق نفسي خليه بس حلم ... ولا تحاوليين تقنعيين روحج إن هالإنسان ممكن يصير من نصيبج بيوم من الأيام !!
بعد شهر إلا يوميين تقريبا... أبوي ناداني عنده بالدار وقالي:" يابنيتي في واحد متقدملج وخوش ولد الكل يمدح فيه"... وليما قالي فلان الفلاني أنصدمت .. وطقتني البوهه بويه الوالد@@... ما صدقت .. يمكن ربع ساعه على ما استوعب ..قالي أبوي "ها شرايج ..بالموضوع".. أنا وأنا مستحيه وويههي أحمر من الإحراج :" الراي رايكم انت وامي .. والي تشوفون ان فيه مصلحتي بسوييه ..وبقلبي أقوول يبه من صجك أكييد إيي بدون لا تسأل "
المهم قــابلته وفعلا كان نفس الشخص إلي دعمته...
الشخص إلي كل بنت مهما طلبت وتمنت تلقاه بهالإنسان ... الحمد الله ربي عطاني على قد نيتي (قال تعالى في سورة النور{الْخَبِيثَاتُ لِلْخَبِيثِينَ وَالْخَبِيثُونَ لِلْخَبِيثَاتِ وَالطَّيِّبَاتُ لِلطَّيِّبِينَ وَالطَّيِّبُونَ لِلطَّيِّبَاتِ أُوْلَئِكَ مُبَرَّؤُونَ مِمَّا يَقُولُونَ لَهُم مَّغْفِرَةٌ وَرِزْقٌ كَرِيمٌ}
صدق الله العظيم ).... عطاني إنسان إلي فعلا يحبني ويخاف علي وشاريني بكل ما عنده.. في النهايه ملجنا وتزوجنا.. وكانت حفلة العرس شي مو طبيعي جنه من ألف ليله وليله ..وانتهت قصة حياتي ..وبديت قصه يديده مع إنسان أصبح كيــاني !!
......................................................................................
بالنهايــه .... نشكــر "أم مويضي " الي زارتني وخلتني أحلم معها هالحلم!
عــاد يا بنات مو باجر كل وحده داعمتلها واحد عنبو بتتزوج :p
ويحطون البلشه علي:D
الشاطر الي يقول جم مره قلت .... المهم..؟ :p
البــــوست اليــاي إن شــاء الله "شــي ما قريتــوه" ;p
لاتحطون ببالكم إن شــي خيــالي عشـــان ما تنصــدمون:D
هناك 49 تعليقًا:
9 المهم
غير المهم مالت السؤال
الي تكملهم عشره
اثول الصراحه
الحين مكسره سيارتك تروح تتزوجها
عشان باجر تعيش بشويخ .. يا داعمه بسيارتها ولا بسيارتك .. وانت عابل عاد
وناطرين الشي الي ماقريناه الي فوق الخيال والي راح يكسر الدنيا
وأوووووووول تعليق :)
يــعطيــج الـعافيــة اخــتي
علــى الـقــصة الصــراحة وايــد عجــبتني
و إن شــاء الله انــشوف الــي اللـي ما قريــناه
نــاطريــنج ;P
: )
اختي فوق تحت
اول شي احب اقولج عندج ابداع بكتابة القصص
ثاني شي ام ميضي يعني ام مويضي ؟؟
ولا اسمها ام ميضي ؟؟
ثالث شي
ما فيني شي جني البخت ومملوحه "بس ماكوو ثقه"!:
كل هذا ماكو ثقه ؟؟ الثقه شلون صايره عيل ؟؟
رابع شي
ما صارت شي ما قريناه !! هل هذا البوست يعتبر ترقيعه ؟؟ ام مماطله ؟؟
خامس شي
جيب بورش كايين " مثل ما يقولون " ؟؟
اكيد مثل ما يقولون ؟؟ اذا خاطرج فيه قولي عادي P;
سادس شي
مادري ليش احس عندج علاقه مع الدعمات !!
هل مر عليج شعور الدعمه والفشله ؟؟
سابع شي
ليش البنت دايما تكون مفهيه الولد ما يفهي ؟؟
ثامن شي
ادري طولت عليج بس وايد عجبتني القصه وحبيت افصفصها حته حته
مــبــدعــه عزيزتي
ناطرين يديدج
أخوي q8i blogger
لووووووول الصراحه ما عديتهم بس إجابتك صح
وبعدين ليش أثول هاا .. شافها خوش بنيه ليش ما يتزوجها
.. لوووول ايي نطروا شوراكم ما وراكم شي :p
ولا ترفع وايد الحين الأوادم ينصدمون ليما يقرونه ;p
ويعطيك العافيه على المرور
وعلى أول تعلييق دوم مو يوم :D
الله يعافييج ويخلييج وبيت مكه يودييج أختي همسة وتر
منوره المكان ..,,
وحياج الله ..:]
بتقرينه إن شاء الله
هلا وغلا بالأخت شلالات
أول شي تسلمين .. ومرورج الإبداع
ثاني شي .. عدلناها عشانج .. ومو لازم تصيدين كل بدليه ;p
ثالث شي .. أنا مالي شغل سألي أم مويضي :D
رابع شــي ..,, الإعتراف بالحق فضيله "ممــاطله" لان بصراحه ماكو وقت :D
خامس شي ... والله يا وخيتي خاطري اب BMW X6 إذا تبيين تهديني إياه جزاج الله خير
ســادس شي ... "الجذب خيبه" ايي والله دعمت :D وتصير بأكبر العوايل ترى ;p
سابع شي ... هالسؤال يبيله إستفتاء:p
شدراني انا :]
ثامن شــي ..,, الحمد الله إنها إعجبتج وتسلميين على مرورج الحلو
ونورتي المكان
وعساج على القوه
من باجر بدعم بس اخاف يطلعلي واحد امبتلع اوملسوون اهي عاد شسوي خخخخخخخ ماكو إلا اتصل علي 777 وقولهم شوفوهذا لاحفني هع هع
حيـــاك ..ج! الله غير معروف
لوووووول عاد انا مالي شغل الحمد الله
الله يعيين الأوادم :]
يسلموو على المرور
رووووووعه القصه بس
ليش قلتي خيال ممكن تصير
و هذا اذا ما صارت وايد بعد
بس حلو التنهوص طيح الولد
بغرامها و نسته الدعمه لووووووول
تسلم ايدج و يعطيج العافيه
بنتظار شي ما قريتوه ^_^
دمتي بحب
أفلام سعاد حسني وأحمد فهمي وحب من أول نظره وما ادري أيش
::::::::::::::::
صباح الورد
صراحة قصة حلوة حلوة حلوة
بس أبعرف منو أحمد فهمي هههههه؟
يمكن قصدك حسين فهمي والا شرايك؟؟
ضحكتني كلمة تنهوص :)
ناطرين البوست الياي على نار
مدونتك روعة ولي حضور دايم أنشاء الله
وبس
بابل
يعني
اكو واحد تكسرين سيارته ويقول لج بالحديد ولا فيج
ولا اهم شي سلامتج
انتي صج حلمانه
ماكو ترى مااااااااااكو
غسلي ايدج
او انه اثول مثل ما قال كويتي بلوقر
:))
محاولة جيده
بس المره اليايه عطيها شوية واقعية
سلام
هلا وغلا بقلب طفله ..,,
منوره كالعاده :]
الروعه تواجدج الدائم :)
والله ما ادري يمكن ليش لا..,,
ايي شفتي شلون على طول نسى الدعمه لووووول
الله يسلمج ويخلييج لعين ترجيج
الله يعافييج
ويعطييج العافيه على وجودج :]
صباح النور وتغريد الطيور
حياك الله أخوي
لووووووووووول قلت عسى محد يطيح عليها مالي خلق أغيرها لووول
سألت أمي شسمه المملوح الي كله مجابله أفلامه جان تقولي أحمد رمزي لووووووول
عاد أنا قلت أجمع الأثنين أحمد رمزي و حسين فهمي
وعاد أخوي يعني طوف شوي :p
حياك الله أخوي وتنورها :]
هلا بالزين كله :]
لوووووووول مسكيين شفيكم على الولد
لا فيه فيه "إن خليت خربت ":D
عاد تصدقيين لو بنتكلم بالواقع صاجه ماكو ... :]
وااااااي عاد لا تحبطيني انا مستانسه على الولد ;p
وبعدين خلوني أحلم شوي لو بكتب عن الواقع بصير البوست كآبه وبجي وعوار راس :D
بعض المرات يكون الحلم أمتع وأحلى من الواقع ولا إنتي شراييج :]
الأحلام و تغيير الخطط و الأفكار
دليل على صحة العقل و مواكبة الحدث
و لكن كثرة الأحلام دون محاولة القيام بها و الإصرار على تحقيقها هو دليل على الهلوسة الفكرية و التفلسف الزايد.
بوستك جميل و أنتظر جديدك عزيزي مع تحياتي لك و مرحبا بيننا
السؤال اللي يطرح نفسه
اهي شنو سيارتها!!
لا يكون قرمبع :P
فعلا الأحلام زي ما آل سي اولد وول
تتغير
وطالما كان الإنسان في حراك مع ذاته
فالأحلام بإذن الله تتحقق
خوش شيء
بس اللون واللي يسلمج
شيلي هالأسود :)
حياك الله أخوي عتيج الصوف
للتنويه يعني إذا ما تدري أنا "بنت " :D
امممم يعني الحيين لازم اروح أدعملي واحد عشان أحقق الحلم ولا تصير هلوسه :p
بس من ناحية التفلسف المشكله اني مو مقصره فييه :D
أعتقد إنك تقصد الحلم ..,, الي يمكن يتحقق حق هدف بالنهايه :)
أما حلم من الخيال او حلم يتعلق بحادثه معينه فما أعتقد ان يصير هلوسه فكريه او تفلسف زايد ... ولا إنت شرايك :]
تسلم أخوي
ويعطييك العافيه على المرور :)
حياك الله أخوي عتيج الصوف :)
لووووول ما أدري أسألها وأردلك خبـــر :p بس أعتقد مرسيدس مديل 98:p
تسلم تسلم
ما أحب أرد أحــد
بس إنت يبتها بالصميم صعبه صعبه :p
لان البوست يبرز مع هاللون يونس :]
ثلاث ألوان لا تحاجيني عنهم .. أحمر ,رمادي وسيد الألوان الأسود :p
إن شاء الله عقب سنه بسوي حق البلوق نيو لوك بصير شي خيالي لا تنسى تمر عشان تشوفه :]
نورت أخوي
وحياك الله
ومو آخر تسيوره إن شاء الله :D
لوووووووووووووووووووول ..
مادري ليش اقرا القصه وميته ضحك ..
عاد أخاف صج صايرلج هالموقف ؟؟
إعترفيييي ;a
يعطيج العافيه على القصه الونيسسسسسسسه ..
وترى ما صارت شي ما قريناه ..
أطالب السلطات بتحويلج إلى أمن الدوله عشان نعرف شنو آخرت الشي الي ما قريناه ;q
تقبلي مروري ..
kuwait
لووووووووووول لا لا لا تقعديين إدبسينها فيني ;p
لله يعافييج ويخلييج لعين ترجييج
دوم مستانسه يا رب :]
لووووووووووووول
واااااااااي أمن دوله مره وحده :p
نطروا شوي شوراكم :]
شكلج بتنصدميين إن قريتيه :p
على كثر ما تحنين تبين تشوفينه :]
ان شاء الله يكون على قد المقام :p
منوره ومنوره ودوم منوره
الله لا يحرمنا من مرورج
ماابي اتخيل لان الي بتدعم سيارتي ماادري شبسوي فيها ... واحد سواها وماصار بسيارتي شي بغيت اذبحه
مافيني رومانسيه اذا سيارتي صار فيها شي الا سيارتي :q
الله يوفقج
و إنشالله دايماً نقرا اليديد
وتلومين عتيج اذا ما ثبت انج بنوتة :P
شوفي ردج علي :>
الله يحقق لج كل احلامج
بس عاد مو تروحين وتكسرين سيارته عشان تتزوجينه...ترى يحقد عليج ويذكرج بالسالفة طول عمره وعمرج:p
لوووووووووووول
اييي والله صج بالاحلااام
لا تخافين ماراح نسويها لأن ماكو واحد
جذي اصلا :P
قصة ممتعة ..شكراا ام مويضي
بانتظااار شي ماقريناه :)
eng_q8
لووووووووول من حقك من حقك لووووول :]
الله يعيين الي بتدعمك شكلها ما راح تنسى هاليوم :p
حياك الله أخوي
ويعطييك العافيه على المرور
ويوفق الجميع إن شاء الله
حياك الله أخوي hamdool
ابيه ابيه سوري :D
العيله وما تسوي " طفاقه زايده هالأيام " :P أعذرني أخوي ولد الديرة :D
يقول المثل " العياب عند الباب " :p
بس يالله سامحنا هالأيام ما أدري شفيني ما أثبت :S
فتى الجبل
الله يسمع منك إن شاء الله :] وأصير مديرة أد الدنيا :p
لا لا ويي إسم الله علي من الدعمات..,,مشكلتي إن دعمت أتسلط وادعم الناس الي لسانها طويل :]
يعطيك العافيه على المرور أخوي
دوم هالضحكه :]
منوره المكان نجمتنا
حياج الله
أشوووه طمنتيني
الممتع تواجدج الله لا يحرمنا منه
يعطييج العافيه
وايد حلوة القصة
ولمن اقول حلو اعنيها من قلبي
حياك الله أخوي حسافتج يا كويت
حلت دنياك أخــوي
أشــوه إنها عجبتك :]
يعطييك العافيه
ولي حق ام مويضي وين صايره هذي الاشاره لانه فيه ناس وايد يبون يروجون هناك ويدعمون يمكن ترهم وياههم
اسف كل كلامي بدليات
قولي حق ام مويضي وين صايره هذي الاشاره لانه فيه ناس وايد يبون يروحون هناك ويدعمون يمكن ترهم وياهم
لوووووووول
عاد خالي متزوج بنفس الطريقه
بس اهو اللي داعمها
جد نصيبك حيصيبك
اما سالفة البجي بالحوادث لووووووووووول
فلم الدمعه بالمخبه
مرحبا
عجبتني القصة واايد حلوووة
وممكن تصير في الواقع لأن لكل شي سبب
والسبب في زواجهم كان الحادث الغير مقصود
ومشكورة أم مويضي على هالقصة الحلوة
صراحة أنا قعدت أفكر في البوست اللى تقولين شي ماقريتوه يعني شنو بيكون
ترى لازم يكون صج ما قريناه ولا راح نزعل
مالنا شغل إنتي قلتي
:)
مدونتج حلوة
:)
لوووووول مسموح أخــوي barrak :]
المشكله مو الأشاره المشكــله بالناس الي واقفيين بالإشاره:P
بس ولا يهمـــك أسألهــا وأردلك خبر :p
حيـــاك الله :)
وعساك على القوة
كويتيه حساويه :) منوره المكان
ومو آخر التسيورات ان شاء الله :p
صج مشــاء الله ... الله يوفقهم :]
ايي لووووووول البنات حافظيين السيناريو ... يدعمون وينزلون دمعتيين :p
حياج الله
ودوم نشوفج هني مو يوم :)
مرحبتين..,,
حياك الله أخوي 70sen
ايي والله صــاج يمكن التصير ليش لا !
أم مويضي تقولك العفو وحياك الله :D
لا لا لا تفكر وايد :P
أخاف تنصدم:]
لا بلا عيل زعلتوا :P
من ويين أييبلكم شي ما قريتوه بروحي متوهقه فيه :P
لا لا بس إن شاء الله بيعجبكم :]
بس بيكون واقعي شوي
تسلم أخوي من ذوقك :]
حياك الله وعساك على القوة
WOW ! very nice wa mo2athera ba3ad !
خوش قصة بس صج مل تمتلي بصلة
P:
انا أكثر من مرة كله ادعم بنات و مرة دعمني ولد و إنزف حوادثي ماكو رومانسية مرة وحدة
لوووول خوش قصه يعطيج العافية
لا يا معوده ما تسوى عليهم بناتنا الحين يبتدون يدعمون بخلق الله على بو بتتزوج وآخر شي من مخفر لي مخفر ومن قراج لي قراج
Thanx alot ,,..my Bro"loco":D
mro0ork el nice :p
7ayak alla BRO
هلا والله أختي shahad
منوره :]
لوووووووووول الله يهداج أكثر من مره بعد يعني مو مره :p
شكلج خبــره :]
يعطييج العافيه على مرورج
الله لا يحرمنا منه :]
هلا والله ببنت بطنها :]
حياج الله ..,,
أسفرت وأنورت وإستهلت وأمطرت :D
لووووووووول ايي والله ..,, الله لا يقوله :p
عاد بناتنا مشاء الله عليهم ما يصدقون خبر أي شي في كلمة زواج يسوونه:D
منوره المكان خيتوو
وعقبال ما تنورينه بالبوست الياي إن شاء الله :]
القصه تعبر عن حلم كل بنت اول ما تسوق
كله تبي تدعم
توقف السياره
اي موقف يصير ويعجب فيها واحد سنع ويخطبها
وتمر السنين وتتغير حتى الاحلام
:Pp~
خوووووش قصة
:)
وسامحيني على التأخير
هلا وغلا بإستكانه ..,,, تو ما نور المكــان
أسفرت وأنورت وإستهــلت وأمــطرت
ايي والله صــاج بس ترى أنا مو منهم :P
مرورج الخـــــوش :]
معذوره يــا الغــاليه
مــا ننحــرمش منــك :)
الله شنو راح احسدج على هالريال بس ما عليه اظحك معاج بس اذا تزوجتيه قوليله اذا عنده اخو حقي :)
اخاف اعنس ويطوف القطار علي جم مره :) لوووووول لا انشاله لا ..
لوووووووول لا تحسديني انا حسدي ام مويضي :p
انا بريئه ما أدعم أوادم :D
خلاص أفا علييج نطلبلج مثله :p
آمري إنتي بس :]
حياج الله نورتي المكان :]
إرسال تعليق