مسَاكم الله بالخير
والنويَــــر !
بيني وبينكم ...كنت منهم !!
كنت كله أحكم على الناس من أول مره أشوفهم .. من أول كلمه يقولونها !!
أحكم من مظاهرهم !!
أذكر اول ما دخلت الجامعه .. وأول كلاس دخلته ..قعدت يم وحده كانت ماده البوز شبريين @@
جان أقول بقلبي ويي الله يعيني أنا ويين قعدت !! شكــلها قــــشَـــره وما تتحاجه وشكلي ببتلشت فيها
بس بعد جم يوم بدت تآخذ وتعطي وياي .. وطلعت خوش بنت وطلعت ظالمتها..يمكن بذاك اليوم كان عندها شي او متضايقه من شي عشان جذي كانت مبوزه :] ... وقلت بقلي انا ليش كله مطيوره وأحكم على الناس بسرعه !!
ومن ذاك اليوم غيرت هالشي فيني وبدييت ما أحكم على الناس من أفعالهم او مظاهرهم ...بديت أشوف وأدرس هالناس والزين أقربه مني والشين أوخر عنه :)
والحين قمت أستغرب من الناس الي يحكمون على المظاهر أو حتى من اول كلمه تنقال !!
الواحد لازم يفكر مره ومرتيين وثلاث قبل لا يحكم على خلق الله
يمكن في ناس يشوفون وحده سفور ويقولوون ويي هاذي ما تستحي !! أو حتى يشوفون وحدة لابسه عباة ومحجبه ويقولون هاذي خوش بنت !!
وفي ناس بعد يحكمون من المواقف ... يعني مثلا هاذي سلمت على واحد على طول قالوا هاذي ما تستحي @@
يمكن أخوها ..ولد عمها يصيرلها !!
ليش تتسرعون بالحكم وتستاثمون فيها ؟
المهم...
الي خلاني اليوم أتكلم عن التسرع بالحكم على الأوادم قصة هالبنت
يقولكم في يوم من الأيام ...هذيك البنت كانت قاعده مع رفيجاتها بمكان عام .. عاد ويين؟ الله أعلم! ...
المهم..
الطاوله إلي مجابلتهم كان فيها شباب قاعدين !!
خالد وبدر ومحمد
والبنت كانت مجابله بدر وخالد ومحمد معطيها ظهره :p
يقولكم في يوم من الأيام ...هذيك البنت كانت قاعده مع رفيجاتها بمكان عام .. عاد ويين؟ الله أعلم! ...
المهم..
الطاوله إلي مجابلتهم كان فيها شباب قاعدين !!
خالد وبدر ومحمد
والبنت كانت مجابله بدر وخالد ومحمد معطيها ظهره :p
المهم...
خالد : بدر تشوف هاذي البنت الي ماتت وإهي تخزك !!
بدر : إيي بس أنا قلت يمكن قاعد أتوَهم :S
أخاف البنت قاعده إطالع شي وراي !!
محمــد: وين وين ؟؟ أي بنت ؟؟
خالد : هاذي الي قاعده بالطاوله إلي جبالنا!!
محمــد: إيي والله @@... شعلييك بو ناصر عاد ترى مملوحه !!
بدر: إذبحتني ما أحب أحد يخزني وأنا آكل !! المشكله أكاسرها بعيني ولا تشيل عينها @@
شنو ما تستحي هاذي ماكو حيى .. ماكو غيري بهالمكان يعني !!
محمد: بدر سو روحك ثقيل وما تعطي ويه ... وجنه مو هامك
خالد : إيي إيي إحقرها ..!!
بدر : عاد والله ما همتني خلها تخز لين تنعمي عينها @@
محمد: عاد ما خزتك إلا إنت @@ الله يعينها شفكها من لسانك :D
خالد:هاهاهاها...إيي والله صاج الله يعينها !!الحين بيَسطر فيها قصيده :p
بدر: إيي والله... أنا أعلمها ..بكتب فيها جم بيت عشان تتعلم !
وقال في هالبنــت:
كل شبر بهالوسعيـه ملـك ربـي تعلميـن
وأعلم إن اللي خلقني هو خلق لـك هالعيـون
لكن انتي من جلستي وانتـي فينـي تحدقيـن
كن ما به ناس غيري بهالكراسـي يجلسـون
لو سمحتي عاد سمعي وحتى لو ما تسمحيـن
المهـم اللـي بقولـه تسمعينـه و يسمعـون
ع الأقل لين نظرتك سـوي روحـك تستحيـن
غضي طرفك مثل غيرك خوف ربعي يلمحون
الركادة عاد زينة والحياء فـي البنـت زيـن
وفيـك جآزم لا ركـادة ولا حيـاءٍ يـذكـرون
تعرفينـي ؟! أعرفـك ؟! ماأذكـر إنــا ملتقـيـن
لا أعرفك من تكوني و لا تعرفي مـن أكـون
وإطمأني إن كان قصدك بس فينـي تشبهيـن
ما هـو أنـا إلي تعرفيـه والبشـر يتشابهـون
مـا دريتـي من التشابـه يخلـق الله أربعيـن
وأعرف أربع يشبهنك بـس والله يستحـون
وإن كان قصدك شي ثاني عاد قولي وش تبين
خايف إنا نصير فرجة وإللي ماشترون يتفرجـون
وإذا ببالك عاجبتنـي لا يحوشـك تحلميـن
صح ربعي من جمالك فيـك صـار يمدحـون
بس وش لي في حلاتك دام فيهـا ترخصيـن
حشمة البنـت وحياهـا والكرامـة يلفتـون
ولو توفر فيك هـذا مـع حلاتـك تبشريـن
ما هو أنا ألف غيري بـاب بيتـك يطرقـون
وش علامك رغم كل اللي أقولـه وتسكتيـن
مو طبيعي هالسكوت وهالبـرود وهالسكـون
إنتـي خرسـا أسألـك ولا منتي تسمعيـن؟؟
قالوا ربعي ذي كفيفـة قلـت لا لا تمزحـون
لين شفتك يوم رحتـي يمسكونـك باليديـن
ما دريت إلا عيونـي أربـع أربـع يذرفـون
آه ياني منه مشهـد يـوم شفتـك ترحليـن
جيت اشوف عيون ربعي لقيت الكـل يدمعـون
قلت سنّـة هالحيـاة وحـنا ترانـا مؤمنيـن
الله اللـي مسيّرنّـا بيـن كافـ وبيـن نــون
وكل أبونا نختلف مع إننا مـن أصـل طيـن
سبحان يلي مصورنا ولله في خلقـه شـؤون
يعني حنا كل أبونـا عـاد إسمنـا بنادميـن
وليا قضى ربك أمر وقـال لـه كـن فيكـون
فينـا يلـي رازقه خيـر رب العالمـيـن
وفينا يلي هو لعطفه بحاجة القلـب الحنـون
وفينا يلي مـا شكـى مـن علـةٍ كالآخريـن
"صـمٌ و بكـمٌ وعمـيٌ فـهـم لا يفقـهـون"
بس قليل عـاد فينـا للنعـم هـم شاكريـن
والله يرزق هالخلايق من حيث هم لا يعلمون
وتدري عاد يالكفيفة حنا تراى متشابهيـن
وإن ماانعمت أبصارنا قلوبنا هـم إللي يعتمـون
يالكفيفة يالعفيفـة إن قلـت آسـف تقبليـن؟؟
يغفر الله ذنوب عبده ليا خطا وهـل تغفـرون؟؟؟؟
إيي طلعت البنت عميه @@..الله يكافينا ويكافييكم الشر
والولد حكم عليها على طول @@ إنها تخز وما تستحي !
المغـــزى من الموضوع
"لا تستعجـــل يا بني آدم بالحكـــم"!!
للأمانه الكتابيه... القصيده مو قصيدتي طبعا :D
بس القصه من وحي خيالي :)
وحياكم الله :]
هناك 48 تعليقًا:
http://holpe.blogspot.com/
غير معرف
nice to see you here :p
ما أعرف أقرا إلا عربي و أطقطق بالإنجليزي
sorry Bro :p
هالبوست روعه
عجبتني القصه
والقصيده واصلتني على الايميل ومن كثر ما عجبتني قريتها اكثر من مره
حتى انا لما دخلت الجامعه كنت احكم على الناس من مظاهرهم
يمكن لانه كانت بيئه يديده علي
واشكال اول مره اشوفها
يمكن لاني كنت بروحي ما اعرف احد
وخايفه من الكل
ويمكن من كثر ما ابوي حرصني على صداقاتي .. خفت منهم وتحيرت منو تكون رفيجتي
اول كلاس داومت فيه .. دخلوا ثنتين وحده منهم لابسه شورت .. طارت عيوني لما شفتها .. وعلى طول حكمت عليها انها رايحه فيها .. واستحي حتى اكلمها
وكانت هالبنت معاي بكل المواد لمده سنه كامله .. صارت رفيجتي حيل .. ومشاء الله علاقاتها الاجتماعيه وايد
الصراحه اهي الحين مو رفيجتي
وشوي اهي غير عنا ما قدرت اتوالم مع معتقداتهم بما انهم حيل فري واحنا شوي ملتزمين .. بس الصج انها خوش وحده
وما شفت منها شي
عجبني البوست
فعلا موضوع جدا مهم وحساس
وفعلا ممكن نحكم على اوادم وايدة انهم كذا وكذا لكن بالواقع غيير
عموما انا اعرف واحد تزوج بنت خالتة وقبل لا يتزوجها قان يقول عنها قشرة وتلوع الجبد ونفيسة
ولكن يوم صار الغزو واضطرتهم الضروف يعيشون في بيت واحد اكتشف انه غلطان وانة مافي ارق منها بالكون وبعد التحرير زادت علاقتهم اكثر واكثر وتزوجوا سنة 1994
والحين عندهم 3 اولاد وبنت وعايشين مستانسين الحمد للة
لازم نروض انفسنا انها ما تتسرع بالحكم على خلق اللة
وموضوعج وايد حلو ومفيد
أختي shlalat
ايي والله حتى انا وصلتني بالللإيميل وحبيت أسويلها قصة وأحطها لكم عشان تستفيدون :]
ايي وايد ناس جذي يحكمون قبل لا يعرفون الشخص وليما يعرفون يكتشفون ان رايهم عنه غلط 100% !!
حلوه الركاده :)
وانج تعرفيين الناس بعدين تحكميين
شي يسعدني إن البوست أعجبج :]
وأنا عجبني مرورج وايد يالغاليه
والله لا يحرمنا منج ومن مرورج:]
مشاء الله :]
الله يخليهم حق بعض إن شاء الله
وبخلي عيالهم لهم :)
سبحان الله ما تعرف الناس عدل إلا بهالمواقف :]
الله يهنيهم ان شاء الله
ايي والله صاج أهم شي ان نروض نفسنا وما نتسرع بالحكم
مرورك الحلو أخوي
وحياك الله
ويعطييك العافيه
الله خوش موضوع ,,,
صاجه يالغاليه حرام الواحد يحكم علي الثاني من غير ما يعرفه....صج حررررام
وفي مثل ينقال الي ما يعرفك ما يثمنك
حقيقه ما فيني هالصفه ولاكن اعاني منها ,,ولاني هاديه نوعا ما واتحاشا الكثير من العلاقات
واااااااايد عقب ما يقعدون معاي ويعرفوني عن قرب ...يقولون لي اول ما شفناج قلنا واي شكلها شايفه نفسها
وما تتحاجي وبعدين نكتشف العكس !!
وتم علاقتهم معاي وما يقاطعوني
وما زلنا
خوش بوست ضربتي علي الوتر يا حلوه
هلا بالغاليه صبا
منوره المكان :]
ايي والله بس ويين الي يسمع
ما تحسين بهالشي إلا ليما تصادفينا بحياتج :)
عاد تصدقيين ولا مره حسيت إنج شايفه نفسج :)
مرورج الحلو يالغاليه
عسى الله لا يحرمنا منه
يعطييج العافيه
:D
يوترن كنتي منهم
انا عكسج عندي حسن الظن بالكل
و لو شكلهم يوحي بشي اقول لا
داخلهم غير و ادري هالشي غلط
صفه سيئه في بعض الاحيان ..
و المصيبه انا يحكمون علي شكثر
قبل يعرفوني بالغرور و النفسيه
و لما يعرفوني العكس تماما ..
اقدر اقول صفه بشريه التسرع
و الحكم على الغير و صدقيني الناس
مخابر مو مناظر و جوهر ..
سبحان الله
بعد فترة من معاشرة الناس
تكتشفين معدنهم :)
تسلم ايدج ع البوست الحلووو
دمتي بحب
هلا وغلا قلب طفله
صج قلبج قلب طفله :]
الحمد الله إني كنت !!
وبالعكس شي حلو إنج تحسنين الظن حتى لو كانوا الناس عكس هالشي ...
على الأقل ما إستاثمتي فيهم :)
وما أعتقد إن حسن الظن بكون غلط :)
بالنسبه لي الي يشوفج مغروره و نفسيه
ما يعرف يحكم على الناس :)
الله يسلمج ويخلييج لعين ترجيج
مرورج الحلو والله
لا خلى ولا عدم :)
ما قمت أحكم على الناس من شكلهم من مواقف كثير هذي أقلها
تعرفت على بنتين و حدة سفوووووووور مزعج و وحدة متحجبة و مسجات دين و من ما تعلمون
نبدي بالمتحجبة :
مر فلان : هذا فعلته و تركته وع جبع ويه مادري من هاللي فيه إبيرضون
مرت فلانة : طالع شكلها بصورها إبموبايلي أنوريها باجي ربعنا يضحكون
و الأخلاق اللهم يا كافي ، أكثر من موبايل و اقولها ليش يا فلانه إتقولي كلها تلفون مرة بدق عشان وحدة بشوف هالفلان إشقصته و من يكون و بلغها عن الإتصال و المضمون
أقولها يا فلانة يوزي من سوالفج و توبي إتقولي أنا اتوب و السجادة اللي فارشته و المسجات اللي منها تشكرون اكثر من جذي بعد إشتبون
إنروح للسفور : الله أكبر أذن إمشوا إتصلون؟ ، يحليلها أقول لنفيسي إطلعت من ربعنا الساجدون
مر فلان : مشاء الله جميل و اخلاق و الناس فيه يمدحون و ما عليج من الكلام الفاضي إتقولي هذا يقولونه ناس من ربهم ما يخافون و ما قصدهم إلا يحسدون
مرت فلانه: مالج شغل إب شكلها تقولي ترا مخها نظيف و طيبة و الكل فيها يموتون بس هقوتج بعض الناس إبشكلهم ما يفطنون
المتحجبة ولت أيامها عندي و صارت خبر كان و عنها ما ودكم تدرون ، و السفور أحبها و الله إخليها لي و توني سادة منها التلفون
ايي والله سبحان من خلق وفــرق !!
الغاليه شهوده :]
إستمتعت وانا أقرا تعلييقج ...
حسيت إنه بوست مو تعلييق :)
صكيتي على بوستي :p
شرفني مرورج
الله لا يحرمني لا منج ولا منه إن شاء الله :)
انصدمت الصراحه @@
ماحب هالقصص .. عميه .. مسكينه !!
مشكوره :>>
اخيتي
اللقافه اقسام
والكلام اللي قلتيه احد اقسامها
الحكم السريع
وحده تقولي : يعني شلووووووووون ما افكر باللي حوالييييييييييي يا عتيجه انا حساسه ما احب اكون سلبية ما اعرف ما افكر هذي شفيها مطنقره وهذا شفيه انفيسه
رديت عليها: لأنج ما قاعده تفكرين بنفسج
وهذي المصيبه
وكونج قمتي تلتمسين العذر هذا شي يدل على نضجج
المهم عبارتج هذي :)
(وفي ناس بعد يحكمون من المواقف ... يعني مثلا هاذي سلمت على واحد على طول قالوا هاذي ما تستحي @@
يمكن أخوها ..ولد عمها يصيرلها !!
ليش تتسرعون بالحكم وتستاثمون فيها ؟)
يعني اذا ما كان اخوها او ولد عمها ماتستحي؟؟؟؟
مو يمكن زميلها
صديقها
ولد يرانهم
دكتورها بالجامعه؟؟؟!!
;)
نرجع للموضوع الاساسي احنا شكو
:)
تدرين شنو موضوعج مهم
صج صج وايد مهم
لازم نتانى بكل شي
واهم شي بالحكم على الناس
مانخلي نخلي تنبؤاتنا تحكم عل كيفها
والله القصيدة تبجي
لين شفتك يوم رحتـي يمسكونـك باليديـن
ما دريت إلا عيونـي أربـع أربـع يذرفـون
آه ياني منه مشهـد يـوم شفتـك ترحليـن
جيت اشوف عيون ربعي لقيت الكـل يدمعـون
صج عورت قلبي :(
مشكورة وايد
أخوي q8i_blogger
لوووووول
ما تشوف شر أخوي :]
ايي والله مسكينه شفت شلون @@
يعطييك العافيه
وعساك على القوة
وما ننحرم من مرورك إن شاء الله
صبا
العفوأختي
نورتي المكان والله بطلت الثانيه :]
حياج الله :*
أختي الغاليه عتيجه
حياج الله
ومنوره والله بمرورج الأول وإن شاء الله مو الأخير ...
اممم تهقيين !! هذا نوع من اللقافه ؟!
يجوز ليش لا :)
وصح كلامج يمكن يكون زميله أو دكتورها !!
يصير ليش لا ومو عيب :]
بس ماتطرقت حق هالمسأله لان مو نوعي أني أسلم على زميل او دكتور إذا شفته بمكان عام :)
والناس أنواع :]
ايي والله وانتي صاجه إحنا شكوو :p
يعطييج العافيه
وتسسلميين على مرورج الحلو
والله لا يخلينا إن شاء الله :)
نجمتنا الغاليه :)
اسم الله علييج من عوار القلب :]
ويين الي يسمع هالكلام
حلو إنا نتأنى بكل شي مو بس هالشي
بس بوطبيع ما يوز عن طبعه !!
وهاذي طبيعة البشر شنسوي
العفو وايد :)
ومشكوره وايد على مرورج
وما ننحرم لا منج ولا منه إن شاء الله
القصة حلوة وراكبة عالشعر
ولكن ليش اللون الازرق والصفر والخلفية سودة
انعمت عيوني وانا أقرى ×:
-
عن روحي ما احكم عالناس من اول مره (:
أخوي يعقووبوو
مرورك الحلو أخوي
وحياك الله :]
أعتقد هذا أول مرور لك إذا ماني غلطانه :D
إن شاء الله ما يكون الأخير :p
أما بالنسبــه حق هالألوان :D
أحب هالألوان لووول وخاصه مع الخلفيه السوده أحس تريح عيوني :p
وبعدببن هاذي "حـــركات " عشان تشــد القارىء :D
بس ولا يهمك أغيرها
كلش ولا تنعمون :p
منو يقرا مدونتي بعديين !!:]
يعطييك العافيه أخوي على المرور
وحياك الله
وعساك على القوة
كلمات رائعه ..
لله الحمد لست منهم ممن يحكمون بالنظرة الأولى ..
ولكني املك طباع مشينه أخرى كم أود التخلص منها ..
فكثير ما يبين على وجهي علامات الإستياء في حال وجود شخص متلون أو شخصيه لا أحب طريقتها في التعامل ..
لا أعرف صيغه للمجامله ودائما ما أجدني عفويه ومثل ما يقولون بالكويتي أقطها بالويه ..
يعطيج الف عافيه على البوست الممتع ..
وصج صج ضحكتيني بردج على الكومنت الأول ياحلوج دمج عسل ;)
تقبلي مروري ..
kuwait
الغاليه "كويتنا " :]
وجودج الدايم أهو الرائع والله :)
عيل يا بختج والله يديم هالنعمه علييج :]
ولا تخافيين بالنسبه إنج أتقطينها بالويه هذا شي حلو :p على الأقل أحسن من ما تتصنعين وتصيرين ام ويهيين :)
عاد مو تقطينها بالويه وايد :p وبعديين يصير شي جايد ويلوموني انا :D
الله يعافييج يالغاليه
والله لا يحرمنا منج إن شاء الله :)
دوم هالضحكه .. وما تفارقج ولا يوم إن شاء الله :)
لووووول يا حلوج إنتي والله ويا حلو سوالفج إلي توسع الصدر
:]
لا خلى ولا عدم :)
جميلة القصيدة و ما تحمل من معاني
راقية .. شكرا جزيلا
و اللهم اعنا على شكرك وذكرك و حسن
عبادتك (:
أختي بصمه مناريه :)
منوره وحياج الله
:)
الأجمل مرورج
والأرقى كلماتج :)
اللهم آميــــــن
تسلميين على مرورج
وعساني ما انحرم من هالناس الطيبه :)
ماشا الله مدونتج واايد حلوه
وخص هالبوست يجنن ..
عرفتي تركبين القصه على القصيده ..
فعا لازم ما نحكم على الناس من مظاهرهم
لن هذا ما يمنع انه المظهر بعد ياثر ف الجوهر ...
مشكوره حبوبه
ولاهنتي ياربي
الفوشيه ..:)
حياج الله ومنوره المكان ,,
مرورج الحلو ^_^
ايي أكييد الواحدلازم مايحكم على الناس من مظاهرهم :)
اكييد للمظهر دور بس مو رئيسي :]
آميين ولا يهينا أجمعيين ان شاء الله
تواجدج أسعدني
الله لا يحرمني منه :)
التسرع بالحكم على الناس من اول مرة ظلم كبير
لازم نحكم بعد العشرة
وقصة البنت العمية تقطع القلب والله
وقصيدة بمحلها وعاش اللي كتب كلماتها الحلوة
شكرا عزيزتي
وبس
بابل
أخوي بـــابل :)..,,
أكييد ظلم ..,, وترى مو شي هين إنك تظلم الناس !!
انا ما اقول نحكم بعد عشره على الأقل على الأقل ... نعرف الناس قبل لا نحكم نشوف تفكيرهم مو نحكم من كلمه او من مظهر !!
سلامتكم من عوار القلب :]
مو انا الي كاتبتها :p
بس عاشت أيامك
وحياك الله
ويعطييك العافيه
وعساك على القوة :]
غورقت عيوني وانا اقرى القصيدة :(
اول مرة وما اعتقد بتكون اخر مرة إلا اذا نزلت المواضيع عن هالمستوى الممتاز d-;
أختي قلم حبر :)..,,
عسى ما تدمع عينج من شر ;)
وما تشوفيين غير دمعة الفرح ..,, قولي آميين :p
حياج الله :)
وأسعدني مرورج وايد
أخوي يعقووبوو :]
حياك الله :p
وإن شاء الله ما راح تنزل عن هالمستوى:p
بس ..اممم ما فهمت شقصدك من "أول مرة ":p
:D
ويعطييك العافيه
وعساك على القوة
طالت الغيبه..
طمنينا عنج حبيبتي وعسى المانع خير .. :)
يوترن
شهالغيبه خيتوو ؟
عسى المانع خير يارب
ناطرينج
واي عورتي قلبي :(
معني قاريتها أكثر من مره من قبل بس القصة اللي قلتيها قبلها والاكشن اللي سويتيه دمعت عيوني لول
بيني وبينج انا ساعات اصير مندفعه بس على بطت جبد اكثر انا دايما عندي الناس زينه وعلى كثر ما انصدم ما اتعلم ما ادري لي متى
صاجه المفروض ما نستعيل بالحكم سواء بالسلب او بالايجاب
يعطيج الف عافية عالبوست
يا سلااااااااااااااام والله قصه روعه .. تسلم ايدج اختي الكريمه ،، والله موضوع حساس ومهم حيييل .. أشكر على هالاسلوب ويعطيج العافية على هالطرح الجميل المبدع :)
أختي الغاليه
"kuwait"
تسلمين على على السؤال يالغاليه :)
الحمد الله المانع خير
وأدري إني مقصره بس شسوي هالدنيا ومشاغلها:)
وبعدين بيني وبينج بهالشهرين الي طافوا حسيت اني مقصره بحق اهلي ما قمت اشوفهم ... فقلت نخلي النت شوي ونتفرغ لهم :)
الله لا يحرمنا منج :*
الغاليه "قلب طفله "
أنا بخير دامكم بخير :)
المانع خير ان شاء الله
بس تدرين نتغلى شوي:p
لا والله يعني الواحد لازم يتفرغ حق عمره وحياته شوي :) وانا أحس بالايام الأخيره صارت المدونة حياتي كلها .. فقلت أكسر الروتين وأغييب شوي لين يصير عندي شي يستاهل كم تقرونه :)
والله لا يحرمني لا منج ولا من سؤالج يالغاليه :)
الللللللللللللله، ذكرتيني إبموقف حصل لي!
عندنا بالجامعة موظف كله أشووفه بالكافتيريا يتكلم مع رفيجه بلغة الإشارة. ورفيجة أعرفه وأسلم عليه وأدري إنه يتكلم. يعني الحين المفروض إن رفيجه (أصمخ وأطرم).
أشووفه ذاك اليوم ولاا بيده موبايل!!!
سيدة قلت شالمصيوود هذا بيسوي أكشن إشارات جدام الناس. ولما قعد اتصل
vedio call
وحط الموبايل على ستاند وقام يتكلم بالإشارة. آنا هني ما قدرت، رحت له سلمت عليه وسويت له حركة (إنت على راسي).
والتقيت بنفس اليوم بصاحبه اللي اعرفه وعلمني جم حركة بلغة الإشارة وصرت أسوولف وياه، مثل:
(إشلوون الأهل؟)
(ماشاءالله)
(شنو تشتغل؟)
(متزوج؟ وجم ولد وبنت عندك؟)
طلع ماشاءالله زوجته وبناته الثلاث وولده الوحيد وجم إخو عنده كلهم نفس حالته، وموظف بالجامعة.
خذيت رقمه (مسجات طبعاً) وتواعدت وياه بلقاء شطرنجي قريب!
مشكوورة إختي على البوست الرائع :)
مشاء الله
الله يهنيهم اهو ومرته
إذا لعبتوا قولنا منو فاز :]
mate
شاكرتلك مرورك أخوي :)
وإن شاء الله مو الأخير
لا خلى ولا عدم
:]
الحمدلله عساج دووم بخير ^_^
و عسى الله يخلي لج اهلج و يخليج لهم
و تغلي خيتوو تمونين :)
دمتي بحفظ الله
منتظرين لما يطري ببالك موضوع يديد
بس بصراحه اشتقنا
حلفييييييييييييييي!!
شنو هالغييييييييييييبه ؟؟
ماتدرين ان الغياب ممنوووووووووووع ؟؟
والا ترى الإزاله بعد بتحوش مدونتج :|
والإزاله المدونيه قادمه بقيادتي ;q
ناطرين البوست اليديد ;)
تقبلي مروري :
المدونه المتقاعده ..
kuwait
هلا بقلب طفله
آميين ويخلييج لعين ترجيج إن شاء الله :)
أخوي براك
ما تفقد غالي إن شاء الله :)
أفاأفا ليش غير معرووف @@
هاا
ويي ويي لا عاد كلش ولا الإزاله
وبعديين ترى ولهنا عليج ما يصير جذي :)
ما تفقديين غالي يا رب :)
الله لا يحرمنا منج
إرسال تعليق