السبت، 2 مايو 2009

لأني كويتيه لازم .....!!



بوست اليوم عباره عن تحلطم بما تحمله هالكلمه من معنى :d
فسامحوني ماكو مقدمه :d

Note :
ما مداني أصور فاضطريت اني استعين ب GooGle
وبعض الأخوان والأصدقاء :d
فسامحني اخوي mate تسلفت منك صورة عصير الضاحيه
ومنتدى q8yat.net بعد ما قصروا وياي عسى ما كتبت شي بقوقل اطلعولي :d
*******************************
لاني كويتيه لازم !!
___________
لأني كويتيه
لازم ألبس تاج بو ريش او ورده على كبر دماغي
س:ليش؟
ج: لان هبه .
Note:
قبل أول ما ادخل المحاضره أحاتي وحده حجابها بو تفخه تقعد جدامي وتسكر الشاشه
الحين قمت احاتي وحده تدخل لابسه هالتاج تقول حمامه راكه عليها وتحجب عني الرؤيه @@

^^^^^^^^^^^^^^^^^^^^^^^^^^
لأني كويتيه
لازم يكون عندي black berry or I phone
Why ?
ج:لان هبه
Something to say :
بكفتيريا الجامعه
تتمخطر جمان حامله معها طابوقه
تتوجه نحوه طاولتنا @@ ألجح الطابوقه وانزل رأسي للأرض ظنا بي انها سوف تفلعني بها من المسج الي دزيته @@

جمان بكل وداعه ودها اتعلق الطابوقه بروش على هدومها : باركولي شريت بلاك بري
يوتيرن : على البركه عسى لذيذ مو حامض @@ الله ذكرتيني بأيام امريكا كنت آكل بلاك بري خيالي
جمان : وااااااي يوتيرن امبييه من أي عصر طالعه
يو تيرن : شنو شنو @@
جمان : بلاك بري يا حظي موبايل يديد كل الكويت هابه فيه
يو تيرن : وليش شاريته شنو فيه زود عن السوني
جمان : ما ادري للحين ما تعلمت عليه
يو تيرن : @@ عيل شكووو شاريته دام ما تدرين شسالفته !!
جمان : غيري احسن مني كل الكويت عندهم منه !!
يو تيرن : الحمد الله يا ربي انج ما تصوتين جان رحنا وطي !!


شركة زين بعطيكم فكره ما ادري مسوينها من قبل او لا !
شرايكم تحطون دعاية حق البلاك بري >>>> ((هب مع الهبـــه ))وواحد منسدح على بطنه شابك على النت ويكتب بوست :D
صدقوني بتزيد مبيعاتكم 100%
^^^^^^^^^^^^^^^^^^^^^^
لاني كويتيه
لازم كل يوم امر على عصير الضاحيه او كيفان !
لماذا؟
لان هبه !

How you doing !!?
في بريك الساعه 12 في أزقة الجامعه
مناير : يوتيرن تيين معانا
يوتيرن : ويين ؟ ودي اروح الصيدليه عندي جم شغله ابيها
مناير : لا لا بنروح نشرب عصير
يوتيرن : حلو ودي بعصير تين شوكي مال الخالديه
مناير : لا شفييج بنروح الضاحيه
يوتيرن : @@ لا لا ما ابي تدرون فيني ما احب هالمكان ولا اواطنه !!
مناير : خلاص عيل نروح كيفان وعقب نمر فيج الخالديه تشترين الي بخاطرج !
يوتيرن: وليش الخساير @@ بعد كلهم عصير نروح الخالديه مره وحده
مناير : وااااااي انتي شفيج شخباري منو يشرب عصير من الخالديه !!
يوتيرن : الله يعينكم على روحكم .. أدري لا تكملين بتقوليلي هابين بالضاحيه وكيفان !
^^^^^^^^^^^^^^^^^^
لاني كويتيه
لازم أعلق على سيارتي نجمة شوارفسكي !
pourquoi ?
لان هبه !
Good for you !!
يوتيرن : بالمبارك مناير على السياره يعطيج خيرها ويكافييج شرها
تزينينها ولا تزينج
مناير : تسلمين بعد قلبي انتي اول وحده بتركبها
يوتيرن : مشكووووره , عاد ما قلتيلي شنو تبين هدية سيارتج اليديده
مناير : أبي نجمة شوارفسكي !!
يوتيرن : @@ حرام علييج لاعت جبدي منها
مناير : شكووو انا ابيها عاد كيفج
يوتيرن : أدري لانها هبه !!
^^^^^^^^^^^^^^^^^^^^^
لاني كويتيه
لازم أحب ماكي غصبن علي !
¿por qué
لان هبه !

Weeeeeeeee3@@
مريوم : يوتيرن ترى باجر بنطلع نتغدا بره
يوتيرن : ليش ما قلتلولي من قبل تدرون لازم اقول حق امي قبلها بشهر عشان ترضى
مريوم : عادي انا اكلمها
يوتيرن : ليش الفظايح :d خلاص انا اتفاهم معاها بس وين بتروحون ؟
مريوم : ماكي
يوتيرن : ويييييييييع ما ابي أول وآخر مره ليما وديتوني ما كليت يوم كامل .. إييب المرض ماكو اكل مثل الأوادم الله يزيد النعمه
مريوم: الكل يبيه إلا انتي
يوتيرن : لان هبه !! ولا ما ادري شلاقيين فيه !!(فلافل أشرف )أحلى منه بمليون مره @@

^^^^^^^^^^^^^^^^^^^^^
لاني كويتيه
لازم أسوق رينج / كايين !!

perchè?

لان هبه !

Fact :
بروحي بالسياره
أتحلطم
يوتيرن : جدامي رينج ... وراي رينج.... يميني رينج ... يساري رينج every where range range !!
بعد 30 دقيقه
يوتيرن : يبه تصدق اليوم بالإشاره جدامي ووراي ويميني ويساري كله رينجات !!
ابوي الله يطول بعمره : لا ايي وبعدين يا بنيتي
يوتيرن : لا يبه وايد كل الكويت يسوقون رينج
أبوي : وليش حاطه دوبج دوبهم كيفهم
يوتيرن : @@ ما ادري بس اكييد هبه
ينقز بو زياد : وتدرين ان نص هالأوادم مآخذين قروض عشان هالرينج الي ما عاجبج
يوتيرن : @@ الله يعافيهم ولا يبلانا فســــــــــــــــــــق @@

^^^^^^^^^^^^^^

لاني كويتيه

لازم أتكلم بالسياسه !!

为什么?

لان هبه !


Why Not ?
الدكتور يسأل : منو بالدائره الثالثه ؟ ومنو بالأولى ومنو بالثانيه ومنو بالرابعه !!الدكتور مره ثانيه : شرايكم بأسيل العوضي ؟ و رولا دشتي ؟
وحده الله يذكرها بالخير : رولا[ لا لا لا ]
الدكتور : ليش ؟ حاضرتلها ندوات او شي ؟ تعرفين برنامجها
البنت : لا بس مو حلوه وحده طول عمرها عايشه بره الكويت تدخل مجلس الامه وبعدين اهي اصلا كلام مو عارفه تتكلم كله تتكلم مكسر
الدكتور : وشرايج بأسيل ؟
البنت : خوش وحده تستاهل الواحد يصوت لها
الدكتور : ليش شنو عاجبج بطرحها عطيني سبب
البنت : كلامها ذرب وهاديه وراقيه ولبسها حلو
الدكتور : وطرحها ؟
البنت: شلون يعني ما فهمت !!
يوتيرن "تتحلطم بينها وبين نفسها " : يا ليتج لو ما تتفلسفين !! انتي ويين والسياسه وين !! وبتصوتيين بعد ؟! لا بالله كدينا خير !

^^^^^^^^^^^^^^^^^

I think for now its enough

ماله داعي اكمل مع العلم ما خفي اعظم


My comment :
يا بنات ديرتي
يااااااااااااااااااااا بناااااااااات بعضكم مو كلكم
لا تصيرون امعات !!

من هو الأمعه ؟!
الذي لا يدرك من الأمر شيئا ولكنه مع من غلب

يقول الرسول صلى الله عليه وسلم: " لا يكن أحدكم إمعة يقول: إن أحسن الناس أحسنتُ، وإن أساءوا أسأتُ، ولكن وطنوا أنفسكم إن أحسن الناس أن تحسنوا، وإن أساءوا أن تجتنبوا إساءتهم "....


وفي مثل هؤلاء يقول الشاعر :

مَشَى الطاووسُ يوماً باعْوجاجٍ ... فقلدَ شكلَ مَشيتهِ بنوهُ

فقالَ علامَ تختالونَ ؟ فقالوا : ... بدأْتَ به ونحنُ مقلِدوهُ

فخالِفْ سيركَ المعوجَّ واعدلْ ... فإنا إن عدلْتَ معدلوه

أمَا تدري أبانا كلُّ فرعٍ ... يجاري بالخُطى من أدبـوه

وينشَأُ ناشئُ الفتيانِ منا ... على ما كان عوَّدَه أبــوه

ما قلت لا تلبسين !! ما قلت لا تشترين بلاك بري ! ما قلت لا تشربين عصير َ!! ما قلت لا تتكلمين بالسياسه ! ما قلنا لا تآكلين ...إلخ


بس خل يكون عندج رايي
فكري .. قبل لا تسويين شي
فرضي شخصيتج
مو ويين رايحين معاهم
مع الخيل يا شقرا !!>>> ما ادري هل اهو غباء او تقليد او ضعف
شخصيه


لا تخلين غيرج يقودج !!
ليما تسويين شي او تقولينه عطي سبب
قولي هالشي عاجبني انا عشان جذي بسوييه
مو تقولين غيري سوا عشان جذي بسوي

ترى صج الأمعه عاله على المجتمع !!
وصلنا حق حاله !! حتى بالتصويت هبـــــــــه
والله أصوت حق فلان الفلاني
لان الكل يقول عنه خوش واحد !! ويطالب بالإصلاح
الكل يقوووووول !! وانتي ؟ انتي شتقولين ؟!

أدري كتبت ووجهت كلامي حق بني جنسي يمكن لاني عايشه بينهم و اتكلم من تجربه !! وواقع اعيشه واشوفه كل يوم
فلا تلوموني !! من حرتي والله

صح ولا انا غلطانه ؟!


هناك 64 تعليقًا:

Paris يقول...

لوووول ضحكتيني و الله

صج انج عجيبه تونسين

و شيوله كل هالهبات بعد مالها داعي كلش :\
و ع طاري التاج بو ورده عوده جنه مال الرقاصات الاسبانيات و هذوله الي يلبسون ريشه الي فيها ورده عوده
تدرين المدرسه منعوهم و أي وحده تلبسها يكسرونها لها لووول

لان كثرت الشكاوي عليهم ما نقدر نشوف السبوره.. حرام عليهم
و كلشي ننقله من على اللوح قلط منهم

بس بعد ما ايوزون تدرين الحين اشسووا قاموا يرفعون شعرهم و يلوتونه و يحطون عليه مليون ربطه او شماغ بس عشان تصير تفخه عوده

حمدلله و الشكر

joe يقول...

اخييه نسينه ماكلينا
نسينا ايام تلفون بشار
نسينا ماكنا نقعد بالحدايق
اييه كله نمسح من دفتر التاريخ

لكويت بالحقيقه و الواقع شعب معاهم معاهم عليهم عليهم

يوتيرن تعالي جمعيتنا رميثيه عصيرهم شحلوه

ترى همن دندوش عنده سندويجات حلوه عجه و كباب و شيش طاوق و مشكل


اي والله مع الخيل ياشقرا

Kuwait يقول...

@@
عصير عليه طابور لما الدوار ليش ان شاء الله ؟
علني ما شريت عصير لامن الضاحيه ولا من كيفان :\
على طاري البلاك بيري كان بخاطري بس مو عشان هبه لا والله بس عشان أشوف الي
اعرفهم وين رايحين خو لان يصيدهم ;q

`~MnO YeNSa! ~` يقول...

صاجة
احنا شعب نحب الهبة
عبالهم .. شي حلو
مساكين .. مايدرون ان ما عندهم شخصية :S

المشكله كل شي كل ..ما بس على العصير و الmobile
على كل شي

الله يستر علينا
و الحمدلله والشكر


خوووووووووووش بوست :*

`~MnO YeNSa! ~` يقول...

مو*

ساره النومس يقول...

عصير كيفان احلا كميته اكثر لوووووول


والله توني ادري عن هالتاج من وين طلع ومنو افتى ؟؟؟ لووووول شسالفة البنات الحين ؟؟؟

يبا خليج انتي غير وتميزي :)

Mamloo7a Q8ia يقول...

كلامج صح وصح وصح
حتى المرض ياوخيتي بالكويت هبه
الله يكافينا وياج الشر

الفراغ ذابحهم
وواحدهم يقلد الثاني
بلا هدف ولا معنى

مع الاسف هذي الكويت
صلي على النبي
:)

رورو الشخبوطه يقول...

السلام..

عيل انا مو كويتيه خخ..

بس التاج حلو اذا كان ناعم ..

انا اليوم شفت ورده اكبر من راسي ذكرتي بكبوس امي بعرسها خخخ..


و عصير كيفان جربته بس قبل سنه او اكثر ايام الجامعه وكان عادي اساسا ابتلشت فيه ماحب العصير وايد خليته بالسياره جان تقولي رفيجتي ماشربتيه اخذيه شربيه مع الريوق اهي اهي ماحب اشرب عصير مع الاكل احس بطني يعورني..

عقبها ماطلبت منه خخ..

خو مااسوق و بالسياره يااغفي او اسرح او اقرا او اقرق او اتدهن او البس دلاغي فما انتبه ع السياير ال2..

جني قرقت وايد..

بس خوش بوست..

الله يعطيج العافيه يارب..

enter-q8 يقول...

ابد منتي غلطانه الا صاجه و اللي يقول غير هالكلام حذفيه بقوطي عصير الضاحية و يكون نصه متروس

ولد الديرة يقول...

لول

بوست صريح اشكرج عليه

يا شين شيء ما شابه اهله

بالمناسبة البلاك بيري مال ناس عندهم شغل :>

mtfa2el يقول...

لا تواخذيني و لحد يزعل مني

بس أنا اعتبر الهبة مع الناس لمجرد ان الناس هابين بهالشي مرض نفسي يحتاج حق علاج .. هالناس لو يحسون بالقناعة شلون حلوة و مريحة فعلا ما راح يدورون غيرها

الموضوع كله بالتربية لو الواحد من صغرته يتربى على انه يمد ريله على قد لحافه جان ما شفنا هالموديل

القناعة كنز لا يفنى

خوش أبيات اللي حاطتهم :))

Najmah يقول...

لوووووووول
ترى اشتهيت عصير
^_^
اي والله
الكويت كله هبااااااات
وعلى هالبلاك بيري
انا شككله منرفزني
مافيه شوي ذرااابة
مادري شلون كل البنات عاجبهم
!!

بانوراما يقول...

يقولون حتى الطلاق والزواج

والخدم صايرة هبة

يعني لو واقفة على اللبس جان زين

fatto يقول...

لوووووووووول المصيبه ان صج :)

نحن في الكويت .. شنو عندنا غير الهبات لوول

Super Woman يقول...

لوووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووول





!!!!!!!!
@@@@@@@

لوووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووووول


;p

U-Turn يقول...

paris

هلا وغلا بال top 1 ;)

انتي العجيبه والله
لووووووووول زين يسوون فيهم
جان زين يكسرونه على روسهم :d

منوره البلوق
لا تقاطعينا تعودت اشوفج اول تعليق :]

U-Turn يقول...

والله سكلي بجرب عصيركم :d

عسى ما عليه طق ما احب انطر ترى :d


@@
بشار

ليش سموه بشار :d?

U-Turn يقول...

هلا بالطش والرش
هلا بكويتنا

لووووووول اكيد مو لان هبه
عادي عادي اعترفي ما راح ازفج :d

ايي والله @@
ما ادري ميتين عطش يمكن !!


لاتقاطعينا يا ملح البلوق :d

U-Turn يقول...

منو ينسى هني
اسفرت وانورت
واستهلت ومطرت ;**


يبتي cup cake معاج :d

ايي والله @@
الله لا يبلينا :d



منوره المكان :*
أبي رقي بالكومنت الياي بليز :$

U-Turn يقول...

طموحه ومملوحه
حيالله من يانا

@@ شفتي شلون
انا اقول لو تييب لها ديايه وتلزقها على تاج احسن لها
تدري بجم وصلوا هالتيجان
على 85 دينار @@
دينار ينطح دينار

U-Turn يقول...

تدرين **
احم احم
الي بعدوا :d

U-Turn يقول...

كويتيه مملوحه

هلا بملح الكويت :d

ايي والله شفتي شلون
اللهم يا كافي @@
عسى ما أحد سوا شي غيره لحقه @@

U-Turn يقول...

رورو الشخبوطه

لوووووول
زووووغه
والله زين تسويين أريح لج قلب

إيي صاجه عاد مو كل التيجان
في تيجان ينحطون على الراس
خوش شي حق ضف الكشه :d

بس هذوووووول @@ بروحهم كشه فوق كشتي شصييييييييير @@



الله يخلي لج امج يا رب ;)



منوره المكان
ما اوصييج سيري اي وقت المكان مكانج

U-Turn يقول...

انتر _ كيو 8 :d

حياك الله اخوي

ايي لوووووووووول
لا ما يبردجبدي قوطي العصير
ما ينفع إلا أحذفه بطفايه :d

U-Turn يقول...

ولد الديره

العفو العفو

لووووووول عندك بلاك بري ومستحي تقول :d?
ايي ما قلنا لا تشترون الحين الأوادم يشترونه ويآخذون دوره شلون يستخدمونه ليش عاد @@


درر درر مشاء الله
لا خلا ولا عدم اخوي :)

U-Turn يقول...

حيالله أخوي متفائل
@@
غريبه اول مره ما تحط كومنت ما تتحلطم فيه :d


إيي والله صاج
بس شنقول وشنخلي
خلها على الله

عاجبينك الأبيات حلالك ترى مو انا كاتبتهم :d

U-Turn يقول...

هلا بنجمتنا
ويييييييييع ولا انا
شكله ما يعجبني

:S

أفا علييج ما اردج احلى عصير كي دي دي اليوم يوصلج :D


منوره المكان
ايي صج
ترى ولهانه علييج :*

U-Turn يقول...

بانوراما حياك الله أخوي

@@
ايي والله صاج
كل شي هبه الله يكافينا شرها @@

U-Turn يقول...

هلا وغلا فاتووو
منوره المكان



@@ للأسف ما عندنا شي
غير التحلطم والحش بخلق الله @@

ويييييي هذا يبيله بوست بروحه :d

U-Turn يقول...

هلا بنت العم @@
اشكره مالج خلق تعلقين @@

ايي ما الومج عندج مدتيرم :d
شسويتي فيه ؟؟

@@
بس عاد مو قبول تضحكين لانج مع الموضوع ولا ضده @@ :d

Fahad يقول...

ههههههههههه

صراحة وصفتي كل الهبات اللي بالكويت ..

عجبني الموضوع :)

أتيت متاخرة يقول...

يبيله اكتب عن هبات البحرينيين
يبيله من قلب

بس مشكلتي ما عارف اتحلطم مثلج يو تيرن

الزين يقول...

نسيتي هبه وحده

لأني كويتية لازم يكون عندي مدونة

:)

مو هذي الهبة الحين

!!


صباحج سكر يا سكرة

kazmawy يقول...

صح لسانك يا يو تيرن تونى اثبت ان بلوقج اسمه رونق سايد لوووووووووووول
الظاهر ابوج ضابط بالمرور او متعقدة من المخالفات
لوووووووووووول
بس انا اوافقج بكلامج 100% يلوعون جبدى الى مالهم راية بيرو بيرو بيو بيو "))
تسلم ايدج علبوست الحلو ...ياوزيرة المستقبل

ريــــــانــه الـعـــــود يقول...

لوووووول يبتييها والله

والله شي مو طبيعي الهبة بالكويت وبالاخص cba

مو من صجهم هالناس مافي وحدة ما عندها بلاك بيري او آي فون .. بس لأن الكل عنده

انا كنت باشتريه بس احس راحت حلاته الناس كلهم عندهم وبعد فترة بتنزل هبة يديدة وبيخلونه p;

اممم .. بس العصير عادي لووووووول

خوش بووست :)

7osen يقول...

صح إلسانج

والله العظيم البوست اكثر من رائع

عجبني لأخر درجة

ههههههه

هبات مادري متى تنتهي هالسوالف

والله اذا انمحت هالكلمة من قاموسنا راح نكون بخير

يعطيج العافية

iliveinq8 يقول...

النجمه اللي هابين فيها مو نجمه :) هذي فليك.. Snowflake.. وهي معتقد مسيحي بحت Christianity Symbol
والله قاصين عليهم المساكين.

بارك الله فيك خيتي خوش موضوع ..
والله لا يبلانا

بـابـل يقول...

رووووعة روووعة هالبوست

صراحة قلتي اللى بالقلب

هني بالكويت الناس دايخيييين

يقطون فلوسهم على اشياء تافهه لاتقدم ولاتأخر

والمظاااهر عاميه الناس


يعني اللى يشرب عصير الضاحية بيطول عمره؟؟

واللى تلفونه بلاك بيرى شنو فرقه عن السوني والا النوكيا الخ


والرنج شنو فرقه عن السيارات الثانية

السيارة وسيلة مو غاية

ويشكون بعد من القروض والديون ووو


والله كل خرابنا من إيدينا

ويناتنا صايرين رزقه حق التجار الأجانب

اللى يمصون دم الكويتي بدون رحمة

الشغلى اللى ثمنها 10 دنانير يبيعونها عليه ب 50 دينار وأحنا ندفع وأحنا نضحك
لازم الناس تصحى من نومة أهل الكهف

والله يستر من الياي


مشكورة يوتيرن والله يكثر من امثالك

ReLaaaX يقول...

وازييييييينج وازين تحلطمج

التيجان ياطويلة العمر كانت هبة فعلاً بس حق الحفلات !
بعدين تطور الوضع وصار حتى باليمعات !
بعدين تطور الوضع إلى أن صار في المدارس بعد!

وهم تطور الوضع وصار في كل وقت :P

--
والموبايلات يهمني جداً إني اعرف اشلون استخدمه قبل لا اخذه + يهمني بشكل كبير الكاميرا لأني اعتمد اعتماد كلي على الموبايل في التصوير !

--
والله صاجه يايوتيرن :)

Made n Q8 يقول...

والله ماادري شلاقين بعصير الضاحيه..بالله شفيه عصير الدسمه(الدعية حاليا وراح يرجع الدسمه باذن الله :P )

وضحكتني هذي الي علقت على اسيل امبييه بدعت اهم شي ان لبسها حلو خخخ

Q80 Blogger يقول...

تره البوست ينرفز !!!!

ماحب النوعيات الي جذي تغثني

بلاك بري والضاحيه وماكي !!!!!!!!!

اعوذ بالله

الله يكملهم بالعقل

U-Turn يقول...

أخوي فهد

حياك الله
أهم شي ان عجبك البوست :]

U-Turn يقول...

هلا وغلا
بالغاليه أتيت متأخره :]


لووووول افا علييج بس أعطيج كورس بالتحلطم :d

U-Turn يقول...

هلا بالزين والسنع كله

إيي والله صاااااااااااااجه

هاذي راحت عن بالي :d

صباحج عسل وقيمر يا عسل :d

U-Turn يقول...

هلا فييك اخوي كزماوي :d
لوووووووووووووووووول

ايي زين بعد تثبت :d انا على خبري انت نظاره قاعة بطل يالله تشوف :d


لا وي اسم الله علي @@ ما ابي اصير وزيره :d

قلب طفله يقول...

لووووووووووووول

صح لسانج و تسلم ايدج اللي

سطرت هالهبات الخنفشاريه :P

ترى هالنوعيه مساكين قالوا الناس

قلت وياهم لبسوا الناس لبست

وياهم ترى لو يقطون عمرهم

بالنار لحقوهم :(

الله يعافيهم و لا يبلانا

J Daily يقول...

الشباصه مالي هلاقه فيها

عندي آيفون ولكن خذيته قبل ماينباع بالكويت طلبته من آبل ستور

عصير الضاحيه رحتله مره قبل 3سنين
كيفان قبل سنتين

وانا اشوف كله زحمه عند محل العصير. طلع هبه
وعلى فكره في هبه يديدة محل عصير داخل ماكدونالدز كيفان ;-d

قبل جم شهر شاري سيارة فـ اول ماركبت فيها وبطلع من الوكاله قلتله بعلق شي بالسيارة شنو اعلق؟
الجواب المتوقع: نجمة شوارفسكي..
قلتله مع ابتسامه عطني شي ثاني

الرنج صج انترس بالشوارع

ماكي مره وحده كليت منه واخر مره لاعت جبدي وبطني و مايحتاج اكمل
افضل الاكل الصيني على الياباني

السياسة احبها بس مو بالكويت لان كلهم متعصبين وعالفاضي


والبوست المفروض للبنات بس انا تليقفت وعلقت عليه
;-d

و في هبه توها يديده
يشترون ماك بوك الامنيوم ويتوهقون في سستم ماك ف يحطون وندوز xp
:P

kazmawy يقول...

يو تيرن وينننج عسي ما شر
تعالي خلاص احطج وزيرة شؤون النساء بس لا تقاااطعين "))

U-Turn يقول...

ريانة العود


هلا وغلا

لووووووووول
ايي والله بس عاد لا طبين وايد بال CBA :d

لا لا أتغشمر
زين تسوين فييهم
صاجه والله صاجه


منوره المكان لا تقاطعينا عاد

U-Turn يقول...

أخوي 7osen

الله يعافييك
أهم شي يعجبكم :]


مشكور على المرور :]

U-Turn يقول...

i live in q8

إيي والله قاصيين عليهم

بس شنقول وشنخلي

الحمد الله بس على كل حال

الله يبارك فييك

آميين الله يسمع منك :]

U-Turn يقول...

هلا والله أخوي بابل

من زمان عنك أخوي
بشر عنك عساك بخير :]؟


ايي والله صاج
الله يعافييك :]

U-Turn يقول...

وزييينج انتي والله :**

هلا وغلا ريلاكس

منوره

اييي كل شي هبــــــــــــه @@

U-Turn يقول...

made n q8

لوووووووول
ايي والله
بس ترى ممنوع الدعايات :d

ابي 25% من أرباح عصير الدسمه :d

U-Turn يقول...

لوووووووول
كويتي بلوقرز
متى ما علق وانت مو متنرفز :d?

ايي والله صاج شي ينرفز :]

حياك الله أخوي

U-Turn يقول...

قلب طفله
هلا بالغاليه هلا


إيي والله
آميين الله يسمع منج
الله يكملهم بعقولهم

U-Turn يقول...

هلا فييك اخوي يعقووبووو
لا أفا علييك بس
أنا ما عندي تعصب
لووووووول
ولاني عنصريه

يعني البوست للكل :d
ماكو الكل يعلق قاعده على قلوبكم :d


لووووووووول هبة الماك بوك للحين ما وصلتني :d

U-Turn يقول...

هلا فييك اخوي كزماوي :d

لا والله ما شر
ما فيني إلا العافيه

بس يعني @@ تدري دراسه ولووووووويه
وطلعات وييات
وكلمتين من الوالده
وعشره من الوالد
ومحاضره يمين
ومحاضره يسار

@@
يعني بختصار ماكو عذر غير ان مخي فاضي ومقفل مافيه غير Accounting @@
فعلى ما أجمع قواي العقليه يبيلي جم يوم أريح :d

@@ ها
وزيره
مو بشااااااااااااااااره هونت ما ابي @@
إذا استجوبوني راح اتوهق شقوووووول !!

الحارث بن همّام يقول...

عندي تلفون اي فون من قبل 4 اشهر

ما استعملت فيه غير دقمتين
الحمرا والخضرا

[MaDry-Shakw~] يقول...

الكويتين بس حق الطماشة زاهبين غير هل حجي مافي :P

U-Turn يقول...

أخوي الحارث بن همام

لووووووووووول
شلي حادك
إخذ لك نوكيا أحسن لك @@

صرف فلوس على الفاضي :d

U-Turn يقول...

هلا وغلا مادري شكوو :]

خوش نك نيم :$ تسلفيني اياه :d


لوووووووووول
صاجه والله
بس ترى مو كلهم :d أحم أحم

يعني 90% منهم :d


منوره المكان
عاد مو تقاطعين

غير معرف يقول...

الحين قمت احاتي وحده تدخل لابسه هالتاج تقول حمامه راكه عليها .. !


ههههههههههههههههههههههههه
جميـل !
عالجرح و الله !

U-Turn يقول...

هلا وغلا بأثر

مرورج الأجمل :]

لوووووووول
دوم هاضحكه ان شاء الله